ଭୁବନେଶ୍ବର: ବିଗତ 2 ଦଶନ୍ଧି ଧରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ଅନେକ ଯୁଗାନ୍ତକାରୀ ପରିବର୍ତ୍ତନ ଆଣିଛନ୍ତି । କପଡା ଓ ପୋଷାକ ଶିଳ୍ପ ପାଇଁ ବହୁ ସଂଖ୍ୟାରେ ଗୁଣବତ୍ତା ସମ୍ପନ୍ନ କୁଶଳୀ ଦକ୍ଷ ମାନବ ସମ୍ବଳ କାର୍ଯ୍ୟାବଳୀ ଓଡିଶାରେ ଉପଲବ୍ଧ ବୋଲି ଶିଳ୍ପ, ଶକ୍ତି, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ, ଶିଳ୍ପ ଗୃହମନ୍ତ୍ରୀ କ୍ୟାପଟେନ ଦିବ୍ୟ ଶଙ୍କର ମିଶ୍ର ମତବ୍ୟକ୍ତ କରିଛନ୍ତି। ବେଙ୍ଗାଲୁରୁସ୍ଥିତ ତାଜ ୱେଷ୍ଟ ଏଣ୍ଡ ହୋଟେଲଠାରେ ଓଡ଼ିଶା ରାଜ୍ୟ ପ୍ରତିନିଧି ମଣ୍ଡଳଗଣଙ୍କ ଦ୍ବାରା ଆୟୋଜିତ ‘ଓଡ଼ିଶାରେ କପଡ଼ା ଓ ପୋଷାକ’ ବୈଠକ ମନ୍ତ୍ରୀ କ୍ୟାପଟେନ ମିଶ୍ର ଉଦଘାଟନ କରିଥିଲେ । ରାଜ୍ୟର ଏକ ସକ୍ରିୟ ସ୍ଥିତି, ପାରଦର୍ଶୀ ଶାସନ ବ୍ୟବସ୍ଥା, ଶିଳ୍ପ ଅନୁକୂଳ ବାତାବରଣ ରହିଲେ ଦେଶର ଅନ୍ୟ ରାଜ୍ୟଠାରୁ ଓଡ଼ିଶାରେ କମ ପୁଞ୍ଜି ବିନିଯୋଗ କରି ବାଣିଜ୍ୟ ବ୍ୟାପାର କରିବା ସହଜସାଧ୍ୟ ।
ଓଡ଼ିଶାରେ ଶିଳ୍ପ ପ୍ରତିଷ୍ଠା ଦିଗରେ ସକରାତ୍ମକ ବାତାବରଣ ରହିଥିବା ସ୍ଥଳେ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ପ୍ରକାର ସୁବିଧା ସୁଯୋଗ ପୂର୍ଣ୍ଣ ମାତ୍ରାରେ ରହିଥିବା ଉଲ୍ଲେଖ କରି ପୁଞ୍ଜି ନିବେଶକାରୀଙ୍କୁ ମନ୍ତ୍ରୀ ଓଡ଼ିଶାରେ ନିବେଶ ପାଇଁ ନିମନ୍ତ୍ରଣ କରିଥିଲେ। ଓଡ଼ିଶାରେ କପଡ଼ା ଓ ପୋଷାକ କ୍ଷେତ୍ରରେ ରହିଥିବା ସୁବିଧା ସୁଯୋଗର ବିନିଯୋଗ ହୋଇ କିପରି ଶିଳ୍ପ କ୍ଷେତ୍ରରେ ବିକାଶ ହୋଇପାରିବ ସେନେଇ ଶିଳ୍ପୋଦ୍ୟୋଗୀମାନଙ୍କ ଦୃଷ୍ଟି ଆକର୍ଷଣ କରିଥିଲେ।
ପ୍ରତିନିଧିମଣ୍ଡଳ ରାଜ୍ୟରେ ଖାଦ୍ୟ ପ୍ରକ୍ରିୟାକରଣ, ଅଟୋ, ପରିଧାନ, ଧାତୁ, ପ୍ଲାଷ୍ଟିକ ଓ ପେଟ୍ରୋ ରସାୟନ, ଏୟାର ସ୍ପେସ ଓ ସୁରକ୍ଷା ଆଦି ସହିତ ବିଭିନ୍ନ କ୍ଷେତ୍ରରେ ୨୦ଟି କମ୍ପାନୀ ସହିତ ରାଜ୍ୟ ପ୍ରତିନିଧୀମଣ୍ଡଳଙ୍କ ପ୍ରତ୍ୟକ୍ଷ ଆଲୋଚନା ହୋଇଥିଲା । ବ୍ୟାପାର ବାଣିଜ୍ୟ ପାଇଁ ରାଜ୍ୟରେ ରହିଥିବା ସୁବିଧାଗୁଡ଼ିକ ସମ୍ପର୍କରେ ତଥ୍ୟ ଉପସ୍ଥାପନ କରି ମତ ବିନିମୟ କରିଥିଲେ ।
କମ୍ପାନୀମାନଙ୍କ ସକାଶେ ରାଜ୍ୟରେ ପ୍ରଦାନ କରାଯାଉଥିବା ନୀତିଗତ ଢାଞ୍ଚା ଓ ଅବସର ତଥ୍ୟଗୁଡ଼ିକ ପ୍ରତିନିଧିମଣ୍ଡଳ ଉପସ୍ଥାପନ କରିଥିଲେ। ଚଳିତ ବର୍ଷ ନଭେମ୍ବର ମାସ ୩୦ ତାରିଖ ଠାରୁ ଡିସେମ୍ବର ୪ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବା ମେକ୍-ଇନ୍-ଓଡ଼ିଶା କନ୍କ୍ଲେଭ-୨୦୨୦ ସମ୍ପର୍କିତ ବିସ୍ତୃତ ବିବରଣୀ ଉପସ୍ଥିତ ଶିଳ୍ପପତିମାନଙ୍କୁ ଅବଗତ କରାଯାଇଥିଲା। ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ, ଶିଳ୍ପ ତଥା ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗୀୟ ପ୍ରମୁଖ ଶାସନ ସଚିବ ହେମନ୍ତ ଶର୍ମା, ଦକ୍ଷତା ବିକାଶ, ବୈଷୟିକ ଶିକ୍ଷା ଓ ସୂଚନା ଓ ଲୋକସମ୍ପର୍କ ବିଭାଗୀୟ କମିଶନର ତଥା ଶାସନ ସଚିବ ସଂଜୟ କୁମାର ସିଂହ, ଇପିକଲ ପରିଚାଳନା ନିର୍ଦ୍ଦେଶକ ନୀତିନ ଜାୱାଲେ ପ୍ରତିନିଧିମଣ୍ଡଳ ଭାବେ ଯୋଗଦାନ କରିଥିଲେ ।
ଏହି ବୈଠକରେ ୨୫ରୁ ଉର୍ଦ୍ଧ୍ବ କମ୍ପାନୀ ଅଂଶ ଗ୍ରହଣ କରିଥିଲେ । ଆଦିତ୍ୟ ବିର୍ଲା ଫ୍ୟାଶନ, ସାହି ଏକ୍ସପୋର୍ଟ ଓ ପେଜ ଇଣ୍ଡଷ୍ଟ୍ରୀ ପ୍ରତିନିଧିଗଣ ଓଡିଶାରେ ପୁଞ୍ଜି ନିବେଶ ଦିଗରେ ନିଜର ଅନୁଭୂତି ଓ ଆଭିମୁଖ୍ୟ ସମ୍ପର୍କରେ ସଂପୂର୍ଣ୍ଣ ତଥ୍ୟ ଉପସ୍ଥାପନ କରିଥିଲେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
