ଜୟପୁର: ରାଜସ୍ଥାନର ସିରୋହିରେ ଏକ ଲଜ୍ୟାଜନକ ଘଟଣା ଦେଖିବାକୁ ମିଳିଛି । ଏହା ଏଭଳି ଏକ ଘଟଣା, ଯାହା ମାନବିକତା ଉପରେ ମଧ୍ୟ ପ୍ରଶ୍ନ ଉଠାଇଛି । ଏହି ଘଟଣା ଆବୁରୋଡ ଅଞ୍ଚଳର ହୋଇଥିବାବେଳେ ଜଣେ ପୁଅ ମା’ର ଅନ୍ତିମ ସଂସ୍କାର କରିବାକୁ ମନା କରିଦେଇଛି । କାରଣ ମା’ଙ୍କ କୋରୋନାରେ ମୃତ୍ୟୁ ହୋଇଥିବା ଅନୁମାନ କରି ପୁଅ ମୃତଦେହ ନିକଟକୁ ଯିବା ପାଇଁ ମନା କରିଦେଇଛି । ତେବେ ମହିଳାଙ୍କ ମୃତଦେହ ଘର ଭିତରେ ସେମିତି ପଡି ରହିଥିଲା ।
ଏନେଇ ପଡୋଶୀ ଖବର ପାଇବା ପରେ ମ୍ୟୁନିସପାଲିଟିକୁ ସୂଚନା ଦେଇଥିଲେ । ତେବେ ପୌରସଂସ୍ଥାକୁ ଏ ବିଷୟରେ ଅବଗତ କରାଯିବା ପରେ ସେମାନେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ମହିଳାଙ୍କ ମୃତଦେହକୁ ମୋକ୍ଷଧାମକୁ ନେବା ପାଇଁ ବ୍ୟବସ୍ଥା କରିଥିଲେ । କିନ୍ତୁ ପରିତାପର ବିଷୟ ଯେ ମହିଳାଙ୍କ ମୃତଦେହ କୌଣସି ଆମ୍ବୁଲାନ୍ସ ନୁହେଁ ବରଂ ଅଳିଆ ଗାଡ଼ିରେ ନିଆ ଯାଇଥିଲା ।
ସୂଚନା ଅନୁଯାୟୀ, ମହିଳା ଜଣକ ଦୀର୍ଘ ସମୟ ଧରି ଅସୁସ୍ଥ ଥିଲେ । ମହିଳାଙ୍କ ପୁଅ ସହର ବାହାରେ ରୁହନ୍ତି ଏବଂ କିଛି ଦିନ ପୂର୍ବରୁ ଘରକୁ ଆସିଥିଲେ | ଏହା ପରେ ମହିଳାଙ୍କ ମୃତ୍ୟୁ ହୋଇଥିଲା । ତେବେ ବୋହୂ ମନାଇବା ପରେ ପୁଅ ମା’ଙ୍କ ଅନ୍ତିମ ସଂସ୍କାରରେ ଯୋଗ ଦେଇଥିଲେ ।
