ଭୁବନେଶ୍ବର: ରାଜଧାନୀରେ ବ୍ୟାପିବାରେ ଲାଗିଛି ମୋବାଇଲ ଚୋରି ରାକେଟର ଜାଲ । ହେଲେ ଏହି ରାକେଟରେ ମୋବାଇଲ ବିକ୍ରି ବେଳେ ଶୁକ୍ରବାର ଧରା ପଡିଛି ରାକେଟର କିଙ୍ଗପିନ । ବରମୁଣ୍ଡାରେ ଏମିତି ଏକ ଡିଲ ସମୟରେ ଜଣେ ଅଭିଯୁକ୍ତକୁ ଗିରଫ କରିଛି ଖଣ୍ଡଗିରି ଥାନା ପୋଲିସ । ଅଭିଯୁକ୍ତ ଜଣକ ହେଉଛି ପୁରୀ ଟାଉନ ନୂଆପାଟଣା ସାହିର ଦୀପକ ମହାନ୍ତି ।
ସୂଚନା ଅନୁଯାୟୀ ଯୋଜନାବଦ୍ଧ ଭାବେ ଏହି ମୋବାଇଲ ରାକେଟର ମାଷ୍ଟରମାଇଣ୍ଡକୁ ଧରିବା ପାଇଁ ଖଣ୍ଡଗିରି ଥାନା ପୋଲିସ ଚେଷ୍ଟା କରିଥିଲା । ହେଲେ ଜଣଙ୍କୁ ଗିରଫ କରିବା ବେଳେ ଅନ୍ୟମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ । ତେବେ ଗିରଫ ଅଭିଯୁକ୍ତ ପାଖରୁ 5ଟି ମୋବାଇଲ ଜବତ କରିବା ସହ ରାକେଟରେ ବ୍ୟବହୃତ ଏକ ଚୋରା ମୋବାଇଲ ଗୋଦାମର ସୁରାକ ପାଇଛି ପୋଲିସ ।
ଏହି ଗୋଦାମରେ ଏକ ସ୍ବତନ୍ତ୍ର ଟେକନିକରେ ବଜାରକୁ ମୋବାଇଲ ଛଡାଯାଉଥିବା ଜଣା ପଡିଛି । ଯେଉଁଥିରେ ସହରରେ ମାତ୍ର 1000 ଟଙ୍କାରେ ଲୋକେ ଆଇଫୋନଠାରୁ ଆରମ୍ଭ କରି ବିଭିନ୍ନ ଦାମୀ କମ୍ପାନୀର ମୋବାଇଲ ଫୋନ କିଣିପାରୁଛନ୍ତି । ଯାହାକୁ କେତେକ ଲୋକେ ଅନୈତିକ ଓ ଅସାଧୁ କାର୍ଯ୍ୟରେ ମଧ୍ୟ ବ୍ୟବହାର କରୁଥିବା ଜଣା ପଡିଛି । ଫଳରେ ଲାଭ ପାଉଛନ୍ତି ମୋବାଇଲ ଚୋର ।
ତେଣେ କମ ଦାମରେ ଫୋନ ପାଇ ଯୁବବର୍ଗ ମଧ୍ୟ ଖୁସ । ଫଳରେ ମୋବାଇଲ ଚୋରି ହେଲେ ମିସିଂ ରିପୋର୍ଟ ଦେଇ ଚୁପ ବସିଯାଉଛନ୍ତି ଲୋକେ । ସେପଟେ କିଛି ହାତ ଟେକି ବସିଯାଉଛନ୍ତି ପୋଲିସ ବାବୁ । ହେଲେ ଏସବୁ ପଛରେ ଥିବା ବଡ ଧରଣର ଚୋରି ରାକେଟର ଟେର ବି ପାଉନି କୁଇକ ଆକ୍ସନ ଟିମ୍ ଓ ସ୍ପେଶାଲ ସ୍କ୍ବାର୍ଡ । ତେବେ ଏହି ନୂଆ ଟ୍ରେଣ୍ଡରେ ବ୍ୟବହୃତ ରାକେଟର ସୁରାକ ଖଣ୍ଡଗିରି ପୋଲିସ ହାତରେ ଲାଗିଥିବା ବେଳେ ଖୁବଶୀଘ୍ର ଏହାର ପର୍ଦ୍ଦାଫାସ ହେବ ବୋଲି ସୂଚନା ମିଳିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
