ଭୁବନେଶ୍ବର: ନବରଙ୍ଗପୁରରେ ବିଜୁ ସେତୁ ଭୁଶୁଡି ଶ୍ରମିକଙ୍କ ମୃତ୍ୟୁ ଘଟଣାରେ ମୃତକଙ୍କ ପରିବାରକୁ କ୍ଷତିପୂରଣ ଦିଆନଯିବା ନେଇ ମୁଖ୍ୟ ଶାସନ ସଚିବଙ୍କୁ କାରଣ ଦର୍ଶାଅ ନୋଟିସ । ପୂର୍ବରୁ ମଧ୍ୟ ଜିଲ୍ଲାପାଳଙ୍କୁ ନୋଟିସ ଜାରି କରିଛି ଏନଏଚଆରସି । ମାନବିକ ଅଧିକାର କର୍ମୀ ଅଖଣ୍ଡଙ୍କ ଦ୍ବାରା ଏହି ମାମଲା ରୁଜୁ ହୋଇଥିଲା ।
ସୂଚନା ଅନୁସାରେ ୨୦୨୧ରେ ନବରଙ୍ଗପୁର ଉମରକୋଟରେ ନିର୍ମାଣାଧିନ ବିଜୁ ସେତୁ ଭୁଶୁଡି ଜଣଙ୍କର ମୃତ୍ୟୁ ହୋଇଥିବାବେଳେ ତିନି ଜଣ ଆହତ ହୋଇଥିଲେ । ସେତେବେଳେ ମୃତକଙ୍କ ପରିବାରକୁ ୫ ଲକ୍ଷ ଓ ଆହତଙ୍କୁ ୧ ଲକ୍ଷ ଟଙ୍କା କ୍ଷତିପୂରଣ ଦେବାପାଇଁ ଦାବି ହୋଇଥିଲେ ମଧ୍ୟ ଦିଆଯାଇ ନଥିଲା । ଏହି ଘଟଣାରେ ରାଜ୍ୟ ସରକାରକୁ ଦାୟୀ କରିଛନ୍ତି ମାନବିକ ଅଧିକାର କମିଶନ । ନିମ୍ନମାନର କାମ ଓ ଶ୍ରମିକମାନଙ୍କ ପାଇଁ ନିରାପତ୍ତା ବ୍ୟବସ୍ଥା ନଥିବାରୁ ଏଭଳି ଘଟିଥିବା ଅଖଣ୍ଡ ଅଭିଯୋଗ କରିଛନ୍ତି । ସରକାରଙ୍କ ପକ୍ଷରୁ ଦାଖଲ ହୋଇଥିବା ରିପୋର୍ଟରେ ମଧ୍ୟ ଅବହେଳା ସ୍ବୀକାର କରାଯାଇଥିବା ସୂଚନା ମିଳିଛି । ସେହିପରି ମୃତକଙ୍କ ପରିବାରର ଥଇଥାନ ଲାଗି ଜିଲ୍ଲାପାଳ ବ୍ୟକ୍ତିଗତ ଭାବେ ପଦକ୍ଷେପ ନେବାକୁ ମଧ୍ୟ କମିଶନ ତାଙ୍କ ନିର୍ଦ୍ଦେଶରେ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
