ଭୁବନେଶ୍ବର: କୋରୋନା ସଙ୍କଟ ମଧ୍ୟରେ ଋଣ ନେଇଥିବା ମହିଳାଙ୍କୁ ହଇରାଣ କରୁଥିବା ରାଜ୍ୟର ମାଇକ୍ରୋ ଫାଇନାନ୍ସ କମ୍ପାନୀଙ୍କ ପାଇଁ ଗାଇଡଲାଇନ ଜାରି କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅନୁରୋଧ କରିଛନ୍ତି କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ । ଏନେଇ ସେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି ।
ନିଜ ଚିଠିରେ କେନ୍ଦ୍ରମନ୍ତ୍ରୀ କହିଛନ୍ତି, ଋଣର କିସ୍ତି ସୁଝିବା ପାଇଁ କେନ୍ଦ୍ର ସରକାର 6 ମାସ ସମୟ ଦେଇଥିବା ସତ୍ବେ ରାଜ୍ୟର କେତେକ ମାଇକ୍ରୋ ଫାଇନାନ୍ସ କମ୍ପାନୀ ସେମାନଙ୍କ ନିର୍ଦ୍ଧାରିତ ସୁଦ୍ଧ ସମେତ ଦେଇଥିବା ଋଣ ଆଦାୟ କରୁଛନ୍ତି । ଏହି ମାଇକ୍ରୋ ଫାଇନାନ୍ସ କମ୍ପାନୀ ଋଣ ନେଇଥିବା ମହିଳାଙ୍କ ଉପରେ ଅତ୍ୟାଚାର କରୁଛନ୍ତି । ଏହା ଦ୍ବାରା କେତେକ ସ୍ଥାନରେ ସାମାଜିକ ଅଶାନ୍ତି, ଭୟ, ହିଂସା ଏବଂ କିଛି ସ୍ଥାନରେ ଆତ୍ମହତ୍ୟା ଭଳି ଘଟଣା ଦେଖିବାକୁ ମିଳୁଛି ।
ବର୍ତ୍ତମାନର ସଙ୍କଟ ସମୟରେ ଅନେକ ଲୋକ ନିଜ ଜୀବିକା ହରାଇଛନ୍ତି । ସେମାନେ ଏବେ ନିଜ ଋଣ କିସ୍ତି ସୁଝିବା ଭଳି ପରିସ୍ଥିତିରେ ନାହାନ୍ତି । ଏହି କମ୍ପାନୀଙ୍କ ଦ୍ବାରା ଋଣ ଆଦାୟ ପାଇଁ ଆପଣାଯାଉଥିବା ଉପାୟ ଅନେକ ସ୍ଥାନରେ ଚିନ୍ତାଜନକ ବିଷୟ ପାଲଟିଥିବା କେନ୍ଦ୍ରମନ୍ତ୍ରୀ କହିଛନ୍ତି । ତେବେ ଏହି ମାଇକ୍ରୋ ଫାଇନାନ୍ସ କମ୍ପାନୀ ଗୁଡିକୁ ଲଗାମ ଲଗାଇବା ପାଇଁ ନିର୍ଦ୍ଧିଷ୍ଚ ଗାଇଡଲାଇନ ଜାରି କରନ୍ତୁ ବୋଲି କେନ୍ଦ୍ରମନ୍ତ୍ରୀ ଅପିଲ କରିଛନ୍ତି ।
