ଭୁବନେଶ୍ବର: ଲୁଟେରାଙ୍କ ସହ ଲଢିଥିଲେ ସାହସୀ ସୁବ୍ରତ। ମା’ଙ୍କର ଚେନ ଝାମ୍ପି ନେଉଥିବା ବେଳେ କରିଥିଲେ ଉଦ୍ଧାର। ନିଜ ଜୀବନକୁ ବିପଦରେ ପକାଇ କରିଥିଲେ ଲୁଟେରାଙ୍କ ଧରିବାର ଚେଷ୍ଟା। 30 ମିଟର ପର୍ଯ୍ୟନ୍ତ ଲୁଟେରାଙ୍କ ସହ ଲଢିଥିଲେ ସାହସୀ ସୁବ୍ରତ । ଶେଷରେ ସୁବ୍ରତଙ୍କ ସଂଗ୍ରାମ ଆଗରେ ହାର ମାନିଥିଲେ ଲୁଟେରା ଓ ଧରା ପଡିବା ପରେ ଫେରାଇଥିଲେ ମା’ର ସୁନା ଚେନ।
ଘଟଣାସ୍ଥଳରେ ପୋଲିସ ପହଞ୍ଚି ଥିବାରୁ ସ୍ଥାନୀୟ ଲୋକଙ୍କ ସହ ମିଶି ଲୁଟେରାଙ୍କୁ ପୋଲିସ ଜିମା ଦେଇଥିଲେ ସୁବ୍ରତ। ସୂଚନା ଅନୁଯାୟୀ ଗତ 14 ତାରିଖରେ ରାଜଧାନୀର ମଞ୍ଚେଶ୍ବର ଥାନା ଅଧିନସ୍ଥ ଜିଜିପି କଲୋନୀର ଭାଗବତ ସନ୍ଧାନରେ ଘଟିଥିବା ଘଟଣା ଏବେ ପାଲଟିଛି ଚର୍ଚ୍ଚାର ବିଷୟ। ଯାହାକୁ ନେଇ ଯାଜପୁର ବାଲିଚନ୍ଦ୍ରପୁର ପାନଶୁଆପାଳର ସୁବ୍ରତ ଓଝାକୁ ସମ୍ମାନିତ କରିଛନ୍ତି ପୋଲିସ କମିଶନର।
କମିଶନରଙ୍କ ମୁଖ୍ୟାଳୟରେ ସ୍ବତନ୍ତ୍ର ଭାବେ ତାଙ୍କର ସାହସିକତାର ପ୍ରଶଂସା କରାଯିବା ସହ ବରିଷ୍ଠ ପୋଲିସ ଅଧିକାରୀଙ୍କ ଗହଣରେ ଦେଇଛନ୍ତି ସମ୍ମାନ। ଯାହାକୁ ନେଇ ଏଭଳି ସାହସିକତା ପାଇଁ ରାଜଧାନୀରେ ଲୁଟେରାଙ୍କ ମଧ୍ୟରେ ଭୟ ସୃଷ୍ଟି ହେବା ସହ ଲୁଟ ବା ଛିନତାଇ କରିବାକୁ ଭୟ କରିବେ ବୋଲି କହିଛନ୍ତି ପୋଲିସ କମିଶନର। ତେବେ ଦୁଇ ଲୁଟେରାଙ୍କୁ 15 ତାରିଖରେ କୋର୍ଟ ଚାଲାଣ କରିଥିଲା ପୋଲିସ । ଅନ୍ୟପଟେ ଆଉ ଜଣେ ଅଭିଯୁକ୍ତ ଏବେ ବି ଫେରାର ରହିଥିବା ଜଣା ପଡିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
