ବ୍ରହ୍ମପୁର: ସହରରେ ବ୍ରାଉନସୁଗାର କାରବାର ଅଭିଯୋଗରେ ଜଣେ ଯୁବକକୁ ଗିରଫ କରିଛି ଅବକାରୀ ବିଭାଗ । ଅଭିଯୁକ୍ତ ଜଣକ ଗଞ୍ଜାମ ଜିଲ୍ଲା ଖଲ୍ଲିକୋଟ ବାଦପଲ୍ଲୀ ଅଞ୍ଚଳର ମଦନ ମୋହନ ଶବର । ସେ ବ୍ରହ୍ମପୁରର ଆଙ୍କୁଲି ନିଗମ ଅଞ୍ଚଳରେ ରହୁଥିବା ଜଣାପଡିଛି । ଅଭିଯୁକ୍ତ ନିକଟରୁ 45 ଗ୍ରାମ ବ୍ରାଉନସୁଗାର ଜବତ କରାଯାଇଛି । ଯାହାର ମୂଲ୍ୟ 4 ଲକ୍ଷ 50 ହଜାର ଟଙ୍କା ହେବ ବୋଲି ଆକଳନ କରାଯାଉଛି । ଯୁବକଟି ପୁରୀ ଅଞ୍ଚଳରୁ ବ୍ରାଉନସୁଗାର ଆଣି ବ୍ରହ୍ମପୁରରେ ଏହି ବ୍ୟବସାୟ କରୁଥିବା ଜଣାପଡିଛି ।
ବ୍ରାଉନସୁଗାର କାରବାରରେ ଯୁବକ ଗିରଫ, 45 ଗ୍ରାମ ବ୍ରାଉନସୁଗାର ଜବତ
ସହରରେ ବ୍ରାଉନସୁଗାର କାରବାର ସମ୍ପର୍କରେ ଖବର ପାଇବା ପରେ ଅବକାରୀ ବିଭାଗ ଅଭିଯୁକ୍ତକୁ ଧରିବାକୁ ଏକ ଯୋଜନା କରିଥିଲେ । ଅବକାରୀ ଗୁଇନ୍ଦା ବିଭାଗର ଅଧିକାରୀମାନେ ବ୍ରାଉନସୁଗାର କିଣିବାର ଅଭିନୟ କରି ସହରର ଏମକେସିଜି ମେଡିକାଲ ଖେଳପଡିଆରୁ ସମ୍ପୃକ୍ତ ଯୁବକକୁ ଗିରଫ କରିଛନ୍ତି । ଘଟଣାରେ ଅଧିକ ତଦନ୍ତ ଜାରି ରହିଥିବା ଅବକାରୀ ବିଭାଗ ପକ୍ଷରୁ ସୂଚନା ମିଳିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
