ଭୁବନେଶ୍ବର: ଚଳିତ ଆର୍ଥିକ ବର୍ଷ ଶେଷସୁଦ୍ଧା ରାଜ୍ୟର ଋଣଭାର କେତେ ଟଙ୍କାରେ ପହଞ୍ଚିବ? ଗତ 10 ବର୍ଷ ମଧ୍ୟରେ ମୁଣ୍ଡପିଛା ଋଣ ଭାର କେତେ ଥିଲା କେତେ ବୃଦ୍ଧି ପାଇଛି ? ରାଜ୍ୟର ଋଣଭାର ମୋଟ ଆଭ୍ୟନ୍ତରୀଣ ଉତ୍ପାଦ (GSDP) ର କେତେ ପ୍ରତିଶତ? ଆଜି ବିଧାନସଭାରେ ବିଧାୟକ ସୌମ୍ୟ ରଞ୍ଜନ ପଟ୍ଟନାୟକଙ୍କ ଏକ ଲିଖିତ ପ୍ରଶ୍ନ ଜରିଆରେ ଅର୍ଥମନ୍ତ୍ରୀଙ୍କ ଠାରୁ ଉତ୍ତର ମାଗିଥିଲେ ।
ଜବାବରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି, ଚଳିତ ଆର୍ଥିକ ବର୍ଷ ଶେଷସୁଦ୍ଧା ରାଜ୍ୟର ମୋଟ ଋଣର ପରିମାଣ 122917.25 କୋଟି ଟଙ୍କା ହେବ । ଏହା 2021-22 ଆର୍ଥିକ ବର୍ଷର ବଜେଟରେ ଆକଳନ କରାଯାଇଅଛି। 2011-12 ଆର୍ଥିକ ବର୍ଷରେ ମୁଣ୍ଡ ପିଛା ଋଣ ଭାର ପରିମାଣ 9144.40 ଟଙ୍କା ଥିଲା । ବର୍ତ୍ତମାନ ୧୦ ବର୍ଷ ପରେ ଏହା 2020-21 ଆର୍ଥିକ ବର୍ଷ ଶେଷ ସୁଦ୍ଧା ଏହାର ପରିମାଣ 23761.83 ଟଙ୍କାରେ ପହଞ୍ଚିଛି।
ମହାଲେଖାକାର (ସିଏଜି) ଓଡିଶାଙ୍କ ପ୍ରାରମ୍ଭିକ ତଥ୍ୟ ଅନୁଯାୟୀ ଚଳିତ ବର୍ଷ ଜୁଲାଇ ମାସ ଶେଷ ସୁଦ୍ଧା ରାଜ୍ୟର ଋଣଭାର 1 ଲକ୍ଷ 4 ହଜାର 312.12 କୋଟି ଟଙ୍କା ରହିଛି । ଯାହାକି ରାଜ୍ୟ ସକଳ ଘରୋଇ ଉତ୍ପାଦ(GSDP) ର 17.80 ପ୍ରତିଶତ ବୋଲି ଅର୍ଥମନ୍ତ୍ରୀ କହିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟଙ୍କ ସହ ରୁଦ୍ର ନାରାୟଣ ଦାସ, ଇଟିଭି ଭାରତ
