ଭୁବନେଶ୍ବର: ବିଧାୟକ ପଦବୀ ଯିବା ପାଖାପାଖି 6 ମାସ ହୋଇଗଲାଣି । କିନ୍ତୁ ସରକାରୀ କ୍ବାଟର୍ସ ମୋହ ଛାଡୁନାହାଁନ୍ତି ନେତାଏ । ବାରମ୍ବାର ନୋଟିସ ସତ୍ତ୍ବେ ସରକାରୀ କ୍ବାଟର୍ସକୁ ନିଜ ପୈତୃକ ସମ୍ପତ୍ତି ଭାବି କିଛି ପୂର୍ବତନ ବିଧାୟକ ମାନେ ନିଜ ଅଧିନରେ ରଖିଛନ୍ତି ।
ଫଳରେ ନବନିର୍ବାଚିତ ବିଧାୟକ ମାନଙ୍କୁ ସରକାରୀ କ୍ବାଟର୍ସ ଆବଣ୍ଟନରେ ସମସ୍ୟା ଉପୁଜିଛି । ଏହି ପ୍ରସଙ୍ଗରେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ଶନିବାର ପୁଣି କଡା ଆଭିମୁଖ୍ୟ ଗ୍ରହଣ କରିଛନ୍ତି । 3ଦିନ ମଧ୍ୟରେ ଘର ଖାଲି ନକଲେ ସଂପୃକ୍ତ ପୂର୍ବତନ ବିଧାୟକଙ୍କ ବିରୋଧରେ ଏତଲା ଦିଆଯିବ ବୋଲି ଚେତାବନୀ ଦେଇଛନ୍ତି ।
ଅନ୍ୟ ଏକ ପ୍ରସଙ୍ଗରେ ମତ ରଖି ବାଚସ୍ପତି କହିଛନ୍ତି, ବିଧାନସଭାରେ ବ୍ୟାପକ ପରିବର୍ତ୍ତନ ହେବ । ସୁରକ୍ଷା ଦୃଷ୍ଟିରୁ ବିଧାନସଭାକୁ ସିସିଟିଭି ବଳୟରେ ରଖାଯିବ । କର୍ମଚାରୀଙ୍କୁ ସ୍ବତନ୍ତ୍ର ଡ୍ରେସ କୋଡ ଦିଆଯିବ । ବିଧାନସଭା କାର୍ଯ୍ୟକୁ ଅଧିକ ସ୍ବଚ୍ଛ କରିବା ପାଇଁ କର୍ମଚାରୀ ମାନଙ୍କ ପାଇଁ ବାୟୋମେଟ୍ରିକ ଲାଗିବ । ଏହାସହ ବିଧାନସଭା ଓ ବିଧାନସଭା ପରିସରରେ ପ୍ଲାଷ୍ଟିକକୁ ସଂପୂର୍ଣ୍ଣ ନିଷେଧ କରାଯିବ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
