ଭୁବନେଶ୍ବର: ମୃତ ମାନିନୀଙ୍କ ହତ୍ୟାକାରୀଙ୍କୁ ଦଣ୍ଡ ମିଳିବା ନେଇ ଆରମ୍ଭ ହୋଇଛି କଳ୍ପନା ଜଳ୍ପନା । ମୟୂରଭଞ୍ଜ ଜିଲ୍ଲା କରଞ୍ଜିଆ ବ୍ଲକ ଅଧିନ ହାତିବାରୀର ଗାଁସାଥି ମାନିନୀ ନାୟକଙ୍କ ହତ୍ୟାକାରୀକୁ ଦଣ୍ଡ ମିଳିବା ନେଇ ଦାବି କରିଛି ସଂଘ । ମୃତ ଗାଁ ସାଥି ମାନିନୀଙ୍କୁ ନ୍ୟାୟ ମିଳିବା ନେଇ ସ୍ଵର ଉଠାଇଲେ ଗାଁସାଥି ସଂଘ ମିଳିତ କ୍ରିୟାନୁଷ୍ଠାନ କମିଟି । ଆଉ ଏନେଇ ମଧ୍ୟ ଭୁବନେଶ୍ବରରେ ଏକ ସାମ୍ବାଦିକ ସମ୍ମିଳନୀ କରି ଏସଆଇଟି ଓ କ୍ରାଇମବ୍ରାଞ୍ଚ ତଦନ୍ତ ଦାବି କରିଛି ସଂଘ ।
ତେବେ ମାନିନୀ ଗାଁସାଥି ଭାବେ ନିଜ ଗାଁର ଏକ ସାହିକୁ ଜୁଲାଇ ୧୯ରେ ସର୍ଭେ ପାଇଁ ଯାଇଥିଲେ । ଆଉ ରାତି ହୋଇଥିଲେ ମଧ୍ୟ ଘରକୁ ଫେରିନଥିଲେ । ପରିବାର ପକ୍ଷରୁ ଅନେକ ଖୋଜାଖୋଜି କରିବା ପରେ ବି ତାଙ୍କର ପତ୍ତା ମିଳିପାରି ନଥିଲା । ହେଲେ ନିଖୋଜ ହେବାର ୩ ଦିନପରେ ଘର ଠାରୁ କିଛି ଦୂରରେ ତାଙ୍କ ମୃତଦେହ ଉଦ୍ଧାର କରିଥିଲା ପୋଲିସ ।
ପରେ ଏନେଇ ଥାନାରେ ଏକ ମାମଲା ରୁଜୁ ହୋଇଥିବାବେଳେ ମରିବାର ୮ ଦିନ ପରେ ବି ପୋଲିସ କିନ୍ତୁ ଏନେଇ କୌଣସି କାର୍ଯ୍ୟାନୁଷ୍ଠାନ ନ ନେଇ ଚୁପ୍ ରହିଥିଲା । ଯାହାକୁ ନେଇ ପୁଣିଥରେ ହତ୍ୟା ଓ ଦୁଷ୍କର୍ମ ମାମଲା ରୁଜୁ କରିଥିଲେ ମୃତକଙ୍କ ସ୍ବାମୀ । କାରଣ ପାରିପାର୍ଶ୍ବିକ ସ୍ଥିତିକୁ ଦେଖିଲେ ତାଙ୍କୁ ଅପହରଣ ପରେ ଦୁଷ୍କର୍ମ ସହ ହତ୍ୟା କରାଯାଇଥିବା ଜଣାପଡିଛି । ଯେହେତୁ ସେ ଗାଁ ସାଥି ସହ ଅଞ୍ଚଳର ଅନେକ ବିକାଶ ମୂଳକ କାର୍ଯ୍ୟରେ ସାମିଲ ଥିଲେ । ତେଣୁ ତାଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ କରିଛି ସଂଘ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
