ଭୁବନେଶ୍ବର: ଏଣିକି ଯୁକ୍ତ 2 ଛାତ୍ରଛାତ୍ରୀମାନେ ପ୍ରଥମ ବର୍ଷର 25 ପ୍ରତିଶତ ପାଠ ଦ୍ବିତୀୟ ବର୍ଷରେ ପରୀକ୍ଷା ଦେବେ । ଏଥିସହିତ ଶ୍ରେଣୀଗୃହରେ ଛାତ୍ରଛାତ୍ରୀଙ୍କ ଉପସ୍ଥାନ 75 ପ୍ରତିଶତ ରହିବା ନିୟମକୁ କଡାକଡି କରାଯିବ । ଛାତ୍ରଛାତ୍ରୀଙ୍କ ପାଠପଢାକୁ ନେଇ ବିଦ୍ୟାଳୟ ଓ ଗଣଶିକ୍ଷାମନ୍ତ୍ରୀ ମଙ୍ଗଳବାର ଆୟୋଜିତ ଏକ ଗୁରୁତ୍ବପୂର୍ଣ୍ଣ ବୈଠକରେ ଏହି ନିଷ୍ପତ୍ତି ନେଇଛନ୍ତି ।
ଯୁକ୍ତ 2 ପ୍ରଥମ ବର୍ଷରେ ପରୀକ୍ଷାର କିଛି ମୂଲ୍ୟ ନଥାଏ । ତେଣୁ ଦ୍ବିତୀୟ ବର୍ଷରେ ପ୍ରଥମ ବର୍ଷର ସିଲାବସରୁ 25 ପ୍ରତିଶତ ବିଷୟ ପରୀକ୍ଷାରେ ଆସିବ । ଯଦ୍ବାରା ଛାତ୍ରଛାତ୍ରୀମାନେ ଗୁରୁତ୍ବର ସହ ପ୍ରଥମ ବର୍ଷର ପାଠ ପଢିପାରିବେ । ତେବେ ଏହି ବୈଠକରେ ଆଲୋଚନା ହୋଇଥିବା ବିଷୟ ଗୁଡିକୁ ଏକାଡେମିକ୍ କାଉନସିଲକୁ ପଠାଯିବ । ସେମାନେ ନିର୍ଦ୍ଧାରିତ ଭାବରେ ଏହାକୁ ଧ୍ୟାନ ଦେବେ ବୋଲି ଆଶା କରିଛନ୍ତି ଗଣଶିକ୍ଷା ମନ୍ତ୍ରୀ । ଏନଏସଏସ ପାଇଁ କେନ୍ଦ୍ରକୁ ଚିଠି ମଧ୍ୟ ଲେଖାଯିବ । ଏହାସହିତ ବିଭିନ୍ନ ସମସ୍ୟା ସମ୍ପର୍କରେ କେନ୍ଦ୍ରକୁ ଜଣାଇବେ ବୋଲି ଗଣଶିକ୍ଷା ମନ୍ତ୍ରୀ ସମୀର ଦାସ କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
