ନୂଆଦିଲ୍ଲୀ: ଜିଏସଟି ଦେୟ ପାଇଁ ରାଜ୍ୟକୁ ଦିଆଯାଇଥିବା କେନ୍ଦ୍ର ସରକାରଙ୍କ ‘ଆଶ୍ବାସନା ପତ୍ର’('Letter of Comfort')କୁ ଟାର୍ଗେଟ କରିଛନ୍ତି ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ । ସେ କହିଛନ୍ତି ଯେ ଏସବୁ ସ୍ବାନ୍ତ୍ବନାର ଶବ୍ଦ ଏବଂ ଏହାର କୌଣସି ଅର୍ଥ ନାହିଁ। ହାର୍ଡ କ୍ୟାସର ଆବଶ୍ୟକତା ରହିଛି । କେନ୍ଦ୍ର ସରକାରଙ୍କର ଅନେକ ବିକଳ୍ପ ଓ ପଦ୍ଧତି ଅଛି, ଯାହା ଦ୍ବାରା ଏହା ରାଜ୍ୟମାନଙ୍କୁ ଜିଏସଟି ପେମେଣ୍ଟ କରିପାରିବ ।
ଯଦି ରାଜ୍ୟ ସରକାର ଋଣ ନେଉଛନ୍ତି, ତେବେ ଏହାର ସିଧା ପ୍ରଭାବ ସେମାନଙ୍କ କ୍ୟାପିଟାଲ ଏକ୍ସପେଣ୍ଡିଚର ଉପରେ ପଡିବ ବୋଲି ଚିଦାମ୍ବରମ ଦର୍ଶାଇଛନ୍ତି । ତେବେ ଏହି ଲେଟର ଅଫ କମ୍ପର୍ଟ ଅର୍ଥାତ ଆଶ୍ବାସନା ପତ୍ର ପ୍ରଦାନକୁ ପଞ୍ଜାବ, ତାମିଲନାଡୁ, ଛତିଶଗଡ ସମେତ ଅନେକ ରାଜ୍ୟ ପ୍ରତ୍ୟାଖ୍ୟାନ କରିଛନ୍ତି ।
ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବଘେଲ ଦାବି କରିଛନ୍ତି କି କେନ୍ଦ୍ର ସରକାର 2,828 କୋଟି ଟଙ୍କା ତୁରନ୍ତ ଉପଲବ୍ଧ କରନ୍ତୁ, ଯାହାକି 2020-21ର ବକେୟା ରାଶି ।
ସେପଟେ ତାମିଲନାଡୁ ମୁଖ୍ୟମନ୍ତ୍ରୀ କେ ପଲାନିସ୍ବାମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି ଦାବି କରିଛନ୍ତି କି ରାଜ୍ୟକୁ ଜିଏସଟି ବାବଦରେ ହୋଇଥିବା କ୍ଷତିର ଭରଣା କରାଯାଉ । ଏହା କେନ୍ଦ୍ର ସରକାରଙ୍କ ଦାୟିତ୍ବ । ରାଜ୍ୟ ନିଜେ ଋଣ ନିଅନ୍ତୁ ବୋଲି କହିବା ଦ୍ବାରା ରାଜ୍ୟର ଉତ୍ସ ଉପରେ ପ୍ରଭାବ ପଡିବ ।
