ନୂଆଦିଲ୍ଲୀ: ଜୁନ ପହିଲାରୁ ଗଡିବ 200 ଟ୍ରେନ । ଏଥିପାଇଁ ଟିକେଟ ବୁକିଂ ଆରମ୍ଭ ହୋଇଯାଇଛି । ଏହି କ୍ରମରେ ସମଗ୍ର ଦେଶରେ ପାଖାପାଖୀ 1.7 ଲକ୍ଷ କମନ ସର୍ଭିସ ସେଣ୍ଟରରେ ଟ୍ରେନ ଟିକେଟ ବୁକିଂ ଶୁକ୍ରବାର ଠାରୁ ଆରମ୍ଭ ହେବ। ଗୁରୁବାର କେନ୍ଦ୍ର ରେଳମନ୍ତ୍ରୀ ପୀୟୁଷ ଗୋଏଲ ଏ ନେଇ ସୂଚନା ଦେଇଛନ୍ତି ।
କମନ ସର୍ଭିସ ସେଣ୍ଟର ଗ୍ରାମୀଣ ଓ ଦୁର୍ଗମ ଅଞ୍ଚଳରେ ସରକାରଙ୍କ ଇ-ସେବାକୁ ଉପଲବ୍ଧ କରାଉଥିବା କେନ୍ଦ୍ର ଅଟେ । ଯେଉଁସବୁ ସ୍ଥାନରେ କମ୍ପ୍ୟୁଟର ଓ ଇଣ୍ଟରନେଟ ସୁବିଧା କମ କିମ୍ବା ଆଦୌ ନଥାଏ ସେଠାରେ ଏହି କେନ୍ଦ୍ରଗୁଡିକ ରହିଥାଏ ।
ସେହିପରି ମନ୍ତ୍ରୀ ଏହା ମଧ୍ୟ କହିଛନ୍ତି ଯେ, ଆସନ୍ତା ଦୁଇ ତିନି ଦିନ ମଧ୍ୟରେ କେତେକ ଷ୍ଟେସନ କାଉଣ୍ଟରରୁ ମଧ୍ୟ ଟିକେଟ ବୁକିଂ ଆରମ୍ଭ ହେବ। ଏଥିପାଇଁ ରେଲୱେ ଟିମ ପକ୍ଷରୁ ସୁରକ୍ଷା ବ୍ୟବସ୍ଥାର ସମୀକ୍ଷା କରାଯାଉଛି ।
ତେବେ ଆଗକୁ ଆହୁରି ଟ୍ରେନ ଚାଲିବା ନେଇ ଶୀଘ୍ର ଘୋଷଣା କରାଯିବ ବୋଲି ଗୋଏଲ କହିଛନ୍ତି । ଜୁନ 1ରୁ ଆରମ୍ଭ ହେବାକୁ ଥିବା ଟ୍ରେନ ସେବା ପାଇଁ ବୁକିଂ ଖୋଲିବାର ମାତ୍ର ଅଢେଇ ଘଣ୍ଟାରେ 4 ଲକ୍ଷ ଯାତ୍ରୀ ଟିକେଟ ବୁକିଂ କରିଛନ୍ତି ବୋଲି ଗୋଏଲ ସୂଚନା ଦେଇଛନ୍ତି ।
