ସୁବର୍ଣ୍ଣପୁର: ବୀରମହାରାଜପୁର ଉପଖଣ୍ଡର କର୍ଣ୍ଣପାଲି ଗାଁରେ ଯୁବକକୁ ଗଳା କାଟି ହତ୍ୟା ଉଦ୍ୟମ କରିଥିବା ମୁଖ୍ୟ ଅଭିଯୁକ୍ତକୁ ଗିରଫ କରିଛି ପୋଲିସ । ଘଟଣାର ମୁଖ୍ୟ ଅଭିଯୁକ୍ତ ଚମ୍ପମାଲ ଗାଁର ସୁଦାମ ମେଣ୍ଡଳୀ । ସୁଦାମକୁ ପୋଲିସ କଟକରୁ ଗିରଫ କରିଛି ।
ସୂଚନାନୁସାରେ, ଗତ ଜୁନ ମାସ 10 ତାରିଖ ରାତିରେ ବାସୁଦେବ ଖଣ୍ଡଗିରି ନିଜ ପତ୍ନୀଙ୍କ ସହିତ ଛାତ ଉପରେ ଶୋଇଥିଲେ । ଏହି ସମୟରେ ଅଭିଯୁକ୍ତ ସୁଦାମ ଏକ ସିଡିରେ ଛାତ ଉପରକୁ ଯାଇ ବାସୁଦେବଙ୍କ ଗଳାକାଟି ଫେରାର ହୋଇଯାଇଥିଲା । ବାସୁଦେବକୁ ଚିକିତ୍ସା ପାଇଁ ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟ ପରେ ବୁର୍ଲାକୁ ସ୍ଥାନାନ୍ତର କରାଯାଇଥିଲା । ବାସୁଦେବ ଏବେ ସୁସ୍ଥ ହୋଇ ଘରେ ଥିବାବେଳେ ମୁଖ୍ୟ ଅଭିଯୁକ୍ତ ସୁଦାମକୁ ପୋଲିସ ଘଟଣାର 21 ଦିନ ପରେ ଗିରଫ କରିବାରେ ସଫଳ ହୋଇଛି ।
ତେବେ ଘଟଣାରେ ସମ୍ପୃକ୍ତ ଅନ୍ୟ 2 ଅଭିଯୁକ୍ତ ଏଯାଏଁ ପୋଲିସ ହାତରେ ଧରାପଡ଼ିନାହାଁନ୍ତି । ଘଟଣାରେ ବ୍ୟବହୃତ ଛୁରୀ ସହିତ ଅନ୍ୟ ସାମଗ୍ରୀ ଜବତ କରିଛି ପୋଲିସ । ଆସନ୍ତାକାଲି ପୋଲିସ ଅଭିଯୁକ୍ତକୁ କୋର୍ଟ ଚାଲାଣ କରିବ ବୋଲି ଜଣାପଡ଼ିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
