ଭୁବନେଶ୍ବର: ରାଜଧାନୀରେ 1988ରୁ ଆଜି ପର୍ଯ୍ୟନ୍ତ ମାଷ୍ଟର କ୍ୟାଣ୍ଟିନ ଛକ ଛାତି ଉପରେ ଛିଡା ହୋଇଛି ସ୍ଥପତି ସ୍ବର୍ଗତ ରଘୁନାଥ ମହାପାତ୍ରଙ୍କ ଶ୍ରମର ଐତିହ୍ୟ ଘୋଡ଼ା । ଏହି ଘୋଡ଼ା ଆମ ରାଜ୍ୟ ଚିହ୍ନରେ ମଧ୍ୟ ସ୍ଥାନିତ ହୋଇଛି l ତେବେ ସ୍ମାର୍ଟ ସିଟି ପ୍ରକଳ୍ପ ପାଇଁ ଏବେ ବଳି ପଡିବାକୁ ଯାଉଛି ଘୋଡା ।
ଦୀର୍ଘ ବର୍ଷ ଧରି ଭୁବନେଶ୍ବର ପରିଚୟ ପାଲଟିଥିବା ଏହି ଘୋଡ଼ାକୁ ସ୍ଥାନାନ୍ତର କରାଯିବା ନେଇ ବୈଠକ ହୋଇଛି l ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ, ବିଏମସି ଓ ବିଡିଏ ମିଳିତ ସହଯୋଗରେ ରାଜଭବନ ନିକଟକୁ ସ୍ଥାନାନ୍ତର ନେଇ ଯୋଜନା ହୋଇଛି l ସେଠାରେ ଥିବା ମଧୁବାବୁଙ୍କ ପ୍ରତିମୂର୍ତ୍ତି ନିକଟରେ ରଖାଯିବ । ଏହାକୁ ନେଇ ଏବେ ବିରୋଧ ସ୍ବର ତୀବ୍ର ହେବାରେ ଲାଗିଛି ।
ତେବେ ଏନେଇ ଶିଳ୍ପୀ ଜଗଦୀଶ କାନୁନଗୋ କହିଛନ୍ତି ଯେ ସ୍ମାର୍ଟ ସିଟି ପ୍ରକଳ୍ପରେ ଐତିହ୍ୟ ସ୍ଥାନାନ୍ତର ନକରି ଅକ୍ଷୁର୍ଣ୍ଣ ରଖାଯାଉ l କଳା ସଂସ୍କୃତିକୁ ସମ୍ମାନ ଦିଆଯାଉ । ଐତିହ୍ୟ ସ୍ଥାନାନ୍ତର ଆମ ସଂସ୍କୃତି ପାଇଁ ଅସମ୍ମାନ ହେବ l ଗୋଟିଏ ପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆମ କଳା ସଂସ୍କୃତିକୁ ଗୁରୁତ୍ବ ଦେଉଛନ୍ତି ନିକଟରେ ରଘୁରାଜପୁର ଶିଳ୍ପୀଙ୍କ ପ୍ରତି ଦରଦ ମଧ୍ୟ ଦେଖାଇଛନ୍ତି । ଅନ୍ୟ ପକ୍ଷରେ ଭୁବନେଶ୍ବର ପରିଚୟ ପାଲଟିଥିବା ଏହି ଐତିହ୍ୟକୁ ସ୍ଥାନାନ୍ତର କରିବା ଆଗାମୀ ପିଢ଼ି ପାଇଁ କଳାର ହତ୍ୟା ହେବନି କି ବୋଲି ସେ ପ୍ରଶ୍ନ କରିଛନ୍ତି । ରଘୁ ବାବୁ ଥିଲେ ଆଜି କାନ୍ଦିଥାନ୍ତେ ବୋଲି କହିଛନ୍ତି ଶିଳ୍ପୀ ଜଗଦୀଶ କାନୁନଗୋ ।
ସେହିପରି ଶିଳ୍ପୀ ବିନୋଦ ମହାରଣା କହିଛନ୍ତି ଯେ ସରକାରଙ୍କ ଦୂରଦୃଷ୍ଟି ଅଭାବ ରହିଛି । ସ୍ବର୍ଗତ ରଘୁନାଥ ମହାପାତ୍ରଙ୍କ କଳାକୃତିକୁ ଏପରି ସ୍ଥାନାନ୍ତର ନକରନ୍ତୁ । ସେହି ଘୋଡା ଦୀର୍ଘ ଦିନର । କେବଳ ଭୁବନେଶ୍ବର ନୁହେଁ ସାରା ଓଡ଼ିଶାର ପରିଚୟ ପାଲଟିଛି ଏହି ଘୋଡ଼ା । ଯଦି ମାଷ୍ଟର କ୍ୟାଣ୍ଟିନରେ ଏଭଳି ଜାଗାର ଆବଶ୍ୟକତା ରହିଛି ତେବେ ଓଡ଼ିଶାରେ ଅନେକ ଶିଳ୍ପୀ ଅଛନ୍ତି ସମସ୍ତଙ୍କୁ ମତ ନିଆଯାଇ ଏହାର ନିଷ୍ପତ୍ତି ନିଆଯାଉ ବୋଲି ଶିଳ୍ପୀ ବିନୋଦ ମହାରଣା କହିଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
