କଟକ: କୋରୋନା ସତର୍କତାକୁ ଦୃଷ୍ଟିରେ ରଖି ଆଜିଠାରୁ ଓଡିଶା ହାଇକୋର୍ଟର ନ୍ୟାୟିକ କାମକୁ 31 ମାର୍ଚ୍ଚ ଯାଏ ବନ୍ଦ କରି ଦିଆଯାଇଛି । ହାଇକୋର୍ଟ ଫୁଲ ବେଞ୍ଚ ବସି ଏହି ନିଷ୍ପତ୍ତି ନେଇଛନ୍ତି । ଆଜିଠାରୁ ଆସନ୍ତା ମାର୍ଚ୍ଚ 31 ଯାଏ କେବଳ ଅତି ଗୁରୁତ୍ବପୂର୍ଣ୍ଣ ମାମଲାର ଶୁଣାଣି ହେବ ବୋଲି କୁହାଯାଇଛି।
ଏହାସହ ମାର୍ଚ୍ଚ 31 ପର୍ଯ୍ୟନ୍ତ କୌଣସି ମାମଲାର ତାଲିକାଭୁକ୍ତ ହେବ ନାହିଁ। ଅତି ଗୁରୁତ୍ବପୂର୍ଣ୍ଣ ମାମଲା ଥିଲେ ବିଚାରବିଭାଗୀୟ ଡେପୁଟି ରେଜିଷ୍ଟ୍ରାରଙ୍କୁ ଜଣାଯିବ। ହ୍ବାଟସ୍ଆପ ଓ ଭିଡିଓ କଲ ଜରିଆରେ ଡେପୁଟି ରେଜିଷ୍ଟ୍ରାରଙ୍କୁ ଏହା ଜଣାଯିବ। ଏହାଛଡା କୋର୍ଟ ପରିସରରେ 24 ଘଣ୍ଟା ଆମ୍ବୁଲାନସ ଓ ଡାକ୍ତରୀ ଟିମ ଉପସ୍ଥିତ ରହିବେ ବୋଲି କୋର୍ଟ ନିଷ୍ପତ୍ତି ନେଇଛନ୍ତି ।
ସେହିପରି ରୋଟେସନ ଭିତ୍ତିରେ ଅଧିକାରୀ ଓ କର୍ମଚାରୀ କୋର୍ଟ କାମରେ ନିୟୋଜିତ ହେବେ । ରାଜ୍ୟର ସମସ୍ତ କୋର୍ଟରେ ଏହି ନିୟମ ଲାଗୁ କରାଯିବ । ଲକ୍ଡାଉନ୍ ହୋଇଥିବା ସ୍ଥାନଗୁଡିକରେ ଅପରାହ୍ନ 12 ଟାରୁ 1 ଟା ପର୍ଯ୍ୟନ୍ତ କେବଳ ଗୁରୁତ୍ବପୂର୍ଣ୍ଣ ମାମଲାର ଶୁଣାଣି କରାଯିବ। ସେହିପରି ଅନ୍ୟ ସ୍ଥାନଗୁଡିକରେ 11 ଟାରୁ 1 ଟା ପର୍ଯ୍ୟନ୍ତ କେବଳ ଗୁରୁତ୍ବପୂର୍ଣ୍ଣ ମାମଲାର ଶୁଣାଣି କରାଯିବ। ଏନେଇ ରାଜ୍ୟର ସମସ୍ତ ବାରର ଆଇନଜୀବୀଙ୍କୁ ସହଯୋଗ କରିବାକୁ ହାଇକୋର୍ଟଙ୍କ ରେଜିଷ୍ଟ୍ରାର କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି।
କଟକରୁ ନାରାୟଣ ସାହୁ, ଇଟିଭି ଭାରତ
