ମୁମ୍ବାଇ: ମହାରାଷ୍ଟ୍ର ଥାନେରେ ପ୍ରେମିକା ଉପରେ ପ୍ରେମିକ ଗାଡି ଚଢାଇଦେବା ଘଟଣା । ଗତକାଲି (ରବିବାର) ଘଟଣାର ମୁଖ୍ୟ ଅଭିଯୁକ୍ତ ଅଶ୍ବଜିତ ଗାଏକୱାଡ ଗିରଫ ହେବା ପରେ ଆଜି ଥାଣେ କୋର୍ଟ ମୁଖ୍ୟ ଅଭିଯୁକ୍ତ ସମେତ ୩ ଜଣଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି । କୋର୍ଟ ଅଶ୍ବଜିତ ଗାଏକୱାଡ, ରୋମିଲ ପାଟିଲ ଓ ସାଗ ସେଜକୁ ୧୫ ହଜାର ଟଙ୍କା ବଦଳରେ ଜାମିନ ପ୍ରଦାନ କରିଛନ୍ତି ।
ରବିବାର ସନ୍ଧ୍ୟାରେ ସ୍ବତନ୍ତ୍ର ତଦନ୍ତକାରୀ ଟିମ (SIT) ଘଟଣାର ୩ ଜଣ ଅଭିଯୁକ୍ତଙ୍କୁ ଗିରଫ କରିଥିଲା । ଏହାସହିତ ଏହି ହତ୍ୟା ଉଦ୍ୟମ ଘଟଣାରେ ବ୍ୟବହୃତ ହୋଇଥିବା ଯାନକୁ ମଧ୍ୟ ଜବତ କରାଯାଇଥିଲା । ତେବେ ଆଜି ଥାନେ କୋର୍ଟରେ ଅଭିଯୁକ୍ତମାନଙ୍କୁ ହାଜର କରାଯିବା ପରେ କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି । ଅଭିଯୁକ୍ତମାନେ ଗିରଫ ହେବାର ୨୪ ଘଣ୍ଟା ମଧ୍ୟରେ ସେମାନଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି । ଏହି ଘଟଣାର ମୁଖ୍ୟ ଅଭିଯୁକ୍ତ ହେଉଛି ବରିଷ୍ଠ ଆଇଏଏସ ଅଧିକାରୀ ଅନିଲ ଗାଏକୱାଡଙ୍କ ପୁଅ ଅଶ୍ବଜିତ ଗାଏକୱାଡ ।
ଏହା ବି ପଢନ୍ତୁ- ପ୍ରେମିକା ଉପରେ ପ୍ରେମିକ ଗାଡ଼ି ଚଢାଇ ଦେବା ଘଟଣା, ପୀଡ଼ିତାଙ୍କ ଉପରେ ଚାପ ପକାଉଛି ପୋଲିସ !
ସୂଚନା ଥାଉ କି ଅଭିଯୁକ୍ତ ଜଣକ ବଡ଼ ବଡ଼ିଆଙ୍କ ପୁଅ ହୋଇଥିବାରୁ ପୋଲିସ ପ୍ରଥମେ ମାମଲା ରୁଜୁ କରିନଥିଲା । ହେଲେ ପରବର୍ତ୍ତୀ ସମୟରେ ପ୍ରେମିକା ଜଣକ ସୋସିଆଲ ମିଡିଆରେ କିଛି ଭିଡିଓ ସହିତ ପୋଷ୍ଟ କରିବା ପରେ ଆକ୍ସନ ମୋଡକୁ ଆସିଥିଲା ପୋଲିସ । ଏହାପରେ ମାମଲା ରୁଜୁ ହୋଇ ଘଟଣାର ତଦନ୍ତ ଆରମ୍ଭ ହୋଇଛି । ଅଭିଯୁକ୍ତ ବିରୋଧରେ ଇଣ୍ଡିଆନ ପେନାଲ କୋଡର ଧାରା ୨୭୯, ୩୩୮, ୩୨୩, ୫୦୪ ଓ ୩୪ ଅନୁଯାୟୀ ମାମଲା ରୁଜୁ ହୋଇଛି ।
ରବିବାର କିଛି ପୋଲିସ ଅଫିସର ପୀଡ଼ିତାଙ୍କ ନିକଟକୁ ଆସି ଏକ ପେପରରେ ଦସ୍ତଖତ କରିବାକୁ ବାଧ୍ୟ କରୁଥିଲେ ବୋଲି ଅଭିଯୋଗ ଆଣିଥିଲେ ପୀଡ଼ିତା । ପୀଡ଼ିତାଙ୍କ ନିକଟରେ ତାଙ୍କ ପରିବାର ସଦସ୍ୟ ଓ ଓକିଲ ନଥିବାରୁ ସେ ଦସ୍ତଖତ କରିବାକୁ ମନା କରିଦେଇଥିଲେ । ଏହାପରେ ପୋଲିସ ଅଫିସରମାନେ କ୍ରୋଧିତ ହୋଇପଡ଼ିଥିଲେ । ତଥାପି ସେ ଦସ୍ତଖତ ନ କରିବା ପରେ ପୋଲିସ ଅଫିସରମାନେ ଚାଲିଯାଇଥିଲେ । ସେ ଅଭିଯୁକ୍ତ ସହିତ ପ୍ରାୟ ସାଢେ ୪ ବର୍ଷ ହେବ ସମ୍ପର୍କରେ ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
