ଭୁବନେଶ୍ବର: ସାରା ଦେଶ ଗତକାଲି ଦୁଇ ଦୁଇଟି ପର୍ବ ପାଳନ କରିଛି । ପବିତ୍ର ରାକ୍ଷୀ ପୂର୍ଣ୍ଣିମା ଓ ସ୍ବାଧୀନତା ଦିବସ । ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ନୂତନ ସରକାରୀ କାର୍ଯ୍ୟାଳୟ ଉଦଘାଟନ କରିଛନ୍ତି । କଳିଙ୍ଗ ବୀର ଶାସକ ଖାରବେଳଙ୍କ ନାମରେ ଖାରବେଳ ଭବନ ଉଦଘାଟନ ହୋଇଛି ।
ୟୁନିଟ 5ରେ ଅବସ୍ଥିତ ଏହି ଭବନରେ ସଚିବାଳୟ/ଲୋକସେବା ଭବନର 11ଟି ବିଭାଗ ସ୍ଥାନାନ୍ତିରତ ହୋଇ କାର୍ଯ୍ୟକରିବ । 8ମ ମହଲା ବିଶିଷ୍ଚ ଏହି କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ଚାମ୍ବର ସହ ବିଭିନ୍ନ ବିଭାଗୀୟ ଅଧିକାରୀଙ୍କ ଚାମ୍ବର ରହିବ । ଅପେକ୍ଷା ଗୃହ ଓ ଅଭ୍ୟର୍ଥନା କକ୍ଷ ସହିତ କ୍ୟାଣ୍ଟିନ,କାଫେ,ପ୍ରେସ ବ୍ରିଫିଙ୍ଗ ରୁମ ଓ ସମ୍ମିଳନୀ କକ୍ଷ ମଧ୍ୟ ରହିବ ।
ଏଥିସହ ବୟନ, ହସ୍ତତନ୍ତ ଓ ହସ୍ତଶିଳ୍ପ ବିଭାଗ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ, ଗୃହନିର୍ମାଣ ଓ ସହରୀକରଣ ବିଭାଗ, ଜଙ୍ଗଲ ଓ ପରିବେଶ ବିଭାଗ, ଶ୍ରମ ଓ ନିୟୋଜନ ଏବଂ ବାଣିଜ୍ୟ ଓ ପରିବହନ ବିଭାଗ, ଶକ୍ତି,ସୂଚନା ଓ ପ୍ରଯୁକ୍ତିବିଦ୍ୟା ଏବଂ ବିଜ୍ଞାନ ଓ କାରିଗରୀ ବିଭାଗ ସହ ଅଣୁ, ମଧ୍ୟମ ଓ କ୍ଷୁଦ୍ର ଶିଳ୍ପ ବିଭାଗ କାର୍ଯ୍ୟ କରିବ ବୋଲି ସୂଚନା ମିଳିଛି। କୋଠାଟି ନିର୍ମାଣ ହେବା ପାଇଁ 2 ବର୍ଷ ସମୟ ଲାଗିଥିବାବେଳେ 128 କୋଟି ଟଙ୍କା ବ୍ୟୟ କରାଯାଇଛି । ଏଲ.ଆଣ୍ଡ.ଟି କମ୍ପାନୀ ଏହି କୋଠା ନିର୍ମାଣ କରିଛି ।
ଉଦଘାଟନୀ ଉତ୍ସବରେ ମୁଖ୍ୟମନ୍ତ୍ରୀଙ୍କ ସହିତ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା,ବିଧାୟକ ଅନନ୍ତ ନାରାୟଣ ଜେନା,ସୁଶାନ୍ତ ରାଉତ,ମୁଖ୍ୟ ଶାସନ ସଚିବ ଅସିତ ତ୍ରିପାଠୀ,ପୂର୍ବତନ ମୁଖ୍ୟ ଶାସନ ସଚିବ ତଥା ରାଜ୍ୟ ନିର୍ବାଚନ କମିଶନର ଆଦିତ୍ୟ ପ୍ରସାଦ ପାଢ଼ୀ,ସୁରେଶ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ବରିଷ୍ଠ ପ୍ରଶାସନିକ ଅଧିକାରୀ ଶ୍ରୀ ସୁରେଶ ମହାପାତ୍ର ଏନେଇ ଖୁସି ବ୍ୟକ୍ତ କରିବା ସହିତ ଏଠାରେ କର୍ମଚାରୀମାନେ କାମ କରିବାକୁ ଅନେକ ସୁବିଧା ହେବ ବୋଲି କହିଛନ୍ତି। ସେହିପରି ଏହି ନୂଆ ବିଲ୍ଡିଙ୍ଗରେ କାମ କରିବାକୁ ଥିବା ଅଫିସର କର୍ମଚାରୀମାନେ ଖୁସି ଜାହିର କରିବା ସହିତ ନୂତନ ପରିବେଶରେ କାମ କରିବାକୁ ବେଶ ଭଲ ଲାଗିବ ବୋଲି କହିଛନ୍ତି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
