କଟକ: ନିଆରା ଅନ୍ଦାଜରେ ଆସିଛନ୍ତି ବିଧାୟକ ସୁର ରାଉତରାୟ । ଏଥର କୌଣସି ବିଧାନସଭାରେ ହଟ୍ଟଗୋଳ ନୁହେଁ କି ନିର୍ବାଚନୀ ମୈଦାନରେ ଜୋରଦାର ପ୍ରଚାର ନୁହେଁ । ଏବେ ସଙ୍ଗୀତ ଦୁନିଆରେ ପାଦ ଥାପିଛନ୍ତି ଜଟଣୀ ବିଧାୟକ ସୁର ରାଉତରାୟ ।
ସଙ୍ଗୀତ ନିର୍ଦ୍ଦେଶକ ଜାପାନୀ ଭାଇଙ୍କ ନିର୍ଦ୍ଦେଶନାରେ ରିଲିଜ ହେବାକୁ ଯାଉଥିବା ରଙ୍ଗବତୀର ଗୀତରେ ସେ ନଜର ଆସିବେ ରାପର ହିସାବରେ । ପ୍ରଥମ କଥା ହେଲା ଇଏ ସେହି ରଙ୍ଗବତୀ ଗୀତ ନୁହେଁ ଯିଏକି ସମ୍ବଲପୁରୀ ଭାଷାରେ ଚର୍ଚ୍ଚା କେନ୍ଦ୍ରବିନ୍ଦୁ ପାଲଟିଛି । ଏହା ହେଉଛି ଏକ ଭିନ୍ନ ଧୂନର ରଙ୍ଗବତୀ ଗୀତ । କିନ୍ତୁ ଏହି ଗୀତ ମଧ୍ୟରେ ଥିବା ରାପରେ ଅନେକ ଭାଷାର ମିଳନ ହୋଇଛି ।
ତେବେ ଏହାକୁ ଗାଇ ସୁର ବେଶ ଖୁସି ଅନୁଭବ କରିଛନ୍ତି । ଅନ୍ୟପଟେ ଏହି ଗୀତକୁ ନେଇ ଆଶା ବାନ୍ଧିଛନ୍ତି ଅରମାନ ମ୍ୟୁଜିକ ନିର୍ଦ୍ଦେଶକ ଓ ଲେଖକ । କାରଣ ସୁରଙ୍କୁ ଏହି ଗୀତରେ କାଷ୍ଟ କରିବା ପରେ ଗୀତର ଓଜନ ଆହୁରି ବୃଦ୍ଧି ହୋଇଛି ।
ପୂର୍ବରୁ ଭାଲୁ ଭାଇନା ଓରଫ ତାରାପ୍ରସାଦ ବାହିନୀପତି ସଙ୍ଗୀତ ଦୁନିଆରେ ପାଦ ଥାପି ସାରିଛନ୍ତି । ଆଉ ଏବେ ସୁରଙ୍କ ପାଳି ଯାହା ଦର୍ଶକ ମାନଙ୍କ ମନକୁ ନିଶ୍ଚୟ ଛୁଇଁବ ବୋଲି ଆଶା କରାଯାଉଛି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
