ବ୍ରହ୍ମପୁର: 1999 ମସିହା ଜୁଲାଇ ମାସ । ଦୀର୍ଘ ଦୁଇ ମାସ ଧରି ସୀମାରେ ଭାରତ ଓ ପାକିସ୍ତାନ ମଧ୍ୟରେ ଚାଲିଥିବା ଯୁଦ୍ଧର ଘଟିଥିଲା ଅନ୍ତ । ଦେଶର ବୀର ଯବାନ ନିଜ ଜୀବନର ବଳିଦାନ ଦେଇ ସ୍ବର୍ଣ୍ଣିମ ଅକ୍ଷରରେ ଲେଖିଯାଇଥିଲେ ଇତିହାସ । ସେହି ଇତିହାସକୁ ପୂରିବାକୁ ଯାଉଛି 20 ବର୍ଷ । ସାରା ଦେଶ କାର୍ଗିଲ ବିଜୟ ଦିବସ ପାଳନ ପାଇଁ ପ୍ରସ୍ତୁତ ହେଉଥିବା ବେଳେ ଓଡିଶାରେ ମଧ୍ୟ ବୀର ଓଡିଆ ଶହୀଦଙ୍କୁ ମନେ ପକାଇଛନ୍ତି ରାଜ୍ୟବାସୀ ।
ଲାନ୍ସ ନାଏକ ଏସ୍.ଶ୍ରୀନିବାସ ପାତ୍ର । କାରଗିଲ ଯୁଦ୍ଧରେ ପ୍ରାଣ ହରାଇଥିବା ଗଞ୍ଜାମ ଜିଲ୍ଲାର ପ୍ରଥମ ଓଡିଆ । ବିଡମ୍ବନାର କଥା କି ଶ୍ରୀନିବାସ ଛୁଟି ନେଇ ନୂଆ ଜୀବନ କରିବା ପାଇଁ ଆସିଥାଆନ୍ତି । ବେଶ ଧୁମଧାମରେ ଘରକୁ ଆସିଥାଏ ନବବଧୂ । ହେଲେ ବିବାହର ମାତ୍ର 6 ଦିନ ପରେ ଦେଶ ମାତୃକାର ସେବା ପାଇଁ କାରଗିଲରୁ ଆସେ ଲାନ୍ସ ନାଏକଙ୍କ ପାଇଁ ଡକରା । ଆଉ ନୂଆ ଜୀବନକୁ କ୍ଷଣିକରେ ଛାଡି ଯୁଦ୍ଧ କ୍ଷେତ୍ରରେ ଆଗେଇ ଚାଲିଥିଲେ ଶ୍ରୀନିବାସ ।
ଅଦମ୍ୟ ସାହସର ସହ ଶତୃ ପକ୍ଷର ଗୁଳିର ସାମ୍ନା କରିଥିଲେ ଶ୍ରୀନିବାସ । ହେଲେ 5 ଜୁଲାଇରେ ସେହି ଗୁଳିରେ ଦେଶ ମାତୃକା ପାଇଁ ରକ୍ତର ଛିଟାରେ ଆଙ୍କି ଦେଇଯାଇଥିଲେ ସେ ନିଜ ଶେଷ ନିଃଶ୍ବାସର ଛବି । କମ୍ ବୟସରୁ ତାଙ୍କର ଏହି ବଳିଦାନ ଆଜିର ଯୁବପୀଢିଙ୍କ ପାଇଁ ପ୍ରେରଣାଦାୟୀ । ତାଙ୍କ ବୀରତ୍ବର କଥା କହିଲେ ଗର୍ବରେ ଫାଟି ପଡେ ପରିବାର ଲୋକ ଓ ଗ୍ରାମବାସୀଙ୍କ ଛାତି ।
ଶହୀଦ ଶ୍ରୀନିବାସଙ୍କ ସ୍ମୃତିରେ ଗାଁର କିଛି ଉତ୍ସାହୀ ଯୁବକ ପ୍ରତିଷ୍ଠା କରିଛନ୍ତି ତାଙ୍କର ପ୍ରତିମୂର୍ତ୍ତୀ । ଆଉ ଏବେ କାରଗିଲ ବିଜୟ ଦିବସର 20 ବର୍ଷ ପୂର୍ତ୍ତି ଅବସରରେ ଗାଁରେ ବଣ୍ଟା ଚାଲିଛି ସଚେତନତା ବାର୍ତ୍ତା । ତେଣେ କାରଗିଲରେ ଚାଲିଛି ଭାରତୀୟ ସେନା ପକ୍ଷରୁ ଜୋରସୋର ପ୍ରସ୍ତୁତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
