ଭୁବନେଶ୍ବର: ଖୋର୍ଦ୍ଧା ଗଡ଼ ନିଆଳ ଗ୍ରାମ୍ୟ ଜଙ୍ଗଲରୁ ଉଦ୍ଧାର ହୋଇଥିବା ଅଜଗର ଅଣ୍ଡା ମଧ୍ୟରୁ 2 ଟି ଅଣ୍ଡାର ଆଜି ଏକ୍ସରେ କରାଯାଇଛି । ଓୟୁଏଟି ବନ୍ଦ ଥିବାରୁ ଭୁବନେଶ୍ବରର ଏକ ଘରୋଇ ଡାଇଗୋନଷ୍ଟିକ କେନ୍ଦ୍ରରେ ଅଣ୍ଡାର ଏକ୍ସରେ କରାଯାଇଛି । ଏକ୍ସରେରୁ ନରମ ସାପ ଅଣ୍ଡାର ଖୋଳ ଭିତରେ ଛୁଆର ମେରୁଦଣ୍ଡ ହାଲକା ଭାବରେ ଦୃଶ୍ୟମାନ ହେଉଛି ।
ହଳଦିଆ ରେଞ୍ଜ କାର୍ଯ୍ୟାଳୟରେ ସୁରକ୍ଷିତ ଭାବେ ରଖାଯାଇଥିବା ଅଣ୍ଡା ଭିତରେ ଛୁଆଙ୍କ ଶରୀର କେତେ ବିକଶିତ ହୋଇଛି ତାହା ଜାଣିବା ପାଇଁ ସ୍ନେକ ହେଲ୍ପ ଲାଇନର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ଚନ୍ଦକା ଡ଼ିଏଫଓଙ୍କୁ ପରାମର୍ଶ ଦେଇଥିଲେ । ଚନ୍ଦକା ଡ଼ିଏଫଓ କେଦାର ସ୍ବାଇଁଙ୍କ ନିର୍ଦ୍ଦେଶରେ ହଳଦିଆ ରେଞ୍ଜର ଫରେଷ୍ଟର ସୁବାସ ବେହେରା ଆଜି 2 ଟି ଅଣ୍ଡାକୁ ଆଣି ଭୁବନେଶ୍ବରରେ ଏକ୍ସରେ କରାଇଛନ୍ତି । ସ୍ନେକ ହେଲ୍ପ ଲାଇନ ସଦସ୍ୟ ଆଶିଷ ବେହେରା ଏବଂ ସିଲକା ସେଲୋନୀ ଏକ୍ସରେ ଏବଂ ଅଣ୍ଡାର ଯତ୍ନ ନେବା କାମରେ ହଳଦିଆ ରେଞ୍ଜ କର୍ମଚାରୀଙ୍କୁ ସହାୟତା କରିଛନ୍ତି । ଉଦ୍ଧାର ହୋଇଥିବା ଅଜଗର ସାପଟିକୁ ଚନ୍ଦକା ଅଭୟାରଣ୍ୟରେ ଛାଡି ଦିଆଯାଇଥିବାବେଳେ ଅଣ୍ଡାଗୁଡିକୁ ପ୍ରଥମେ ନିଆଳ ସ୍କୁଲ ଏବଂ ପରେ ହଳଦିଆ ରେଞ୍ଜ ଅଫିସରେ ଫୁଟେଇବା ପାଇଁ ରଖାଯାଇଛି ।
ସ୍ନେକ ହେଲ୍ପ ଲାଇନର ପ୍ରତ୍ୟକ୍ଷ ତତ୍ବାବଧାନରେ ଏହି କାମ ଚାଲିଛି । ସେହିପରି 2016 ମସିହାରେ ସମ୍ବଲପୁର ରେଢ଼ାଖୋଲରେ ଏକ ଅନୁରୂପ ଘଟଣା କ୍ରମରେ ଶୁଭେନ୍ଦୁ ମଲ୍ଲିକ ଭୁବନେଶ୍ବରରୁ ରେଢ଼ାଖୋଲ ଯାଇ 28 ଅଣ୍ଡାରୁ 22 ଟି ଛୁଆଙ୍କୁ କୃତ୍ରିମ ଉପାୟରେ ଫୁଟେଇବାରେ ସଫଳ ହୋଇଥିଲେ ।
ଭୁବନେଶ୍ବରରୁ ଭବାନୀଶଙ୍କର ଦାସ,ଇଟିଭି ଭାରତ
