କଟକ: ସହରରୁ ନକଲି କୋରୋନା ଔଷଧ ଜବତ ପ୍ରସଙ୍ଗ । ଏନେଇ ପ୍ରତିକ୍ରିୟା ରଖିଲା ରାଜ୍ୟ ଔଷଧ ବିକ୍ରେତା ସଙ୍ଘ । ସମ୍ପୃକ୍ତ ବ୍ୟକ୍ତି ବିକିଥିବା ସମସ୍ତ ନକଲି ଔଷଧକୁ ଚିହ୍ନଟ କରି ଫେରାଇବା ପାଇଁ ସଙ୍ଘ ଦେଲା ନିର୍ଦ୍ଦେଶ । ଏହି ସମ୍ପର୍କିତ ବିବରଣୀ ଡ୍ରଗ ବିଭାଗକୁ ଦେବା ପାଇଁ ମଧ୍ୟ ନିର୍ଦ୍ଦେଶ ରହିଛି । ଏଥିସହ ସମ୍ପୃକ୍ତ ବ୍ୟକ୍ତିଙ୍କ ଫାର୍ମ ଲାଇସେନ୍ସ ରଦ୍ଦ କରିବା ସହିତ କଳା ତାଲିକା ଭୁକ୍ତ କରିବା ପାଇଁ ଦାବି କରିଛି ରାଜ୍ୟ ଔଷଧ ବିକ୍ରେତା ସଙ୍ଘ ।
ସୂଚନାଯୋଗ୍ୟ, କଟକ କନିକା ଛକରେ ଥିବା ମେଡ଼ିସିନ ହୋଲସେଲର ଗୋଦାମ ଉପରେ ଜିଲ୍ଲା ଡ୍ରଗ ଡିପାର୍ଟମେଣ୍ଟର ଚଢ଼ାଉ କରି ପାଖାପାଖି 70 ଲକ୍ଷ ଟଙ୍କାର ଟଙ୍କାର ନକଲି କୋରୋନା ଔଷଧ ଜବତ । ଉତ୍ତରପ୍ରଦେଶର ମାକ୍ସ ରିଲିଫ ହେଲଥ କେୟାର ନାମକ କମ୍ପାନୀରୁ ଏହି ଔଷଧ ଆସୁଥିବା ସୂଚନା ମିଳିଛି ।
ଅନ୍ୟପଟେ ନକଲି କୋରୋନା ଔଷଧ କାରବାର ପ୍ରସଙ୍ଗରେ ପ୍ରତିକ୍ରିୟା ରଖିଲେ ଔଷଧ ବ୍ୟବସାୟୀ ମାଲିକ ଶିବ ପ୍ରସାଦ ଜେନା । ନକଲି ଔଷଧ କଥାକୁ ଏଡାଇଲେ ଶିବ । ସବୁ କିଛି ବିଲରେ କାରବାର ହୋଇଛି । ମୁଁ କିଣିଥିବା ଫାବିପିରାଭିର ଓଡ଼ିଶାରେ କୌଣସି ଜାଗାରେ ସପ୍ଲାଏ କରିନାହିଁ । ୪ରୁ ୫ଟି ମେଡିସିନ ରାଜ୍ୟର କିଛି ଟା ସ୍ଥାନକୁ ପଠାଇଛି । ସେ ସମସ୍ତ ମେଡ଼ିସିନକୁ ଫେରିବା ପାଇଁ ସେମାନଙ୍କୁ କୁହାଯାଇଛି ।
ଫାବିପିରାଭିର ମେଡିସିନ ଓଡିଶାରେ ବିକ୍ରି କରାଯାଇନାହିଁ । କେବଳ ଗ୍ବାଲିୟରକୁ ବିକ୍ରି କରାଯାଇଛି । ଅକ୍ଟୋବର ମାସରୁ କୋରୋନାର ଅନ୍ୟ ମେଡିସିନ ଆଣି କଟକ ରେ ବିକ୍ରି କରୁଥିଲେ । ତେବେ କେତେ ପରିମାଣର ମେଡ଼ିସିନ ବିକ୍ରୟ କରିଥିଲେ ସେନେଇ କିନ୍ତୁ ମୁହଁ ଖୋଲିନାହାନ୍ତି ଶିବ ।
କଟକରୁ ନାରାୟଣ ସାହୁ, ଇଟିଭି ଭାରତ
