ଭୁବନେଶ୍ବର: କଂଗ୍ରେସ ଦଳର ସାମ୍ପ୍ରତିକ ପରିସ୍ଥିତିରେ ଶୃଙ୍ଖଳାର ଅଧିକ ଆବଶ୍ୟକତା ରହିଛି । ସୋନିଆ ଗାନ୍ଧୀ ବର୍ତ୍ତମାନ କର୍ମକର୍ତ୍ତାଙ୍କ ଶୃଙ୍ଖଳା ଉପରେ ଅଧିକ ଗୁରୁତ୍ୱ ଦେଉଛନ୍ତି । ବିଧାୟକଙ୍କ ଠାରୁ ଆରମ୍ଭ କରି ସାଧାରଣ କର୍ମୀ ଯାଏଁ, ଯେ କେହି ବି ବିଶୃଙ୍ଖଳିତ ହେବେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ । କଂଗ୍ରେସ ଦଳ ଖରାପ ପରିସ୍ଥିତି ଦେଇ ଗତି କରୁଛି । କଂଗ୍ରେସ ନାଁରେ ବିଶୃଙ୍ଖଳିତ ଆଚରଣ ପାଇଁ ଅପବାଦ ରହିଛି । ଏହି ଅପବାଦକୁ ହଟେଇବା ପ୍ରଧାନ ଦାୟିତ୍ୱ । ଓଡ଼ିଶା ପ୍ରଭାରୀ ମଧ୍ୟ ଏହାକୁ ନେଇ ସମସ୍ତ କର୍ମକର୍ତ୍ତା ଓ ନେତାଙ୍କୁ ଚେତାବନୀ ଦେଇଛନ୍ତି । ନବଗଠିତ ପିସିସି ଶୃଙ୍ଖଳା କମିଟିର ଅଧ୍ୟକ୍ଷ କିଶୋର ଚନ୍ଦ୍ର ପଟେଲ ଏନେଇ ସୂଚନା ଦେଇଛନ୍ତି ।
ଗତକାଲି(ବୁଧବାର) ସର୍ବଭାରତୀୟ କଂଗ୍ରେସ କମିଟି ପକ୍ଷରୁ ଓଡ଼ିଶା ପିସିସି 7 ଜଣିଆ ଶୃଙ୍ଖଳା କମିଟି ଗଠନ କରିଛି । ପୂର୍ବତନ ବାଚସ୍ପତି ତଥା ବରିଷ୍ଠ କଂଗ୍ରେସ ନେତା କିଶୋର ଚନ୍ଦ୍ର ପଟେଲଙ୍କୁ ଏହି କମିଟିର ଅଧ୍ୟକ୍ଷ ଦାୟିତ୍ବ ଦିଆଯାଇଛି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
