କଟକ: ଘର ସାଜସଜ୍ଜା କାହାକୁ ଅବା ପସନ୍ଦ ନୁହେଁ । ସେ ଘରର ରଙ୍ଗ ହେଉ କି ଭଳିକି ଭଳି ଆକର୍ଷଣୀୟ ସାମଗ୍ରୀ, ଯେମିତି ବି ହେଉ ନିଜ ଘରକୁ ସୁନ୍ଦର କରିବା ପାଇଁ ସମସ୍ତଙ୍କ ରହିଥାଏ ଅଳ୍ପ ବହୁତ ଆଗ୍ରହ । ହେଲେ ନଡିଆ ସଢେଇରୁ ଘର ସଜାଇବା କଥା ହୁଏତ କେହି କେବେ ଭାବିଥିବେ । ଯାହା ସମ୍ଭବ କରିଦେଖାଇଛନ୍ତି କଟକ ଜିଲ୍ଲା କନ୍ଦରପୁର ଅଞ୍ଚଳର ଚିତ୍ତରଞ୍ଜନ ଭୋଇ ବା ସଭିଙ୍କ ପ୍ରିୟ କାହ୍ନୁ ଭାଇ । ଯିଏ ନିଜର ନିଆରା କଳାକୁ ଏବେ ଜୀବିକାରେ ପରିଣତ କରିଥିବା ବେଳେ ଏହି ସବୁ ସାମଗ୍ରୀର ବିକ୍ରି ପାଇଁ ବଜାର ବସିବାକୁ ଚାହିଁ ବସିଛନ୍ତି ।
ପୂର୍ବରୁ ମନ୍ଦିର ଓ ବିବାହ ବ୍ରତଘରରେ ନିଜ ତୁଳୀର ସ୍ପର୍ଶରେ ସେ ଆଙ୍କୁଥିଲେ ସୁନ୍ଦର ସୁନ୍ଦର ଛବି । ଯାହାକୁ ସ୍ଥାନୀୟ ଲୋକେ ବେଶ ପସନ୍ଦ କରୁଥିବା ବେଳେ ତାଙ୍କ କଳାର ରହିଥିଲା ଢେର ଚାହିଦା । ହେଲେ ରାଜ୍ୟରେ ରହିଥିବା ଲୁକାୟିତ କଳାକୁ ଲୋକ ଲୋଚନକୁ ଆଣୁଥିବା ବାଲିଯାତ୍ରା ଓ ତୋଷାଳୀ ମେଳାରେ ସତେ ଯେମିତି ନିଜ ଜୀବିକାର ଏକ ନୂଆ ରାହା ପାଇଥିଲେ କାହ୍ନୁ । ଭଳିକି ଭଳି କାରୁ କାର୍ଯ୍ୟ ଓ କଳା ଦେଖି ହାତରେ ମୁଠାଏ ଆଶା ସାଉଣ୍ଟି ଆଣିଥିଲେ କାହ୍ନୁ । ଆଉ ଏହାପରେ ସେ ଆରମ୍ଭ କରନ୍ତି ନଡିଆ ସଢେଇରୁ କାରୁକାର୍ଯ୍ୟ । ପ୍ରଥମେ ସଢେଇକୁ ଦେଖି ଏକ କପ୍ ଭଳି ମନେ ହେଉଥିବାରୁ ମନର ଛବିକୁ ବାସ୍ତବତାରେ ପରିଣତ କରି ସେ ପ୍ରସ୍ତୁତ କରିଥିଲେ ଘର କରଣା ଓ ଘର ସଜ୍ଜା ସାମଗ୍ରୀ ।
କେବଳ ସଢେଇ ନୁହେଁ ଖାଲି ବୋତଲ ଓ ଅନ୍ୟ ଅଦରକାରୀ ସାମଗ୍ରୀ ନେଇ ଏହାକୁ ନୂଆ ରୂପ ଦେବାରେ ବେଶ ଖୁସି ଅନୁଭବ କରନ୍ତି କାହ୍ନୁ । ବର୍ତ୍ତମାନ ନିଜ ହାତ ତିଆରି ସାମଗ୍ରୀର ବିକ୍ରି ପାଇଁ ବଜାରର ସୁବିଧା ନଥିବା ବେଳେ ତାଙ୍କ କଳା ଏତେ ଜୀବନ୍ତ କି ଏହାକୁ କିଣିବା ପାଇଁ ତାଙ୍କ ଘରେ ଲମ୍ବିଯାଏ ଗ୍ରାହକଙ୍କ ଲମ୍ବା ଲାଇନ । ତେବେ ସଢେଇରୁ ସୁନ୍ଦର କଳାକୃତି ତିଆରି ପାଇଁ ସେ ପ୍ରଥମେ ସଢେଇ ସଂଗ୍ରହ କରି ବାଲି କାଗଜରେ ଏହାର ପୃଷ୍ଠ ଚିକ୍କଣ କରନ୍ତି । ପରେ ଆବଶ୍ୟକ ମୁତାବକ ରଙ୍ଗ ଭରି ଓ ଆକାର ଦେଇ ଏଥିରୁ ପ୍ରସ୍ତୁତ କରନ୍ତି କପ୍, ଚାମଚ, ଖେଳଣା ଓ ଖାଲି ବୋତଲରୁ ପ୍ରସ୍ତୁତ କରନ୍ତି ଫୁଲଦାନୀ ଓ ଗ୍ଲାସ ପେଣ୍ଟିଂ । କାହ୍ନୁଙ୍କ ଏହି କଳା ପାଇଁ ସ୍ତ୍ରୀ ସାବିତ୍ରୀ ଓ ସ୍ଥାନୀୟ ବାସିନ୍ଦା ମଧ୍ୟ ବେଶ ଗର୍ବିତ ।
କଳା ଏକ ଏପରି ନିଶା ଯାହା ନା କେବେ କୌଣସି ପ୍ରତିବନ୍ଧକ ମାନିଛି ନା କେବେ ପରିସ୍ଥିତିରେ ଝାଉଁଳି ପଡିଛି । ବରଂ ଏହା କଳାକାରକୁ ପ୍ରତିଟି ପରିସ୍ଥିତିରେ ପରିପକ୍ବ କରିବା ସହ ଜୀବିକା ପାଇଁ ନୂଆ ରାହା ଦେଖାଏ । କାହ୍ନୁଙ୍କ କଳାକୁ ବି ଯଦି କିଛି ସରକାରୀ ସହାୟତା ମିଳିପାରନ୍ତା ତେବେ ତାଙ୍କୁ ପ୍ରୋତ୍ସାହନ ମିଳିବା ସହ ବିଶ୍ବ ଦରବାରରେ ସଢେଇ କଳାକୃତି ପାଇଁ ଗର୍ବିତ ହୋଇପାରନ୍ତା କଟକ ସହର ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
