ଭୁବନେଶ୍ବର: ପ୍ରଖ୍ୟାତ ସାହିତ୍ୟିକ କଥା ସାରସ୍ବତ ସାଧକ ପଦ୍ମଭୂଷଣ ମନୋଜ ଦାସଙ୍କ ବିୟୋଗରେ ସ୍ତବ୍ଦ ହୋଇଯାଇଛି ଓଡିଆ ସାହିତ୍ୟିକ ମହଲ । ତେବେ ଶ୍ରୀ ଦାସଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି ଅନେକ ସାହିତ୍ୟିକ, ପାଠକ ଓ ବୁଦ୍ଧିଜୀବୀ ।
ମନୋଜ ଦାସ ନିଜ ସାରସ୍ବତ ସାହିତ୍ୟ ସାଧନା ପାଇଁ ଦେଶ ବିଦେଶରେ ସାଉଁଟିଥିଲେ ଅଜସ୍ର ସମ୍ମାନ ଓ ବହୁମୁଖି ପ୍ରତିଭାର ପରିଚୟ । ୨୦୦୦ ମସିହାରେ ସେ ସମ୍ମାନଜନକ ସରସ୍ବତୀ ସମ୍ମାନ , ୨୦୦୧ରେ ପଦ୍ମଶ୍ରୀ ଓ ୨୦୨୦ ମସିହାରେ ପଦ୍ମଭୂଷଣ ଉପାଧି ପାଇଥିଲେ । ସେହିପରି ସେ କେନ୍ଦ୍ର ଓ ରାଜ୍ୟ ସାହିତ୍ୟ ଏକାଡେମୀ ପୁରସ୍କାର ସହ ଫେଲୋସିପ ମଧ୍ୟ ପାଇଥିଲେ । ତାଙ୍କର ବିଶିଷ୍ଟ କାଳଜୟୀ ସାହିତ୍ୟକୃତି ମଧ୍ୟରେ ପ୍ରମୁଖ ହେଲା ତନ୍ଦ୍ରାଲୋକର ପ୍ରହରୀ, ଆକାଶର ଇସାରା, ଉପକଥା ଶତକ, ଆବୁପୁରୁଷ, ଶେଷ ବସନ୍ତର ଚିଠି, ଆରଣ୍ୟକ, ଲକ୍ଷ୍ମୀର ଅଭିସାର ପ୍ରମୁଖ ।
ସାହିତ୍ୟ ସାଧନା ସହ ସେ ପୁଡୁଚେରୀରେ ଶ୍ରୀ ଅରବିନ୍ଦ ଆଶ୍ରମ ସହ ଜଡିତ ହୋଇ ରହିଥିଲେ । ଶ୍ରୀ ଅରବିନ୍ଦ ଆନ୍ତର୍ଜାତିକ ବିଶ୍ବ ବିଦ୍ୟାଳୟରେ ମନୋଜ ଦାସ ଇଂରାଜୀ ସାହିତ୍ୟ ଓ ଶ୍ରୀ ଅରବିନ୍ଦ ଦର୍ଶନରେ ଶିକ୍ଷାଦାନ ମଧ୍ୟ କରିଥଲେ । ତେଣୁ ସେ ଚେତନା ସ୍ବରୂପି ଅରବିନ୍ଦ ଥିଲେ ବୋଲି କହିଛନ୍ତି ସାହିତ୍ୟିକ ଅଧ୍ୟାପକ ବିଶ୍ବରଂଜନ । ସେହିପରି ମନୋଜ ଦାସଙ୍କୁ ରୁଷି ବୋଲି ସମ୍ବୋଧନ କରିଛନ୍ତି ସାହିତ୍ୟିକ ରାମନାଥ ରଥ। ସେହିପରି ସାହିତ୍ୟିକ ତରୁଣକାନ୍ତି ମିଶ୍ର କହିଛନ୍ତି ଯେ ସେ ସାହିତ୍ୟର ଜଣେ ଅନନ୍ୟ ସାଧକ ତାଙ୍କର ଅବର୍ତ୍ତମାନରେ ବିକଳ୍ପ ନାହିଁ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
