ଭୁବନେଶ୍ବର: ଆହୁରି କଡାକଡି ହେବ ଟ୍ରାଫିକ ନିୟମ । ଦୁର୍ଘଟଣା କମାଇବା ପାଇଁ ଏଭଳି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର। ଏଣିକି ବାଇକରେ ଆଗ ଓ ପଛରେ ବସୁଥିବା ବ୍ୟକ୍ତି ପାଇଁ ହେଲମେଟ ବାଧ୍ୟତାମୂଳକ କରାଯିବ । ଏହାସହ କାର ଚାଳକ ସହ ଅନ୍ୟ ସମସ୍ତ ଯାତ୍ରୀ ମଧ୍ୟ ସିଟ୍ ବେଲ୍ଟ ପିନ୍ଧିବା ପାଇଁ ବାଧ୍ୟତାମୂଳକ କରାଯାଇଛି । ଏନେଇ ମନ୍ତ୍ରୀ ପଦ୍ମନାଭ ବେହେରା ସୂଚନା ଦେଇଛନ୍ତି ।
ଗାଡି କାଗଜ ପତ୍ର ପାଇଁ ଦିଆଯାଇଥିବା ସମୟ ସୀମା ସରିବା ପରେ କଡାକଡି ଲାଗୁ ହେବ ମୋଟର ଯାନ ଆଇନ । ପ୍ରତି ୩୦ କିଲୋମିଟର ଭିତରେ ଥିବା ଗୁରୁତ୍ଵପୂର୍ଣ୍ଣ ରୋଡ ଗୁଡିକରେ ମୋବାଇଲ ସ୍ଵାର୍ଡ ଦ୍ବାରା ନିୟମିତ ଚେକିଂ କରାଯିବ। ଏଥିପାଇଁ କେନ୍ଦ୍ର ସରକାରଙ୍କୁ ଆର୍ଥିକ ସହାୟତା ମଗାଯାଇଛି । ଅଧିକ ଷ୍ଟାପ ନିୟୋଜିତ ସହ ଅଧିକ ଗାଡି କିଣିବା ପାଇଁ ଅର୍ଥର ଆବଶ୍ୟକ ରହିଛି ବୋଲି ମନ୍ତ୍ରୀ କହିଛନ୍ତି । ବର୍ଷେ ଭିତରେ ଦୁର୍ଘଟଣା ହାର ୨୦ ପ୍ରତିଶତ କମେଇବାକୁ ଲକ୍ଷ୍ୟ ରଖାଯାଇଥିବା କଥା ମନ୍ତ୍ରୀ ପଦ୍ମନାଭ ବେହେରା କହିଛନ୍ତି । ତେବେ ୩ ମାସ ସମୟକୁ ଆଉ ବର୍ଦ୍ଧିତ କରାଯିବ ନାହିଁ ବୋଲି ମନ୍ତ୍ରୀ ପ୍ରକାଶ କରିଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
