ଭୁବନେଶ୍ବର: ଆଲୋକମୟ ଏକାମ୍ର କ୍ଷେତ୍ର । ଲିଙ୍ଗରାଜ ମନ୍ଦିର ପାଇଁ ସ୍ବତନ୍ତ୍ର ଆଇନ ଉପରେ ମୋହର ଲାଗିବା ପରେ ମନ୍ଦିର ସମ୍ମୁଖରେ ସମୂହ ଦୀପଦାନ ଉତ୍ସବ ପାଳିତ ହୋଇଛି । ମନ୍ଦିର ପରିସରରେ ଝୋଟି ପକାଇ ମହାଦେବଙ୍କ ପାଇଁ ପ୍ରାୟ ୧୦ ହଜାର ଦୀପ ଦାନ ହୋଇଛି । ଏହାସହ ମୁଖ୍ୟମନ୍ତ୍ରୀଙ୍କ ଏଭଲି ନିଷ୍ପତ୍ତିକୁ ସ୍ବାଗତ କରିଛନ୍ତି ସେବାୟତ ଓ ସ୍ଥାନୀୟ ବାସିନ୍ଦା ।
ଏହି ଦୀପଦାନ ଉତ୍ସବରେ ଆଇନ ମନ୍ତ୍ରୀ ପ୍ରତାପ ଜେନା, ମନ୍ତ୍ରୀ ଅଶୋକ ପଣ୍ଡା, ଭୁବନେଶ୍ବର ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ଭୁବନେଶ୍ବର ଉତ୍ତର ବିଧାୟକ ସୁଶାନ୍ତ ରାଉତଙ୍କ ସହ ମନ୍ଦିର ସେବାୟତ, ଦେବୋତ୍ତର ବିଭାଗ ଓ ସ୍ଥାନୀୟ ବାସିନ୍ଦା ସାମିଲ ହୋଇଥିଲେ । ସ୍ବତନ୍ତ୍ର ଆଇନ ଆସିବା ପରେ, ମନ୍ଦିର ପରିଚାଳନା କମିଟି ଗଠନ, କମିଟିର ସଭ୍ୟ ସଂଖ୍ୟା, କମିଟିର ଦାୟିତ୍ବ, ପରିଚାଳକଙ୍କ ଦାୟିତ୍ବ ଓ କ୍ଷମତା, ମନ୍ଦିରର ସ୍ଥାବର ଓ ଅସ୍ଥାବର ସମ୍ପତିର ସୁରକ୍ଷା, ସେବକଙ୍କ ଭୂମିକା, ମନ୍ଦିର ପାଣ୍ଠି ଗଠନ ଇତ୍ୟାଦି ଅଧିନିୟମ ଅନୁଯାୟୀ ହେବ ।
କ୍ୟାବିନେଟରେ ଲିଙ୍ଗରାଜ ମନ୍ଦିରକୁ ନେଇ ପାରିତ ହୋଇଥିବା ସ୍ଵତନ୍ତ୍ର ଅଧିନିୟମ ଅନୁଯାୟୀ ଏଣିକି ଶ୍ରୀମନ୍ଦିର ଢାଞ୍ଚାରେ ପରିଚାଳିତ ହେବ ଲିଙ୍ଗରାଜ ମନ୍ଦିର । ସରକାରଙ୍କ ନିଷ୍ପତ୍ତି ଅନୁଯାୟୀ ସ୍ବତନ୍ତ୍ର ଆଇନ ବଳରେ ଗଢ଼ାଯିବ ଲିଙ୍ଗରାଜ ମନ୍ଦିର ପରିଚାଳନା କମିଟି ।
ଗତ ଡିସେମ୍ବର ୨ ତାରିଖରେ ମୁଖ୍ୟମନ୍ତ୍ରୀ ଲିଙ୍ଗରାଜ ମନ୍ଦିର ସୌନ୍ଦର୍ଯ୍ୟକରଣ କାର୍ଯ୍ୟ ତଦାରଖ କରିବାକୁ ପହଞ୍ଚିଥିଲେ । ମୁଖ୍ୟମନ୍ତ୍ରୀ ସେବାୟତମାନଙ୍କ ସହ ଆଲୋଚନା ସମୟରେ ପୁରୀ ଶ୍ରୀମନ୍ଦିର ଭଳି ଲିଙ୍ଗରାଜ ମନ୍ଦିର ପାଇଁ ଏକ ସ୍ବତନ୍ତ୍ର ଆଇନ ଆସିବ ବୋଲି ସୂଚନା ଦେଇଥିଲେ । ତେବେ ଆଜି (ସୋମବାର) ନୂଆ ନିୟମ ଉପରେ କ୍ୟାବିନେଟ ମୋହର ଲାଗିଛି ।
ଭୁବନେଶ୍ବରରୁ ସଞ୍ଜିବ କୁମାର ରାୟ, ଇଟିଭି ଭାରତ
