ଭୁବନେଶ୍ବର: ରାଜଧାନୀରେ ମର୍ମନ୍ତୁଦ ସଡକ ଦୁର୍ଘଟଣା । ଠେଲା ଗାଡ଼ିକୁ ଧକ୍କା ଦେଲା କାର । ଏହି ଦୁର୍ଘଟଣାରେ ଜଣେ ବ୍ୟବସାୟୀଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ମୃତକ ଜଣକ ହେଲେ କେନ୍ଦ୍ରାପଡ଼ା ଜିଲ୍ଲାର ଭଜମନ ରାଉତ।
ସୂଚନା ଅନୁଯାୟୀ, ମୃତ ଭଜମନ ରାଉତ ଏବଂ ତାଙ୍କ ବନ୍ଧୁ କୁଳମଣି ରାଉତ ଉଭୟେ ବୁଦ୍ଧନଗରରେ ରହୁଥିଲେ । ସକାଳ ସମୟରେ କଦଳୀ ବ୍ୟବସାୟ ପାଇଁ ଠେଲାରେ ନେଇ ମାର୍କେଟକୁ ବିକିବାକୁ ଯାଉଥିଲେ, ହେଲେ ଦଇବ ଦାଉ ସାଜିଲା । ରାଜମହଲ ପଟୁ ଦୃତ ଗତିରେ ଆସୁଥିବା ଏକ କାରଟି କଳ୍ପନା ଛକ ତାରିଣୀ ବସ୍ତ୍ରାଳୟ ସାମ୍ନାରେ ଠେଲାକୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ଦୋକାନୀଙ୍କ ମୃତ୍ୟୁ ହୋଇଥିଲା ଏବଂ ଅନ୍ୟ ଜଣେ ଗୁରୁତର ଭାବେ ଆହତ ହୋଇଥିଲେ ।
ଏହା ମଧ୍ୟ ପଢ଼ନ୍ତ: କଟକରେ ଲଜ୍ଜା, ନାବାଳିକାଙ୍କୁ ଯୌନ ନିର୍ଯାତନା ଅଭିଯୋଗରେ ଜଣେ ଗିରଫ
ଏନେଇ ଘଟଣାସ୍ଥଳରେ ଉତ୍ତେଜନା ଦେଖିବାକୁ ମିଳିଥିଲା । ଖବର ପାଇ ପୋଲିସ ପହଞ୍ଚି ମୃତଦେହ ଉଦ୍ଧାର କରିବା ସହ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରିଛି । ଉତ୍ୟକ୍ତ ଲୋକେ କାରକୁ ଅଟକାଇ ପୋଲିସ ଜିମା ଦେଇଥିଲେ । ଦୁର୍ଘଟଣା ଘଟାଇଥିବା କାର ଜବତ କରି ପୋଲିସ ଥାନାକୁ ନେଇଛି।
ଇଟିଭି ଭାରତ, ଭୁବନେଶ୍ବର
