ହାଇଦ୍ରାବାଦ: ଗତବର୍ଷ ଅର୍ଥାତ୍ 2020 ମସିହା ବିଭିନ୍ନ କାରଣ ପାଇଁ ସମସ୍ତଙ୍କର ସ୍ମରଣୀୟ ହୋଇ ରହିବ । ତେବେ ତାହା ସ୍ବାସ୍ଥ୍ୟ ଜରୁରୀକାଳୀନ ପରିସ୍ଥିତି ହେଉ କିମ୍ବା ପ୍ରାକୃତିକ ବିପର୍ଯ୍ୟୟ ହେଉ । ଅର୍ଥନୀତି ଦିଗରେ ଦେଖିଲେ କୋରୋନା ମହାମାରୀ ଏକ ବୃହତ ଆର୍ଥିକ ସଙ୍କଟ ସୃଷ୍ଟି କରିଥିଲା ଯାହା ପ୍ରାୟ ସମସ୍ତଙ୍କ ପାଇଁ ଚିନ୍ତାର ବିଷୟ ହୋଇଥିଲା । ସଞ୍ଚୟ ପଦ୍ଧତି ସହିତ ସର୍ବଦା ଭାରତୀୟମାନେ ଜଡିତ ରହିଥିଲେ ମଧ୍ୟ ଖରାପ ଆର୍ଥିକ ଯୋଜନା ହେତୁ ବିଭିନ୍ନ ଅସୁବିଧାର ସମ୍ମୁଖୀନ ହୋଇଥିଲେ । ତେବେ ଭବିଷ୍ୟତରେ ଏଭଳି ଆର୍ଥିତ ସଙ୍କଟରୁ ରକ୍ଷା ପାଇବାକୁ ହେଲେ ଏହି 3ଟି ଶିକ୍ଷାକୁ ଗ୍ରହଣ କରିବା ନିତାନ୍ତ ଆବଶ୍ୟକ ।
1. ଜରୁରୀକାଳୀନ ପାଣ୍ଠି ସୃଷ୍ଟି କରିବା ଆବଶ୍ୟକ:-
- କୌଣସି ଡାକ୍ତରୀ କିମ୍ବା ଆର୍ଥିକ ଜରୁରୀକାଳୀନ ପରିସ୍ଥିତି ପାଇଁ ଏହି ଅର୍ଥକୁ ସଞ୍ଚୟ କରିବା ଆବଶ୍ୟକ । କିନ୍ତୁ ଏହାର ଅର୍ଥ ନୁହେଁ ସଞ୍ଚୟ ଆକାଉଣ୍ଟରେ ଅଲଗା ଭାବରେ ଅର୍ଥକୁ ସଞ୍ଚୟ କରିବା । ଏହାର ଅର୍ଥ ଏପରି ଭାବରେ ଅର୍ଥ ବିନିଯୋଗ କରିବା ଉଚିତ ଯାହା ଦ୍ବାରା ଏକ ଭଲ ରିଟର୍ଣ୍ଣ ସୃଷ୍ଟି କରିହେବ । ସ୍ବଳ୍ପ ସମୟ ଅବଧି ମଧ୍ୟରେ ଟଙ୍କା ସଞ୍ଚୟ କଲେ ଜରୁରୀକାଳୀନ ପରିସ୍ଥିତିରେ ଏହାକୁ ବିନିଯୋଗ କରାଯାଇପାରିବ ବୋଲି ଅର୍ଥନୈତିକ ବିଶେଷଜ୍ଞ ଭାଇରାଲ ଭଟ୍ଟ କହିଛନ୍ତି ।
- ତେବେ ଜରୁରୀକାଳୀନ ପାଣ୍ଠି ପାଇଁ କେତେ ପରିମାଣ ଯଥେଷ୍ଟ ତାହା ଜାଣିବା ମଧ୍ୟ ଜରୁରୀ । ଜରୁରୀକାଳୀନ ପାଣ୍ଠି ଭାବରେ ମାସିକ ଆୟର 3-5 ଗୁଣ ଅର୍ଥକୁ ଏହି ପାଣ୍ଠିରେ ସଞ୍ଚୟ କରି ରଖିବା ପାଇଁ ଭଟ୍ଟ ପରାମର୍ଶ ଦେଇଛନ୍ତି । ଅଧିକ ରୋଜଗାର ଥିବା ଲୋକ ମାସିକ ଆୟର 5-6 ଗୁଣ କିମ୍ବା ବାର୍ଷିକ ଆୟର 2-3 ଗୁଣ ଅର୍ଥକୁ ସଞ୍ଚୟ କରିପାରିବେ । ତେବେ ହଠାତ୍ ଚାକିରି ହରାଇଲେ ଏହି ପାଣ୍ଠି କିଛି ମାସ ପାଇଁ ଭଡା, EMI, ଶିକ୍ଷା ସମ୍ବନ୍ଧୀୟ ଫି, ସ୍ବାସ୍ଥ୍ୟ ବିଲ୍ ଇତ୍ୟାଦି ପରିଚାଳନା କରିପାରିବାରେ ସହାୟକ ହେବ ।
2. ବିପଦ ସମ୍ପର୍କିତ ଯୋଜନା:-
ବିପଦ ଯୋଜନାରେ ମୁଖ୍ୟତଃ ପର୍ଯ୍ୟାପ୍ତ ସ୍ବାସ୍ଥ୍ୟ ଏବଂ ଜୀବନ ବୀମାକୁ ଅନ୍ତର୍ଭୁକ୍ତ କରିବା ଉଚିତ | କୋଭିଡ-19 ସମୟରେ ସ୍ବାସ୍ଥ୍ୟକ୍ଷେତ୍ରରେ ବିପୁଳ ପରିମାଣରେ ଅର୍ଥ ଖର୍ଚ୍ଚ ହୋଇଛି । ଏହି ପରିସ୍ଥିତିକୁ ଦୃଷ୍ଟିରେ ରଖି ସ୍ବାସ୍ଥ୍ୟ ପାଇଁ ପଇସା ସଞ୍ଚୟ କରିବା ଆବଶ୍ୟକ । ତେବେ ଦେଶରେ ହସ୍ପିଟାଲରେ ଖର୍ଚ୍ଚ ହେଉଥିବା ଅର୍ଥକୁ ଧ୍ୟାନରେ ରଖି ସ୍ବାସ୍ଥ୍ୟକ୍ଷେତ୍ରରେ ବୀମା କରିବା ନିହାତି ଜରୁରୀ । ଜୀବନ ବୀମା କ୍ଷେତ୍ରରେ ମଧ୍ୟ ଭଟ୍ଟ ଲୋକମାନଙ୍କୁ ସେମାନଙ୍କର HLV ବା ମାନବ ଜୀବନ ମୂଲ୍ୟ ଉପରେ ଏକ ସଞ୍ଚୟ ପାଣ୍ଠି ରଖିବା ପାଇଁ ପରାମର୍ଶ ଦେଇଛନ୍ତି ।
3. ସମ୍ପତ୍ତି ବଣ୍ଟନ:-
- ଲକଡାଉନର ପ୍ରଥମ ମାସରେ ଅର୍ଥନୀତି ଗଭୀର ଭାବେ ପ୍ରଭାବିତ ହୋଇଥିଲା । ବଣ୍ଡ ବଜାରରେ ମଧ୍ୟ ଚଳିତ ବର୍ଷ 14 ବିଲିୟନ ଡଲାରର ବିପୁଳ ପରିମାଣର ପ୍ରବାହ ଦେଖିବାକୁ ମିଳିଛି । ସୁନା ଓ ରୂପା ମୂଲ୍ୟ ହଠାତ୍ ବୃଦ୍ଧି ପାଇବା ସହିତ ତୀବ୍ର ହ୍ରାସ ଘଟିଥିଲା । ତେବେ ପୁଞ୍ଜି ବିନିଯୋଗର ବିବିଧକରଣ ପ୍ରକୃତରେ ଗୁରୁତ୍ବପୂର୍ଣ୍ଣ ଥିଲା ବୋଲି ଅର୍ଥନୈତିକ ବିଶେଷଜ୍ଞ ଭଟ୍ଟ କହିଛନ୍ତି । ତେବେ ଗୋଟିଏ ସ୍ଥାନରେ ସମସ୍ତ ଅର୍ଥକୁ ସଞ୍ଚୟ କରିବା ଉଚିତ ନୁହେଁ ।
- ତେବେ ମହାମାରୀ ଏପର୍ଯ୍ୟନ୍ତ ସମାପ୍ତ ହୋଇ ନାହିଁ ଏବଂ ବିପଦ ଅଧିକ ଚାଲୁ ରହିଛି ବୋଲି ସମସ୍ତେ ବିଚାରକୁ ନେଇ 2021 ଆର୍ଥିକ ଯୋଜନାରେ ଆବଶ୍ୟକୀୟ ପରିବର୍ତ୍ତନ କରିବା ଉଚିତ । ଏହାଦ୍ବାରା ଭବିଷ୍ୟତରେ ଯେକୌଣସି ଅସୁବିଧାକୁ ମୁକାବିଲା କରିବା ସହଜ ହେବ ବୋଲି ଭଟ୍ଟ ପରାମର୍ଶ ଦେଇଛନ୍ତି ।
