ଭୁବନେଶ୍ବର: ଚିଲିକା ବିଧାୟକଙ୍କ ତୁମୁଳକାଣ୍ଡକୁ ନେଇ ଉଠୁଛି ପଡୁଛି ରାଜ୍ୟ । ଶାସକ ବିଜେଡିକୁ ଘେରିଛନ୍ତି ବିରୋଧୀ । ବିଧାୟକ ପ୍ରଶାନ୍ତ ଜଗଦେବଙ୍କୁ ନିଲମ୍ବନ ନୁହେଁ ବହିଷ୍କାର ଦାବି କରିଛନ୍ତି ବିରୋଧୀ । ଏହାକୁ ନେଇ ପ୍ରତିକ୍ରିୟା ରଖିଛନ୍ତି ବିଜେଡି ସାଂସଦ ତଥା ଆଇନଜୀବୀ ପିନାକୀ ମିଶ୍ର । ପିନାକୀ ଯୁକ୍ତି ବାଢିଛନ୍ତି ଯେ, ଦଳର ସମ୍ବିଧାନ ଅନୁଯାୟୀ 3 ମାସ ଦଳରୁ ନିଲମ୍ବିତ ଅର୍ଥ ବହିଷ୍କାର ।
ଗଣତନ୍ତ୍ରରେ ହିଂସା କେବେ ଗ୍ରହଣ ଯୋଗ୍ୟ ନୁହେଁ । ପୂର୍ବରୁ ବିଧାୟକଙ୍କ ଏପରି ଆଚରଣ ପାଇଁ ଦଳ ସୁପ୍ରିମୋ ତାଙ୍କୁ ନିଲମ୍ବିତ କରିଛନ୍ତି । ଦଳର ସମ୍ବିଧାନ ଅନୁଯାୟୀ 3 ମାସ ଧରି ଯଦି ଜଣେ ଦଳରୁ ନିଲମ୍ବିତ ରୁହନ୍ତି, ତେବେ ତାଙ୍କୁ ଦଳରୁ ବହିଷ୍କାର ବୋଲି ଧରାଯାଏ ବୋଲି କହିଛନ୍ତି ପୁରୀ ସାଂସଦ।
ପୂର୍ବରୁ ବିଜେପି ମଣ୍ଡଳ କର୍ମୀଙ୍କୁ ଆକ୍ରମଣ ଅଭିଯୋଗରେ ଗିରଫ ହୋଇଥିଲେ ପ୍ରଶାନ୍ତ । ଗତ ସେପ୍ଟେମ୍ବର 8 ତାରିଖରେ ବିଧାୟକ ପ୍ରଶାନ୍ତ ଜଗଦେବଙ୍କୁ ଦଳରୁ ନିଲମ୍ବନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହା ସହ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ପଦରୁ ମଧ୍ୟ ତାଙ୍କୁ ହଟାଇ ଦିଆଯାଇଥିଲା ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
