ଲକ୍ଷ୍ନୌ: ବହୁଚର୍ଚ୍ଚିତ ବାରାଣାସୀର ଜ୍ଞାନବ୍ୟାପୀ ମସଜିଦ ଏବଂ କାଶୀ ବିଶ୍ୱନାଥ ମନ୍ଦିର ବିବାଦ ମାମଲାରେ ବାରାଣାସୀ ସିଭିଲ କୋର୍ଟ ଆଜି (ଗୁରୁବାର) ଗୁରୁତ୍ବପୂର୍ଣ୍ଣ ରାୟ ପ୍ରକାଶ କରିଛନ୍ତି । କୋର୍ଟ କମିଶନରଙ୍କୁ ହଟାଯିବା ନେଇ ହୋଇଥିବା ଆବେଦନକୁ ଖାରଜ କରିବା ସହ କମିଶନର ଏହି ମାମଲାର ତଦନ୍ତ ଜାରି ରଖିବା ନେଇ କୋର୍ଟ ସ୍ପଷ୍ଟ କରିଛନ୍ତି ।
ମସଜିଦ ପରିସରରେ ଥିବା ଶୃଙ୍ଗାରଗୌରୀ ମନ୍ଦିର ମାମଲାରେ ପୂର୍ବ କୋର୍ଟ କମିଶନର ଅଜୟ ମିଶ୍ରଙ୍କ ସହ କାର୍ଯ୍ୟରେ ସହଯୋଗ କରିବା ପାଇଁ ଅନ୍ୟ ଅନ୍ୟ ଦୁଇଜଣ ଓକିଲ ଅଜୟ ଏବଂ ବିଶାଲ ସିଂଙ୍କୁ ସହାୟକ ଭାବେ ନିଯୁକ୍ତି ପ୍ରଦାନ କରିଛନ୍ତି କୋର୍ଟ । ଏହି 3 କୋର୍ଟ କମିଶନର ବର୍ତ୍ତମାନ ଭିଡିଓଗ୍ରାଫି ମାଧ୍ୟମରେ ସର୍ଭେ ଜାରି ରଖିବେ ଓ ମେ 17 ତାରିଖରେ ବାରାଣାସୀ କୋର୍ଟରେ ସର୍ଭେ ରିପୋର୍ଟ ଦାଖଲ କରିବେ ।
ମାମଲା କୋର୍ଟରେ ପହଞ୍ଚିବା ପରେ ଭିଡିଓଗ୍ରାଫି ମାଧ୍ୟମରେ ସର୍ଭେ ପାଇଁ କୋର୍ଟ ନିର୍ଦ୍ଦେଶ ଦେବା ସହ ଏଥିପାଇଁ କୋର୍ଟ କମିଶନର ମଧ୍ୟ ନିଯୁକ୍ତ କରିଥିଲେ । ତେବେ ଭିଡିଓଗ୍ରାଫି ସର୍ଭେ ଆରମ୍ଭ ହେବାର ପ୍ରଥମ ଦିନରୁ ମୁସଲିମ ପକ୍ଷ ଏହାକୁ ବିରୋଧ କରି ଆସୁଛନ୍ତି । ସର୍ବେକ୍ଷଣ ସମୟରେ ଜ୍ଞାନବ୍ୟାପୀ ମସଜିଦ କ୍ୟାମ୍ପସ ବାହାରେ ଉତ୍ତେଜନା ପ୍ରକାଶ ପାଇବା ସହ ସର୍ଭେ ଏବଂ ଭିଡିଓଗ୍ରାଫି ବନ୍ଦ କରିବାକୁ ମୁସଲିମ ପକ୍ଷଙ୍କ ତରଫରୁ ଦାବି କରାଯାଇଥିଲା । ଜ୍ଞାନବ୍ୟାପୀ ମସଜିଦ ଏବଂ କାଶୀ ବିଶ୍ୱନାଥ ମନ୍ଦିର ବିବାଦ ସମ୍ପର୍କିତ ହାଇକୋର୍ଟରେ ମୋଟ 6ଟି ଭିନ୍ନ ଭିନ୍ନ ମାମଲା ଏବେ ବିଚାରାଧୀନ ରହିଛି ।
ଏହା ସହିତ କୋର୍ଟ କହିଛନ୍ତି, ଯଦି କେହି ସର୍ଭେ କାର୍ଯ୍ୟରେ ବାଧା ସୃଷ୍ଟି କରେ ତା ବିରୋଧରେ କର୍ତ୍ତୃପକ୍ଷ ଏତଲା ରୁଜୁ କରିପାରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
