ବ୍ରହ୍ମପୁର: ଦୀର୍ଘ ଆଠ ମାସ ପରେ ପୁଣି ଟ୍ରାକ୍କୁ ଫେରୁଛନ୍ତି କ୍ରୀଡାବିତ୍ । ଷ୍ଟାଡିୟମ୍ ଓ ଜିମ୍ରେ ଚାଲିଛି ପ୍ରାକ୍ଟିସ୍ । ଭାରୋତ୍ତୋଳନକୁ ନେଇ ବ୍ରହ୍ମପୁରର କ୍ରୀଡାବିତ୍ ଅନେକ ସଫଳତା ଆଣିଥିବାବେଳେ କ୍ରୀଡା ଛାତ୍ରବାସ ଠାରୁ ଆରମ୍ଭ କରି ଅନେକ ଷ୍ଟାଡିୟମ୍ ବନ୍ଦ ଥିବାରୁ ଚିନ୍ତିତ ଥିଲେ ଏମାନେ ।
ଘରେ ରହି ନିୟମିତ ଅଭ୍ୟାସରୁ ବାଦ୍ ପଡୁଥିଲେ ଭାରୋତ୍ତୋଳନକାରୀ । କିଏ ଭୟରେ ଘରୁ ବାହାରୁ ନଥିଲା ତ, କିଏ ନିଜକୁ ଫିଟ୍ ରଖିବାକୁ କେବଳ ଦିନକୁ ଦୁଇବେଳା ଶାରୀରିକ ବ୍ୟାୟାମ ଜାରି ରଖିଥିଲା । ହେଲେ ସରକାରଙ୍କ ନୂଆ ଗାଇଡଲାଇନ ଆସିବା ପରେ ବିଭିନ୍ନ ଘରୋଇ ଜିମ୍ରେ ଏବେ ପୁଣି ଥରେ ଅଭ୍ୟାସ ଆରମ୍ଭ କରିଛନ୍ତି ଏମାନେ ।
ରାଜ୍ୟ ତଥା ଦେଶରେ ଏବେବି କୋଭିଡର ଭୟ ରହିଥିବାରୁ ସମସ୍ତ କ୍ରୀଡା ଅନୁଷ୍ଠାନ ଖୋଲିପାରିନାହିଁ । ଫଳରେ କ୍ରୀଡାବିତ୍ମାନେ କେବଳ ଜିମ୍ ମଧ୍ୟରେ ଅଭ୍ୟାସ କରି 8 ମାସ ଅବସାଦକୁ ଭୁଲିବାକୁ ଚେଷ୍ଟା କରୁଛନ୍ତି । ଏହାସହ ଅନେକ କ୍ରୀଡାବିତ୍ ଆଗାମୀ ପ୍ରତିଯୋଗୀତା ପାଇଁ ଏଠାରେ ନିୟମିତ ଅଭ୍ୟାସ ଜାରି ରଖିଛନ୍ତି ।
ହେଲେ ସରକାର କେବେ କ୍ରୀଡା ଛାତ୍ରବାସ ଏବଂ ଷ୍ଟାଡିୟମକୁ ଖୋଲିବା ପାଇଁ ଅନୁମତି ଦେବେ ଓ କେବେ ପୁଣି କ୍ରୀଡା ଜଗତ ସମ୍ପୂର୍ଣ୍ଣ ରୂପେ ଟ୍ରାକକୁ ଫେରିବ । ତାକୁ ହିଁ ଅପେକ୍ଷା ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
