ଭୁବନେଶ୍ବର: ଖାଁ ଖାଁ ଟିକେଟ୍ କାଉଣ୍ଟର ଓ ସିନେମା ହଲ୍ । ଆଉ ଆଗ ପରି ନାହିଁ ଗହଳି । 10 ମାସର କୋଭିଡ କଟକଣା ପରେ ସିନେମା ହଲ୍ ଖୋଲିଥିଲେ ବି ଏଭଳି ପରିସ୍ଥିତି ଦେଖା ଦେଇଛି ଭୁବନେଶ୍ବର ଫିଲ୍ମ ହଲ ମାନଙ୍କରେ । ଟିକିଏ ମନୋରଞ୍ଜନ ପାଇଁ ଲୋକମାନେ ସିନେମା ଦେଖିବାକୁ ଆସୁଥିଲେ ବି ଆଗ ଅପେକ୍ଷା ଦର୍ଶକଙ୍କ ଭିଡ ଜମୁ ନାହିଁ। ଯଦିଓ କିଛି ଲୋକ ମହାମାରୀ କଟକଣା ମଧ୍ୟରେ ଦେଖିବାକୁ ଆସୁଛନ୍ତି ମାତ୍ର ଆଖିଦୃଶିଆ ଦର୍ଶକଙ୍କୁ ଦେଖିବାକୁ ମିଳୁନି । ଗୋଟେ ପଟେ କୋଭିଡ ଗାଇଡଲାଇନ ମାନି ୫୦ ପ୍ରତିଶତ ଲୋକଙ୍କ ଟିକେଟ ପାଇଁ ଅନୁମତି ରହିଥିବାବେଳେ ସେଥିରୁ ୧୨ରୁ ୨୫ ପ୍ରତିଶତ ଲୋକ ଆସୁଛନ୍ତି । ଏଭଳି ସ୍ଥିତିରେ ସିନେମା ହଲ୍ ଖୋଲିଛି ସତ ହେଲେ ଦର୍ଶକଙ୍କ ଅଭାବକୁ ନେଇ ୯୦ ପ୍ରତିଶତରୁ ଉର୍ଦ୍ଧ୍ବ କ୍ଷତିରେ ଚାଲିଛି ସିନେମା ହଲ ।
ଅନ୍ୟପଟେ ସାନିଟାଇଜର ଓ ସାମାଜିକ ଦୂରତା ବଜାୟ ରଖିବାର ବ୍ୟବସ୍ଥା ଥିଲେ ବି ଦର୍ଶକଙ୍କ ମନରେ ମହାମାରୀ ଯେମିତି ଭୟର ବସା ବାନ୍ଧି ଦେଇଛି । ଯୁବପୀଢୀ ହଲ୍ ଆସିବାର ଇଚ୍ଛା ପ୍ରକାଶ କରୁଥିଲେ ବି ଅଭିଭାବକମାନେ ମହାମାରୀ ଭୟରେ ଅନୁମତି ଦେଉନଥିବା କହିଛନ୍ତି ।
ଅନ୍ୟପଟେ 10 ମାସ ପରେ ସିନେମା ହଲ୍ ଖୋଲିଥିଲେ ବି ହଲ୍ ମାଲିକମାନଙ୍କ ଚିନ୍ତାରେ ବିରାମ ଲାଗି ନାହିଁ । ଦର୍ଶକଙ୍କ ଅଭାବରୁ ୯୦ ପ୍ରତିଶତ କ୍ଷତିରେ ଚାଲିଛି ସେମାନଙ୍କ ସିନେମା ହଲ । ଶନିବାର ଓ ରବିବାରରେ ଯଦିଓ ଟିକେ ଭିଡ ଲାଗୁଛି କିନ୍ତୁ ଭଲ ସିନେମା ନଥିବାରୁ ଦର୍ଶକମାନେ ସିନେମା ଦେଖିବାକୁ ଆଗ୍ରହ ପ୍ରକାଶ କରୁନଥିବା କହିଛନ୍ତି ହଲ୍ ମାଲିକ । ଏବେ ବି କୋରାନାର ଡର ମନରୁ ଯାଇନଥିବା ବେଳେ ବଲିଉଡ ହେଉ ଅବା ଓଲିଉଡରେ ନୂଆ ଆକର୍ଷଣୀୟ ସିନେମା ଆସିନଥିବାରୁ ଦର୍ଶକ ବି ହଲ୍ ଯିବାକୁ ନା ପସନ୍ଦ କରୁଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
