କୋରାପୁଟ: ଜୁଲାଇ 4ରେ ବିଶ୍ବ ପ୍ରସିଦ୍ଧ ରଥଯାତ୍ରା । ମହାପ୍ରଭୁ ଜଗନ୍ନାଥଙ୍କ ଏହି ପବିତ୍ର ରଥଯାତ୍ରା ପାଇଁ ଚଳଚଞ୍ଚଳ ଶାବର ଶ୍ରୀକ୍ଷେତ୍ର । ପବିତ୍ର ଅକ୍ଷୟ ତୃତୀୟାରୁ ରଥ ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ମାତ୍ର ସମୟ ପୂର୍ବରୁ ରଥ ନିର୍ମାଣ କାର୍ଯ୍ୟକୁ ସୁଚାରୁ ରୂପେ ଶେଷ କରିବାକୁ ଓଡିଶାର ବିଶିଷ୍ଟ ଶିଳ୍ପୀ ଏହାର ନିର୍ମାଣ କାର୍ଯ୍ୟରେ ଲାଗିଛନ୍ତି ।
ତିନି ରଥ ଉପରେ ସ୍ଥାପନା ହେବାକୁ ଥିବା ପିତ୍ତଳର ବିଶାଳ କଳସ କଣ୍ଟିଲୋର ଶିଳ୍ପୀ ତିଆରି କରିଛନ୍ତି । ସେହିପରି ରଘୁରାଜପୁରର ଜାତୀୟ ପୁରସ୍କାର ପ୍ରାପ୍ତ ଶିଳ୍ପୀ ଲକ୍ଷ୍ମୀଧର ସୁବୁଦ୍ଧିଙ୍କ ନେତୃତ୍ୱରେ ଆସିଥିବା 5 ଜଣିଆ ବିଶିଷ୍ଟ କାରିଗରଙ୍କ ଦ୍ୱାରା ନିର୍ମିତ ହେଉଛି 3ଟି ରଥ ଉପରର ଘୋଡା ଓ ସାରଥୀ । ପ୍ରତିବର୍ଷ ରଥରେ 2ଟି ଘୋଡା ଲାଗୁଥିବାବେଳେ ଚଳିତ ବର୍ଷ ପ୍ରତିଟି ରଥରେ 4ଟି ଘୋଡା ଲାଗିବ ବୋଲି ସୂଚନା ରହିଛି ।
ଦୀର୍ଘ ବର୍ଷ ଧରି କୋରାପୁଟରେ ଅନୁଷ୍ଠିତ ହେଉଥିବା ଚତୁର୍ଦ୍ଧା ମୂର୍ତ୍ତିଙ୍କ ଏହି ରଥଯାତ୍ରାରେ ନିଜର ସମସ୍ତ କଳାତ୍ମକ କାର୍ଯ୍ୟ ସମ୍ପାଦନ କରି ଆସୁଛନ୍ତି ବିଶିଷ୍ଟ ଚିତ୍ରଶିଳ୍ପୀ ଖଗେଶ୍ବର ବେହେରା । ମାତ୍ର ଚଳିତ ବର୍ଷ 3ଟି ରଥରେ ଲାଗୁଥିବା କନା ଠାରୁ ଆରମ୍ଭ କରି ରଥରେ ଲାଗିବାକୁ ଥିବା ପାର୍ଶ୍ଵ ଦେବୀଙ୍କ ପ୍ରତିମୂର୍ତ୍ତି ତିଆରିରେ ମନୋନିବେଶ କରିଛନ୍ତି ।
ଜଗନ୍ନାଥଙ୍କ ରଥ ତିଆରି କରି ନବରଙ୍ଗପୁର ଜିଲ୍ଲା ସମେତ ଅନ୍ୟାନ୍ୟ ସ୍ଥାନରେ ଖ୍ୟାତି ଅର୍ଜନ କରିଥିବା ବିଶିଷ୍ଟ ମହାରଣା ସନ୍ୟାସୀ ମାଝୀ ତାଙ୍କ ସହଚରଙ୍କ ସମେତ ରଥ କାର୍ଯ୍ୟରେ ଅନ୍ତିମ ପର୍ଯ୍ୟାୟର ସ୍ପର୍ଶ ଦେଉଛନ୍ତି । ଏଥିସହିତ ଖୁବ୍ କମ ସମୟ ମଧ୍ୟରେ ରଥ କାମ ସମ୍ପୂର୍ଣ୍ଣ କରିବାକୁ ଆଶା ରଖିଛନ୍ତି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ
