ଭୁବନେଶ୍ବର: ଓଡିଶାର କଳା, ସଂସ୍କୃତି ଓ ଐତିହ୍ୟରେ ଝଲସି ଉଠିବ ଭୁବନେଶ୍ବର ରାଜଧାନୀ ଏକ୍ସପ୍ରେସ । ଯାହା ସାରା ଭାରତରେ ଓଡ଼ିଶାର କଳା ଓ ସଂସ୍କୃତିକୁ ପ୍ରୋତ୍ସାହିତ କରିବା ସହ ପର୍ଯ୍ୟଟନର ସମ୍ଭାବ୍ୟ ବିକାଶକୁ ମଧ୍ୟ ବୃଦ୍ଧି କରିବା ଲକ୍ଷ୍ୟରେ ଏଭଳି ଡିଜାଇନ କରାଯାଇଛି । ରେଳ ବିଭାଗ ଓ ନାଲୋକର ମିଳିତ ଉଦ୍ୟମରେ ଏଭଳି ପଦକ୍ଷେପ ଗ୍ରହଣ କରାଯାଇଛି ।
ଓଡ଼ିଶାର ସଂସ୍କୃତି ଓ ପରମ୍ପରାରେ ଶୋଭା ପାଇବ ରାଜଧାନୀ ଏକ୍ସପ୍ରେସ । ଏହାଦ୍ବାରା ଓଡ଼ିଶା ପର୍ଯ୍ୟଟନସ୍ଥଳୀ ଓ ମନ୍ଦିରମାଳିନୀ ଆଦି ଜନସାଧାରଣଙ୍କ ପାଖରେ ପହଞ୍ଚାଇବାକୁ ଚେଷ୍ଟା କରାଯାଉଛି। ଏମିତିକି ପୂର୍ବରୁ ମଧ୍ୟ ଏକ ତୀର୍ଥ ଟ୍ରେନରେ ଓଡ଼ିଶାର ସଂସ୍କୃତିକୁ ଉପସ୍ଥାପନ କରାଯାଇଥିଲା। ଏପରି ଭବିଷ୍ୟତରେ ମଧ୍ୟ ଅନ୍ୟ ଏକ୍ସପ୍ରେସ ଗୁଡିକରେ କରାଯିବ ବୋଲି କୁହାଯାଉଛି ।
ପ୍ରତ୍ୟେକ ବଗିରେ ଓଡ଼ିଶାର ମନ୍ଦିର, ସଂସ୍କୃତି ଓ ବନ୍ୟପ୍ରାଣୀ ଆଦିକୁ ଉପସ୍ଥାପନା କରାଯାଇଛି। ଏହାଛଡା ଓଡ଼ିଶାର ଏକ ପଟ୍ଟଚିତ୍ରକୁ ମଧ୍ୟ ଟ୍ରେନରେ ସ୍ଥାନ ମିଳିଛି।ଯେତେବେଳେ ଟ୍ରେନଟି ଅନ୍ୟ ଷ୍ଟେସନମାନଙ୍କ ଦେଇ ଗତି କରିବ ଲୋକମାନେ ଓଡ଼ିଶାର ସଂସ୍କୃତି ଓ ଐତିହ୍ୟକୁ ଜାଣିପାରିବେ।
ଏହା ସାଧାରଣତଃ 3 ଟି ଥିମରେ ଆଧାରିତ ହୋଇଛି। ଓଡ଼ିଶାର ବିଭିନ୍ନ ନାଚଗୀତ, ଐତିହ୍ୟ ଓ ବନ୍ୟପ୍ରାଣୀଙ୍କୁ ରଖାଯାଇଛି। ଏହାକୁ ଅନେକ ଯାତ୍ରୀ ପସନ୍ଦ କରୁଥିବାବେଳେ ଆଗାମୀ ଦିନରେ ଅନ୍ୟ ସମସ୍ତ ଏକ୍ସପ୍ରେସ ଟ୍ରେନ ଗୁଡିକରେ ମଧ୍ୟ ଏଭଳି ଓଡ଼ିଶାର ସଂସ୍କୃତି ଐତିହ୍ୟକୁ ଉପସ୍ଥାପନା କରାଯିବ ବୋଲି କୁହାଯାଉଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
