ଭୁବନେଶ୍ବର: ସ୍ଥାନୀୟ ଜନତା ମୈଦାନଠାରେ ଆରମ୍ଭ ହୋଇଛି ରାଜ୍ୟସ୍ତରୀୟ ହସ୍ତଶିଳ୍ପ ପ୍ରଦର୍ଶନୀ । ଏହି ପ୍ରଦର୍ଶନୀ ପ୍ରଥମ ଥର ପାଇଁ ରାଜ୍ୟ ରାଜଧାନୀରେ ଆୟୋଜିତ ହେଉଥିବାବେଳେ ଏହା ଆସନ୍ତା 16 ତାରିଖ ପର୍ଯ୍ୟନ୍ତ ଚାଲିବ ।
ରାଜ୍ୟସ୍ତରୀୟ ହସ୍ତଶିଳ୍ପ ପ୍ରଦର୍ଶନୀକୁ ରାଜ୍ୟ ଉନ୍ନୟନ କମିଶନର ତଥା ଅତିରିକ୍ତ ଶାସନ ସଚିବ ଶ୍ରୀଯୁକ୍ତ ସୁରେଶ ଚନ୍ଦ୍ର ମହାପାତ୍ର ଉଦଘାଟନ କରିଛନ୍ତି । ଏହି ପ୍ରଦର୍ଶନୀରେ ରାଜ୍ୟର 23 ଟି ଜିଲ୍ଲାରୁ ବିଭିନ୍ନ ହସ୍ତଶିଳ୍ପ ସହିତ ଜଡିତ କାରୀଗରମାନେ ଭାଗ ନେଇଛନ୍ତି । ହସ୍ତକଳା ପ୍ରଦର୍ଶନୀ ମାଧ୍ୟମରେ ଗ୍ରାମାଞ୍ଚଳରେ ରହିଯାଉଥିବା ଏହି କାରିଗର ସହରର ଉପଭୋକ୍ତାଙ୍କ ସହିତ ଯୋଡି ହେବାର ସୁଯୋଗ ପାଇବେ ବୋଲି କହିଛନ୍ତି ଓଡିଶା ହସ୍ତତନ୍ତ,ବୟନଶିଳ୍ପ ଓ ହସ୍ତଶିଳ୍ପ ବିଭାଗ ନିର୍ଦେଶକ ଶ୍ରୀଯୁକ୍ତ ବସନ୍ତ କୁମାର ଦାସ ।
ଏହି ପ୍ରଦର୍ଶନୀରେ 104 ଟି ଷ୍ଟଲ କରାଯାଇଥିବା ବେଳେ ସେଥିରେ 136 ଜଣ କାରୀଗରଙ୍କୁ ସେମାନଙ୍କ ଉତ୍ପାଦକୁ ପ୍ରଦର୍ଶନ କରିବାକୁ ସୁଯୋଗ ଦିଆଯାଇଛି । ଏହି ଦଶ ଦିନ ମଧ୍ୟରେ 75 ଲକ୍ଷ ଟଙ୍କାରୁ ଉର୍ଦ୍ଧ୍ବ ବ୍ୟବସାୟ ହେବା ବିଭାଗ ପକ୍ଷରୁ ଆକଳନ କରାଯାଇଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
