ଭୁବନେଶ୍ବର: ରାଜ୍ୟରେ ହଜାର ହଜାର ସଂଖ୍ୟାରେ ସିଟି, ବିଇଡି ପ୍ରଶିକ୍ଷିତ ଯୁବକ, ଯୁବତୀ ରହିଛନ୍ତି । ଯେଉଁମାନଙ୍କୁ ସରକାର ନିଯୁକ୍ତି ପ୍ରଦାନ ନକରି ଅଣଦେଖା କରିଛନ୍ତି । ଫଳରେ ସେମାନେ ବେକାର ହୋଇ ବସିରହିବା ସହିତ ମାନସିକ ଭାରସାମ୍ୟ ହରାଇ ଆତ୍ମହତ୍ୟାର ପଥକୁ ବାଛି ନେଉଛନ୍ତି ।
ସରକାର ସେମାନଙ୍କ ଦୁଃଖ ବୁଝିବା ସହ ଏହି ପ୍ରଶିକ୍ଷିତ ଯୁବକ ଯୁବତୀମାନଙ୍କୁ ରାଜ୍ୟର ସରକାରୀ ବିଦ୍ୟାଳୟମାନଙ୍କରେ କନିଷ୍ଠ ଶିକ୍ଷକ ଭାବେ ନିଯୁକ୍ତି ଦେବାକୁ ଦାବି କରି ଓଡିଶା କନିଷ୍ଠ ଶିକ୍ଷକ ଆଶାୟୀ ସଙ୍ଘର ସଦସ୍ୟମାନେ ରାଜଧାନୀର ଗାନ୍ଧୀ ମାର୍ଗରେ ଧାରଣାରେ ବସିଛନ୍ତି ।
ଅନେକ ଥର ସେମାନେ ସରକାରଙ୍କ ନିକଟରେ ନିଜର ଦାବି ଉପସ୍ଥାପିତ କରିଥିଲେ ସୁଦ୍ଧା ବିଭାଗୀୟ ଅଧିକାରୀମାନେ ସେମାନଙ୍କୁ କେବଳ ସମୟ ଗଡାଇ ଭଣ୍ଡାଇ ଚାଲୁଥିବା ଏହି ସଙ୍ଘର ସଭାପତି ଧନଞ୍ଜୟ ଜେନା କହିଛନ୍ତି ।
ତେବେ ବିଧାନସଭାର ବଜେଟ ଅଧିବେଶନ ଆରମ୍ଭ ହେଉଥିବାରୁ ଶେଷଥର ପାଇଁ ସଙ୍ଘ ନିଜ ଦାବି ଉପସ୍ଥାପିତ କରିବା ପାଇଁ ଚେଷ୍ଟାକରିବ ବୋଲି ସେ କହିଛନ୍ତି । ନଚେତ ସାମୂହିକ ଭାବେ ସଙ୍ଘର ସଦସ୍ୟମାନେ ଏହି ଗାନ୍ଧିମାର୍ଗରେ ଆତ୍ମଦାହ କରିବେ ବୋଲି ସେମାନେ ସରକାରଙ୍କୁ ଚେତାବନୀ ଦେଇଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
