ଭୁବନେଶ୍ବର: ମହାନ ଗାନ୍ଧିବାଦୀ, ସ୍ବାଧୀନତା ସଂଗ୍ରାମୀ, ପୂର୍ବତନ ରାଜ୍ୟସଭା ସାଂସଦ ତଥା ମହାନ ଜନ ନାୟକ ପଦ୍ମଶ୍ରୀ ସ୍ବର୍ଗତ ଭବାନୀ ଚରଣ ପଟ୍ଟନାୟକଙ୍କ ପ୍ରଥମ ଶ୍ରାଦ୍ଧ ବାର୍ଷିକୀରେ ରାଜ୍ୟସ୍ତରୀୟ ଓ୍ବେବିନାର ଆୟୋଜନ ହୋଇଯାଇଛି ।
କାର୍ଯ୍ୟକ୍ରମର ଆରମ୍ଭରେ ବେଣୁଧର ସେନାପତି ପ୍ରାରମ୍ଭିକ ବକ୍ତବ୍ୟ ରଖି ଭବାନୀ ପଟ୍ଟନାୟକଙ୍କ ଜୀବନାଦର୍ଶ ସମ୍ପର୍କରେ ସଂକ୍ଷିପ୍ତ ବିବରଣୀ ରଖିଥିଲେ । ଏହାପରେ ବିଶିଷ୍ଟ ଗାନ୍ଧିବାଦୀ ଡ଼. ଏସ.ଏନ. ସୁବାରାଓ ଭବାନୀ ପଟ୍ଟନାୟକଙ୍କ ସହିତ ତାଙ୍କର ବ୍ୟକ୍ତିଗତ ସମ୍ପର୍କ ଓ ତାଙ୍କର ସେବାପ୍ରାଣ ସମ୍ପର୍କରେ ଆଲୋକପାତ କରିଥିଲେ । ଏହାପରେ ଶୋଭନୀୟ ଆନ୍ଦୋଳନ ନିର୍ଦ୍ଦେଶିକା ଡ଼. ଅରୁନ୍ଧତୀ ଦେବୀ ଭବାନୀ ପଟ୍ଟନାୟକଙ୍କ ଶାନ୍ତି ଓ ସଦ୍ଭାବନା ଚିନ୍ତାଧାରା ଓ କାର୍ଯ୍ୟକ୍ରମ ସମ୍ପର୍କରେ ଆଲୋଚନା କରିଥିଲେ । ପ୍ରହଲ୍ଲାଦ ସିଂହ ତାଙ୍କ ବକ୍ତବ୍ୟରେ ଭବାନୀ ପଟ୍ଟନାୟକ ଗାନ୍ଧୀ ବିଚାରଧାରା ସହିତ ଜୀବନର ଶେଷ ପର୍ଯ୍ୟନ୍ତ ବଞ୍ଚିଥିବାର ବିଭିନ୍ନ ଦିଗ ବିଷୟରେ ଆଲୋକପାତ କରିଥିଲେ ।
ବିଧାୟକ ଅତନୁ ସବ୍ୟସାଚୀ ନାୟକ ଭବାନୀ ପଟ୍ଟନାୟକଙ୍କୁ ସ୍ବାଧୀନତା ଆନ୍ଦୋଳନଠାରୁ ଜୀବନର ଶେଷ ପର୍ଯ୍ୟନ୍ତ କିଭଳି ଏକ ସଂଗ୍ରାମୀ ଜୀବନ ବଞ୍ଚିଥିଲେ ତାହା ବର୍ଣ୍ଣନା କରିଥିଲେ । ତିନି ତିନିଥର ରାଜ୍ୟସଭା ସଦସ୍ୟ ରହିଥିଲେ ମଧ୍ୟ ରାଜନୀତିର ପଙ୍କ ତାଙ୍କୁ ଛୁଇଁ ପାରି ନଥିଲା । ଡ଼. ଭଗବାନ ପ୍ରକାଶ ତାଙ୍କ ବକ୍ତବ୍ୟରେ କହିଥିଲେ, ସେ ଜଣେ ବିଶିଷ୍ଟ ଜନନେତା ଥିଲେ ଯାହାଙ୍କ ପାଖରେ ଅହଂକାର କେବେ ଦେଖା ଯାଇନାହିଁ । ଲୋକଙ୍କ ପାଈଁ ସଦା ସର୍ବଦା ସେ କର୍ମତତ୍ପର ରହିଥିଲେ । ଜାତୀୟ ଯୁବ ପ୍ରକଳ୍ପ ଓଡିଶା ଶାଖା ଆବାହକ ମଧୁସୂଦନ ଦାସ ତାଙ୍କର ବ୍ୟକ୍ତିଗତ ଅନୁଭୂତିକୁ ନେଇ ସ୍ବର୍ଗତ ପଟ୍ଟନାୟକଙ୍କ ମହାନତା ସମ୍ପର୍କରେ ବର୍ଣ୍ଣନା କରିଥିଲେ ।
ପରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ମନ୍ତ୍ରୀ ସମୀର ରଞ୍ଜନ ଦାଶ, ସ୍ବର୍ଗତ ଭବାନୀ ପଟ୍ଟନାୟକଙ୍କୁ ନିମାପଡା ମାଟିର ଗାନ୍ଧୀ ଭାବେ ବର୍ଣ୍ଣନା କରିବା ସହ ତାଙ୍କର ସେ ରାଜନୈତିକ ଗୁରୁ ବୋଲି ଅଭିହିତ କରିଥିଲେ ।
ଏହି ୱେବିନାର ଭବାନୀ ପଟ୍ଟନାୟକ ଫାଉଣ୍ଡେସନ ତରଫରୁ ଆୟୋଜନ କରାଯାଇଥିଲା । ଫାଉଣ୍ଡେସନ ତରଫରୁ ପ୍ରାୟ ୪୦ଟି ରକ୍ତଦାନ ଶିବିର ଆୟୋଜନ କରାଯାଇଥିବା ବେଳେ ଆଗାମୀ ଦିନରେ ବିଭିନ୍ନ ସାମାଜିକ କାର୍ଯ୍ୟକ୍ରମ କରିବା ପାଇଁ ଯୋଜନା ରଖାଯାଇଛି ବୋଲି ଟ୍ରଷ୍ଟ ସଦସ୍ୟ ସୋମ ସୂଚନା ଦେଇଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
