ହାଇଦ୍ରାବାଦ: ଭାରତୀୟ ରେଳବାଇ ବିଶ୍ବର ଚତୁର୍ଥ ସର୍ବବୃହତ ରେଲୱେ ନେଟଓ୍ବର୍କ । ପ୍ରତିଦିନ ସକାଳ ହେବା ମାତ୍ର ରେଳ ଷ୍ଟେସନରେ ଯାତ୍ରୀଙ୍କ ଭିଡ ଜମେ । ଗୋଟିଏ ରାଜ୍ୟରୁ ଅନ୍ୟ ରାଜ୍ୟ ହେଉ କିମ୍ବା ରାଜ୍ୟ ଭିତରେ ମଧ୍ୟ କୌଣସି ସ୍ଥାନକୁ ଯିବାକୁ ହେଲେ ଟ୍ରେନକୁ ସମସ୍ତେ ପସନ୍ଦ କରିଥାନ୍ତି । କାରଣ ଅନ୍ୟ ଯାତ୍ରା ଅପେକ୍ଷା ରେଳ ଯାତ୍ରା କରିବା ଅଧିକ ସୁବିଧାଜନକ ଅଟେ । ବିଶେଷ ଭାବରେ କୌଣସି ଦୂର ସ୍ଥାନକୁ ଯିବାକୁ ହେଲେ ଯାତ୍ରୀ ମାନେ ଟ୍ରେନକୁ ସୁରକ୍ଷିତ ମନେ କରନ୍ତି । ସ୍ବଳ୍ପ ଦରରେ ଆରମ ଦାୟକ ଯାତ୍ରା କିଏ ବା ପସନ୍ଦ ନକରିବ । ସେଥିପାଇଁ ରେଳ ସମସ୍ତଙ୍କର ପ୍ରଥମ ପସନ୍ଦ । ଯଦି କେହି ଟ୍ରେନରେ ଭାରତରୁ ଅନ୍ୟ ଦେଶକୁ ଯାତ୍ରା କରିବାକୁ ଚାହୁଁଛନ୍ତି ତେବେ ସେ ସୁବିଧା ମଧ୍ୟ ଉପଲବ୍ଧ ରହିଛି । କେମିତି, କେଉଁ ଷ୍ଟେସନ ଓ କେଉଁ ଟ୍ରେନରେ ବିଦେଶ ଯାତ୍ରା କରିହେବ, ତାହା ଆସନ୍ତୁ ଜାଣିବା...
ଟ୍ରେନରେ କରିହେବ କି ବିଦେଶ ଯାତ୍ରା ?
ଦେଶ ଭିତରେ ଗୋଟିଏ ରାଜ୍ୟରୁ ଅନ୍ୟ ଏକ ରାଜ୍ୟ ଟ୍ରେନ ଯାତ୍ରା କେତେ ସୁବିଧା ତାହା ତ ସମସ୍ତେ ଜାଣିଛନ୍ତି, କିନ୍ତୁ କେବେ ଟ୍ରେନରେ ବିଦେଶ ଯାତ୍ରା କରିଛନ୍ତି କି ? ଭାରତରୁ ଅନ୍ୟ ଦେଶକୁ ଯାତ୍ରା ପାଇଁ ଟ୍ରେନ ସେବା ମଧ୍ୟ ଉପଲବ୍ଧ ରହିଛି । ଦେଶରେ ୭ଟି ଅନ୍ତର୍ଜାତୀୟ ରେଳ ଷ୍ଟେସନ ରହିଛି, ଯେଉଁ ଷ୍ଟେସନରୁ ବିଦେଶକୁ ରେଳ ଚଳାଚଳ କରୁଛି । ତେବେ ସେହି ଷ୍ଟେସନ କେଉଁଠି ଅଛି ତାହା ଆସନ୍ତୁ ଜାଣିବା ।
ପଶ୍ଚିମବଙ୍ଗ ହଲଦିବାଡି ରେଳ ଷ୍ଟେସନ:
ପଶ୍ଚିମବଙ୍ଗ ହଲଦିବାଡ଼ି ରେଳ ଷ୍ଟେସନ ପଡୋଶୀ ବାଂଲାଦେଶର ସୀମାଠାରୁ ମାତ୍ର 4 କିଲୋମିଟର ଦୂରରେ । ଏଠାରୁ ଟ୍ରେନ ବାଂଲାଦେଶ ଯାଏ ଏବଂ ସେଠାରୁ ଭାରତକୁ ମଧ୍ୟ ଆସେ । ଏହି ଷ୍ଟେସନରେ ଟ୍ରେନରେ ବସିଲେ ଆପଣ ବାଂଲାଦେଶ ଯାଇପାରିବେ ।
ଉତ୍ତର ୨୪ ପର୍ଗଣା ପେଟ୍ରାପୋଲ୍ ରେଳ ଷ୍ଟେସନ୍:
ପଶ୍ଚିମବଙ୍ଗର ଉତ୍ତର ୨୪ ପର୍ଗଣା ଜିଲ୍ଲାରେ ପେଟ୍ରାପୋଲ ରେଳ ଷ୍ଟେସନ ରହିଛି । ଏହି ଷ୍ଟେସନରୁ ଟ୍ରେନ ଯୋଗେ ଆପଣ ବାଂଲାଦେଶ ଯାତ୍ରା କରି ପାରିବେ । ଏଠାରେ ଉଭୟ ଦେଶର ବହୁ ସଂଖ୍ୟକ ଲୋକେ ସୀମା ପାର କରିଥାନ୍ତି ।
ରାଧିକାପୁର ରେଳ ଷ୍ଟେସନ:
ପଶ୍ଚିମବଙ୍ଗର ଉତ୍ତର ଦିନାଜପୁର ଜିଲ୍ଲାରେ ରହିଛି ରାଧିକାପୁର ରେଳ ଷ୍ଟେସନ । ଭାରତ ଏବଂ ବାଂଲାଦେଶ ମଧ୍ୟରେ ବାଣିଜ୍ୟ ପାଇଁ ଏହି ଷ୍ଟେସନ ମାଧ୍ୟମ । ଏଠାରୁ ଆପଣ ଟ୍ରେନରେ ସହଜରେ ବାଂଲାଦେଶ ଯାତ୍ରା କରିପାରିବେ ।
ସିଙ୍ଗାବାଦ ରେଳ ଷ୍ଟେସନ:
ସେହିପରି ପଶ୍ଚିମବଙ୍ଗ ମାଲଦା ଜିଲ୍ଲାରେ ସିଙ୍ଗାବାଦ ରେଳ ଷ୍ଟେସନ ରହିଛି । ଏଠାରୁ ଟ୍ରେନରେ ସିଧା ବାଂଲାଦେଶ ଯାତ୍ରା କରିପାରିବେ । ଏହା ହେଉଛି ରାଜ୍ୟର ତୃତୀୟ ରେଳ ଷ୍ଟେସନ ଯେଉଁଠାରୁ ଆପଣ ବାଂଲାଦେଶ ଯାତ୍ରା କରିପାରିବେ । ଭାରତ ଏବଂ ବାଂଲାଦେଶ ମଧ୍ୟରେ ଭଲ ସମ୍ପର୍କ ହେତୁ ଏହି ଷ୍ଟେସନଟି ବାଣିଜ୍ୟ ପାଇଁ ବ୍ୟବହୃତ ହୁଏ ।
ଜୟ ନଗର ରେଳ ଷ୍ଟେସନ:
ଜୟ ନଗର ରେଳ ଷ୍ଟେସନ ବିହାରର ମଧୁବନୀରେ ରହିଛି । ଏଠାରୁ ଟ୍ରେନ ଯୋଗେ ପଡୋଶୀ ଦେଶ ନେପାଳକୁ ଯାତ୍ରା କରିପାରବେ । ନେପାଳ ଯିବା ପାଇଁ ସ୍ଥାନୀୟ ଲୋକମାନେ ଏହି ଷ୍ଟେସନ ବ୍ୟବହାର କରନ୍ତି ।
ଜୋଗବନୀ ରେଳ ଷ୍ଟେସନ:
ବିଦେଶ ଯାତ୍ରା ପାଇଁ ଅନ୍ୟ ଏକ ରେଳ ଷ୍ଟେସନ ହେଉଛି ବିହାରର ଜୋଗବନି ରେଳ ଷ୍ଟେସନ । ଏଠାରୁ ନେପାଳକୁ ଟ୍ରେନ ଚଳାଚଳ କରୁଛି । ଯେଉଁମାନେ ନେପାଳ ଯାତ୍ରା କରିବାକୁ ଯୋଜନା କରୁଛନ୍ତି ସେମାନେ ଏହି ଷ୍ଟେସନରୁ ଯାତ୍ରା ଆରମ୍ଭ କରିପାରିବେ ।
ଅଟାରି ରେଳ ଷ୍ଟେସନ:
ପଞ୍ଜାବରେ ରହିଛି ଅଟାରୀ ରେଳ ଷ୍ଟେସନ । ଏହି ଠାରୁ ଟ୍ରେନ ପାକିସ୍ତାନକୁ ଯାତାୟତ କରେ । ଯଦି କେହି ପାକିସ୍ତନ ଯିବାକୁ ଚାହାନ୍ତି ତେବେ ସମଝାଉତା ଏକ୍ସପ୍ରେସରେ ପାକିସ୍ତାନ ଯାଇପାରିବେ ।
