ଭୁବନେଶ୍ବର: ଅତି ଭୟଙ୍କର ରୂପରେ ଓଡିଶା ମୁହାଁ ହେବାରେ ଲାଗିଛି ୟସ୍ । ଆଉ କିଛି ଘଣ୍ଟା ମଧ୍ୟରେ ରାଜ୍ୟରେ ରଚିବାକୁ ଯାଉଛି ତାଣ୍ଡବ । ଅତି ଭୟଙ୍କର ରୂପ ଧାରଣ କରିବ ବୋଲି ଆକଳନ କରିଛନ୍ତି ପାଣିପାଗ ବେଶଷଜ୍ଞ । ବୁଧବାର ସକାଳ 7ଟା ସୁଦ୍ଧା ଏହା ଧାମରାରୁ 40 କିଲୋମିଟର ଦୂରରେ ରହିଥିବା ବେଳେ ସକାଳ 10ଟାରୁ 11ଟା ମଧ୍ୟରେ ଧାମରାରୁ ବାଲେଶ୍ବର ମଧ୍ୟରେ ଛୁଇଁବ ସ୍ଥଳଭାଗ ।
ଭୀଷଣ ରୂପ ଧରି ଆଗଉଥିବା ବାତ୍ୟା ୟସ୍ ବର୍ତ୍ତମାନ ବାଲେଶ୍ବର ଓ ପଶ୍ଚିମବଙ୍ଗର ଦୀଘାଠାରୁ 90କିଲୋମିଟର ଦୂରରେ ରହିଛି । ତେବେ ଏବେ ବାତ୍ୟାର ଗତିକୁ ଲକ୍ଷ୍ୟ କରି ଲ୍ୟାଣ୍ଡଫଲରେ ବିଳମ୍ବ ହେବା ସହିତ ପବନର ବେଗ କମିବ ବୋଲି ପାଣିପାଗ ବିଭାଗ ଆକଳନ କରିଛି । ଲ୍ୟାଣ୍ଡଫଲ ସମୟରେ ପବନର ବେଗ 130ରୁ 155 କିଲୋମିଟର ରହିବ । ତେବେ ବାତ୍ୟାର ଆଖି 35 କିଲୋମିଟର ପର୍ଯ୍ୟନ୍ତ ବ୍ୟାପିକି ରହିଛି ବୋଲି ସୂଚନା ମିଳିଛି । ବାତ୍ୟା ସହିତ ପୂର୍ଣ୍ଣିମା ଯୋଗୁଁ ଜଗତସିଂହପୁର ଓ କେନ୍ଦ୍ରାପଡାରେ ସମୁଦ୍ରରେ 7 ଫୁଟ ଉଚ୍ଚର ଜୁଆର ଉଠିବାର ସମ୍ଭାବନା ରହିଥିବା ବେଳେ ଭଦ୍ରକ ଓ ବାଲେଶ୍ବରରେ 7ରୁ 13 ଫୁଟ ଉଚ୍ଚର ଜୁଆର ଆସିବ ।
ଗତ 6 ଘଣ୍ଟା ଧରି ବାତ୍ୟା 15 କିଲୋମିଟର ବେଗରେ ଗତି କରୁଛି । ସମୁଦ୍ର ମଧ୍ୟରେ ପବନର ବେଗ 130ରୁ 155 କିଲୋମିଟର ରହିଥିବା ଏସଆରସି ପ୍ରଦୀପ ଜେନା ସୂଚନା ଦେଇଛନ୍ତି । ବାତ୍ୟା ପ୍ରଭାବରୁ ମଙ୍ଗଳବାରଠାରୁ ବର୍ଷା ପବନ ଆରମ୍ଭ ହୋଇଯାଇଥିବା ବେଳେ ବର୍ତ୍ତମାନ ସମୁଦ୍ର କୂଳରେ ପ୍ରାୟ 60 ବେଗରେ ପବନ ବହୁଛି । ଧାମରାରେ ପ୍ରବଳ ବର୍ଷା ଓ ପବନ ଏବେ ଜାରି ରହିଛି । ବାତ୍ୟା ନିକଟତର ହେବା ସହିତ ପବନର ବେଗରେ ମଧ୍ୟ ବୃଦ୍ଧି ପାଉଛି । ତଳିଆ ଅଞ୍ଚଳ ଲୋକଙ୍କ ଘରେ ସମୁଦ୍ର ପାଣି ପଶିଥିବା ମଧ୍ୟ ସୂଚନା ମିଳିଛି । ସେପଟେ ସରକାରଙ୍କ ତରଫରୁ ସମସ୍ତ ସ୍ଥାନାନ୍ତରଣ କାର୍ଯ୍ୟ ଶେଷ ହୋଇସାରିଥିବା ବେଳେ ଜିରୋ କାଜୁଆଲିଟିକୁ ସରକାର ଗୁରୁତ୍ବ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
