ନୂଆଦିଲ୍ଲୀ: ବହୁଚର୍ଚ୍ଚିତ ଲ୍ୟାଣ୍ଡ ଫର ଜବ (ଚାକିରି ବଦଳରେ ଜମି) ମାମଲାରେ ପୂର୍ବତନ ବିହାର ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ ଓ ପୁଅ ତଥା ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କୁ ପୁଣି ସମନ ଜାରି କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) । ଶୁକ୍ରବାର (22 ତାରିଖ) ପୁଅ ତେଜସ୍ବୀଙ୍କୁ ଇଡି କାର୍ଯ୍ୟାଳୟରେ ହାଜର ହେବା ପାଇଁ ନୋଟିସ ଥିବା ବେଳେ ଲାଲୁଙ୍କୁ 27 ତାରିଖରେ ହାଜର ହେବା ପାଇଁ ସମନରେ ଉଲ୍ଲେଖ ରହିଛି । ପୂର୍ବରୁ ଏହି ମାମଲାରେ ଉଭୟ ବେଲରେ ଅଛନ୍ତି ।
90 ଦଶକରେ ଲାଲୁ ରେଳମନ୍ତ୍ରୀ ଥିବା ସମୟରେ ରେଳବାଇରେ ନିଯୁକ୍ତି କ୍ଷେତ୍ରରେ ଏହି ବହୁଚର୍ଚ୍ଚିତ ଘୋଟାଲା ହୋଇଥିଲା । ଏହି ମାମଲାର ତଦନ୍ତ ଉଭୟ କେନ୍ଦ୍ରୀୟ ସଂସ୍ଥା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଓ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ବାରା ଜାରି ରହିଛି । ଅକ୍ଟୋବର ମାସରେ ଦିଲ୍ଲୀର ଏକ କୋର୍ଟ ଲାଲୁ ଯାଦବ, ବିହାର ପୂର୍ବତନ ମୁଖ୍ୟମନ୍ତ୍ରୀ ତଥା ପତ୍ନୀ ରାବିଡି ଦେବୀ ଓ ପୁଅ ତେଜସ୍ବୀ ଯାଦବଙ୍କୁ ବେଲ ପ୍ରଦାନ କରିଛନ୍ତି । ତଦନ୍ତକାରୀ ସଂସ୍ଥା ଏହି ମାମଲାରେ ଦ୍ବିତୀୟ ଚାର୍ଜସିଟ ମଧ୍ୟ ଦାଖଲ କରିସାରିଛି । ତେବେ ଏବେ ଉଭୟ ଯାଦବ ବାପ-ପୁଅଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ପୁଣି ସମନ ଜାରି କରିଛି । ଉଭୟ ଜେରା ପାଇଁ ହାଜର ହେବେ କି ସମନରୁ ଆଶ୍ବସ୍ତି ପାଇବା ପାଇଁ କୋର୍ଟଙ୍କ ଦ୍ବାରସ୍ଥ ହେବେ, ସେ ନେଇ କିଛି ପ୍ରତିକ୍ରିୟା ସାମ୍ନାକୁ ଆସିନି ।
ଏହା ମଧ୍ୟ ପଢନ୍ତୁ: -ଖଲିସ୍ତାନୀ ଆତଙ୍କୀ ପନ୍ନୁ ହତ୍ୟା ମାମଲାରେ ମୁହଁ ଖୋଲିଲେ ପ୍ରଧାନମନ୍ତ୍ରୀ ମୋଦି
କ'ଣ ଏହି ଲ୍ୟାଣ୍ଡ ଫର ଜବ ସ୍କାମ:
ଲାଲୁ ପ୍ରସାଦ ଯାଦବ ୨୦୦୪ ରୁ ୨୦୦୯ ମସିହା ପର୍ଯ୍ୟନ୍ତ ମନମୋହନ ସିଂ ନେତୃତ୍ବାଧୀନ ୟୁପିଏ-1 ସରକାରରେ ରେଳମନ୍ତ୍ରୀ ଥିଲେ । ସେହି ସମୟରେ ସେ ରେଳ ବିଭାଗରେ ଚାକିରି ଦେବା ପାଇଁ ଆଶାୟୀଙ୍କ ଠାରୁ ଲାଞ୍ଚ ଭାବେ ଜମି ନେଇଥିବା ଅଭିଯୋଗ ହୋଇଥିଲା । ଏଥିରେ ରେଳବାଇର ତତ୍କାଳୀନ ବହୁ ବରିଷ୍ଠ ଅଧିକାରୀ ମଧ୍ୟ ସମ୍ପୃକ୍ତି ଥିବା ଅଭିଯୋଗ ହୋଇଥିଲା । ଏହି ମାମଲାରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ଲାଲୁଙ୍କ ସମେତ ପତ୍ନୀ ତଥା ପୂର୍ବତନ ବିହାର ମୁଖ୍ୟମନ୍ତ୍ରୀ ରାବେଡି ଦେବୀ, ଲାଲୁଙ୍କ ସାଂସଦ ଝିଅ ମିସା ଭାରତୀ, ରେଳବାଇର ତତ୍କାଳୀନ ଜେନେରାଲ ମ୍ୟାନେଜରଙ୍କ ସମେତ ୧୪ ଜଣଙ୍କ ନାଁରେ ଚାର୍ଜସିଟ୍ ଦାଖଲ କରିଥିଲା । ସିବିଆଇ ପରେ ଏହି ଘଟଣାରେ ପ୍ରବର୍ତ୍ତନ ନିର୍ଦ୍ଦେଶାଳୟ ମଧ୍ୟ ଏଣ୍ଟ୍ରିଂ ମାରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
