ଭୁବନେଶ୍ବର: ଆଜି ରଙ୍ଗର ପର୍ବ ହୋଲି । ଗାଁଠୁ ସହର ସବୁଠି ଉତ୍ସବର ମାହୋଲ । ପରସ୍ପରକୁ ଅବିର ବୋଳି ହୋଲି ପାଳୁଛନ୍ତି ଲୋକେ । ରାଜଧାନୀରେ ସାର୍ବଜନୀନ ସ୍ଥାନରେ ହୋଲି ଖେଳ ଉପରେ କଟକଣା ଜାରି ହୋଇଛି । ଏନେଇ ରାଜଧାନୀ ଭୁବନେଶ୍ବରରେ ତୀକ୍ଷ୍ମ ନଜର ରଖିଛି ପୋଲିସ । ବିଭିନ୍ନ ଛକରେ ପୋଲିସ ଫୋର୍ସ ମୁତୟନ ହୋଇଛନ୍ତି । ଜଳାଶୟଗୁଡିକ ଉପରେ ଫୋକସ କରାଯାଉଛି । ୨୦ ପ୍ଲାଟୁନ ପୋଲିସ ମୁତୟନ ସହ ୫୦ ଊର୍ଦ୍ଧ୍ବ ଅଫିସର ଭୁବନେଶ୍ୱର ଉପରେ ନଜର ରଖିଛନ୍ତି ।
ହୋଲି ଖେଳି କୌଣସି ଜଳାଶୟକୁ ଗାଧୋଇବାକୁ ଯାଇଥିବା ବେଳେ ଅନେକ ସମୟରେ ଦୁର୍ଘଟଣା ଘଟେ । ତେଣୁ ଏ ସବୁକୁ ଏଡାଇବାକୁ ପୋଲିସ ସତର୍କତାମୂଳକ ପଦକ୍ଷେପ ନେଇଛି । ସର୍ବସାଧାରଣରେ ଏକାଠି ନ ହେବା ଏବଂ ରାସ୍ତାରେ ନିଶାଗ୍ରସ୍ତ ନ ହୋଇ ବୁଲିବା ଏବଂ ବିଭିନ୍ନ ଜଳାଶୟରେ ଗାଧୋଇବା ବେଳେ ବିପଦଜନକ ସ୍ଥାନକୁ ନ ଯିବା ପାଇଁ ପୋଲିସ ବାରଣ କରିବା ସହ ପରିବାର ପରିଜନଙ୍କ ମଧ୍ୟରେ ରହି ସୁରକ୍ଷିତ ଭାବେ ପର୍ବ ପାଳନ କରିବାକୁ ନିବେଦନ କରିଛି । ଅମାନିଆଙ୍କୁ ସାବାଡ କରିବାକୁ ସହରର ବିଭିନ୍ନ ସ୍ଥାନରେ ପୋଲିସ୍ ଟିମ୍ ବୁଲୁଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
