ପୁରୀ: ସାମୁଦ୍ରିକ ଝଡ ଫନି ଯିବାର ଆଜିକୁ ସାତ ଦିନ ବିତିଗଲାଣି ହେଲେ ଯାଇ ନାହିଁ ଫନି ଦେଇଯାଇଥିବା ଯାତନା । ଫନିରେ କିଏ ନିଜ ସର୍ବସ୍ବ ହରାଇ ଭଗବାନ ଭରଷାରେ ତ କିଏ ନିଜ ପ୍ରିୟ ପରିଜନଙ୍କୁ ହରାଇ ମ୍ରିୟମାଣ । ବାତ୍ୟା ଫନି ଅନେକ ଲୋକଙ୍କ ଜୀବିକା ଛଡାଇ ନେଇଥିବା ବେଳେ ଏବେ ଫନି ବିପନ୍ନ ସରକାରଙ୍କ ସହାୟତା ଅପେକ୍ଷାରେ ।
ଚନ୍ଦ୍ରଭାଗା ନୋଳିଆ ସାହିର ବସ୍ତିବାସିନ୍ଦା ଫନି ଚୋଟରେ ଏମିତି କ୍ଷତବିକ୍ଷତ ଯେ ଆଜି ପର୍ଯ୍ୟନ୍ତ ଅଣ୍ଟା ସଳଖି ଛିଡା ହୋଇ ପାରି ନାହାଁନ୍ତି । ଏହି ଗରିବ ବସ୍ତି ବାସିନ୍ଦାଙ୍କ ଘର ସଂପୂର୍ଣ୍ଣ ରୂପେ ବାଲିଚର ହୋଇଯାଇଥିବା ବେଳେ ନିଜ କୌଳିକ ବୃତ୍ତି ପାଇଁ ବ୍ୟବହାର କରୁଥିବା ଡଙ୍ଗା, ମାଛ ଧରା ଜାଲ ଏବେ ପୁରା ନଷ୍ଟ ହୋଇଯାଇଛି । ସେପଟେ ଭୋକ ଉପାସରେ ଡହକ ବିକଳ ହେଉଥିବା ବେଳେ ଯାହା ରିଲିଫ ବାବଦରେ ରନ୍ଧା ଖାଦ୍ୟ ମିଳୁଛି ତାହାକୁ ଖାଇ ରହୁଛନ୍ତି । ଯଦି କୌଣସି ଗାଡି ନୋଳିଆ ସାହିକୁ ଆସିଲା ଲୋକେ ତୁରନ୍ତ ଧାଇଁ ଆସୁଛନ୍ତି କାଳେ ସରକାରୀ ବାବୁ ଆସିଥିବେ କିଛି ରିଲିଫ୍ ଦେବେ । ପୁରୀ ଜିଲ୍ଲା ଚନ୍ଦ୍ରଭାଗା ନୋଳିଆ ସାହିର ଏହି ଗରିବ ମତ୍ସ୍ୟଜୀବି ଏବେ ନିଜ ସର୍ବସ୍ବ ହରାଇ ସରକାରୀ ସହାୟତା ଅପେକ୍ଷାରେ ।
ସେପଟେ ପୁରୀ ମତ୍ସ୍ୟଜୀବି ସମାଜ ସଭାପତି ଉକ୍ତ ବସ୍ତିକୁ ପରିର୍ଦଶନରେ ଆସି ସମସ୍ତ ଫନି କ୍ଷତିଗ୍ରସ୍ତ ଲୋକଙ୍କୁ ଘର ଯୋଗାଇ ଦେବାକୁ ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି ।
ପୁରୀରୁ ତାପସ ପରିଡା, ଇଟିଭି ଭାରତ
