ଭୁବନେଶ୍ବର: ଦେଶ ତଥା ରାଜ୍ୟର ବିଭିନ୍ନ ସ୍ଥାନରେ ଗଣଦୁଷ୍କର୍ମ ଓ ହତ୍ୟା ଘଟଣାକୁ ନେଇ ଉଦବେଗ ପ୍ରକାଶ ପାଉଛି । ସଡକ ଠାରୁ ସଂସଦ ସବୁଠି ଏହା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଏମିତି ଏକ ଜଟିଳ ପରିସ୍ଥିତିରେ ସୋସିଆଲ ମିଡିଆ ଫେସବୁକ୍ ଓ ହ୍ବାଟସଆପ୍ରେ ଜୋରଦାର ଭାଇରାଲ ହେଉଛି ଏକ ମେସେଜ । ଯେଉଁଥିରେ ଉଲ୍ଲେଖ ରହିଛି ଯେ, ଆପଣ ଯଦି ଅସୁବିଧାରେ ପଡ଼ିଛନ୍ତି, ତାହାହେଲେ ଉକ୍ତ ନମ୍ବରରେ ଯୋଗାଯୋଗ କରନ୍ତୁ । ଆମେ ତମକୁ ସାହାଯ୍ୟ କରିବୁ ।
ତେବେ ଏହି ମେସେଜକୁ ନେଇ ଆପତ୍ତି ଉଠାଇଛି କମିଶନରେଟ ପୋଲିସ । ଏଭଳି ମେସେଜ ଠାରୁ ଦୂରରେ ରହିବା ସହ ଏହାକୁ ବିଶ୍ବାସ ନକରିବାକୁ କମିଶନରେ ପୋଲିସ ପକ୍ଷରୁ ବାରଣ କରାଯାଇଛି । ଏଥିସହିତ ସୋସିଆଲ ମିଡିଆରେ ସହାୟତାର ହାତ ବଢାଉଥିବା ଲୋକଙ୍କ ପ୍ରତି ସାବଧାନ ରହିବାକୁ ପୋଲିସ ଉପଦେଶ ଦେଇଛି । ଯେଉଁମାନେ ଅସୁବିଧାରେ ପଡୁଛନ୍ତି ସେମାନେ ୧୦୦ ନମ୍ବରରେ ଡାଏଲ କରି ସହାୟତା ନିଅନ୍ତୁ । ଆଉ ଏଭଳି ଗୁଜବ ସୃଷ୍ଟିକାରୀଙ୍କ ଉପରେ ତୀକ୍ଷଣ୍ ନଜର ରଖାଯାଇଛି ବୋଲି କମିଶନରେଟ ପୋଲିସ ପକ୍ଷରୁ ସତର୍କ ସୂଚନା ଜାରି କରାଯାଇଛି ।
ସୂଚନାନୁସାରେ, ମହିଳାଙ୍କୁ ସହାୟତା ଦେବା ପାଇଁ ସୋସିଆଲ ମିଡିଆରେ ଘୁରି ବୁଲୁଛି ବିଭିନ୍ନ ବ୍ୟକ୍ତିଙ୍କ ନମ୍ବର । ରାତିରେ ଅସୁବିଧାରେ ପଡ଼ିଲେ ସେହି ମୋବାଇଲ ନମ୍ବରରେ ଫୋନ୍ କରିବାକୁ ଉପଦେଶ ଦିଆଯାଉଛି । ତେଣୁ ଏଭଳି ମେସେଜ ପ୍ରତି ସାବଧାନ ରହି ପୋଲିସର ସହାୟତା ନିଅନ୍ତୁ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
