ନୂଆଦିଲ୍ଲୀ: ଋଣ ବୋଝରେ ବୁଡୁଛି ବିଶ୍ବ । ଯାହାକି ଆକଳନ ବାହାରେ। ଆଇଏମଏଫର ରିପୋର୍ଟ ଅନୁଯାୟୀ, ବିଶ୍ବ ଉପରେ 188 ଟ୍ରିଲିୟନ ଡଲାର (ଟଙ୍କାରେ ଏହାର କଳ୍ପନା କରିବା ବେକାର) ଋଣ ବୋଝ ଲଦିହୋଇଛି । ଏ ନେଇ ଅନ୍ତରାଷ୍ଟ୍ରୀୟ ମୁଦ୍ରା କୋଷ(ଆଇଏମଏଫ)ର ପ୍ରମୁଖ କ୍ରିଷ୍ଟଲୀନା ଜର୍ଜିୟେବା ଚିନ୍ତା ପ୍ରକଟ କିରିଛନ୍ତି ।
ସମଗ୍ର ବିଶ୍ବର ମୋଟ ଉତ୍ପାଦନର ଦ୍ବିଗୁଣା ହେବ ଋଣ । ଏହି ଧାରରେ ଯଦି ଅର୍ଥବ୍ୟବସ୍ଥାର ଗତି ଧୀମା ପଡେ, ତେବେ ସରକାର ଓ ବ୍ୟକ୍ତିବିଶେଷ ବିପଦରେ ପଡିଯିବ ବୋଲି ଚେତାବନୀ ଦେଇଛନ୍ତି ଜର୍ଜିୟେବା । ଜୁନରେ ପ୍ରକାଶିତ ରିଜର୍ଭ ବ୍ୟାଙ୍କର ରିପୋର୍ଟ ମୁତାବକ, ଭାରତର ମୋଟ ବାହ୍ୟ ଋଣ 2019 ମାର୍ଚ୍ଚ ସୁଦ୍ଧା 543 ଅରବ ଡଲାର ଥିଲା । ଯାହାକି 2018 ମାର୍ଚ୍ଚ ଅପକ୍ଷୋରେ ପ୍ରାୟ 13.7 ଅରବ ଡଲାର ବୃଦ୍ଧି ପାଇଛି । ମୋଟ ଘରୋଇ ଉତ୍ପାଦ(ଜିଡିପି) ତୁଳନାରେ ଏହି ରାଶି 19.7 ପ୍ରତିଶତ ଥିଲା ।
ସେପଟେ ଯଦି ପଡୋଶୀ ରାଷ୍ଟ୍ର ଚୀନ ସ୍ଥିତି ଦେଖାଯାଏ ତେବେ ସେ ମୋଟ 5 ଟ୍ରିଲିୟନ ଡଲାର ଋଣ ଭିତରେ ରହିଛି । ଯେତେବେଳେ କି ପାକିସ୍ତାନ ଉପରେ କେବଳ ବିଦେଶୀ ଋଣ ହିଁ 105 ଅରବ ଡଲାର(ଚୀନ କର ସାମିଲ ନାହିଁ) ରହିଛି । ଆମେରିକା ଓ ଚୀନ ଭଳି ରାଷ୍ଟ୍ର ସେମାନଙ୍କ ଋଣ ସୁଝିବାରେ ସକ୍ଷମ ହୋଇପାରନ୍ତି ବୋଲି ଆଶା କରାଯାଉଛି ।
ଅନ୍ୟପଟେ ପାକିସ୍ତାନ ଓ ଭାରତ ଭଳି ରାଷ୍ଟ୍ର ପାଇଁ ଏହା କଷ୍ଟସାଧ୍ୟ । କାରଣ ପାକିସ୍ତାନ ବେକାରୀ ଓ ମହଙ୍ଗା ନିଆଁ ଭିତରେ ଗତିକରୁଥିବା ବେଳେ ଭାରତର ଜିଡିପି ଦିନକୁ ଦିନ ଖସିବାରେ ଲାଗିଛି । 5 ବର୍ଷରେ ଭାରତର ବିକାଶ ହାର ସର୍ବନିମ୍ନ ରହିଛି । ତଥାପି ଭାରତର ଜିଡିପି ପଡୋଶୀ ପାକିସ୍ତାନ ତୁଳନାରେ ବହୁତ ଅଧିକ ରହିଛି । ଭାରତର ଅର୍ଥବ୍ୟବସ୍ଥା 2600 ବିଲିୟନ ଡଲାରର, ଯାହା ପାକ୍ଠୁ 9 ଗୁଣା ଅଧିକା ।
