ନୂଆଦିଲ୍ଲୀ: ଇସଲାମ ଧର୍ମର ପବିତ୍ର ଧାର୍ମିକସ୍ଥଳୀ ସାଉଦି ଆରବର ମକ୍କାରେ ଚଳିତ ବର୍ଷର ହଜ୍ ତୀର୍ଥ ଯାତ୍ରାକୁ ନେଇ କେନ୍ଦ୍ର ସରକାର କୌଣସି ନିଷ୍ପତ୍ତି ନେଇନାହାନ୍ତି । ସାଉଦି ଆରବ ସରକାରଙ୍କ ନିଷ୍ପତ୍ତିକୁ ଭାରତ ସମର୍ଥନ କରିବ ବୋଲି ସଂଖ୍ୟାଲଘୁ ବ୍ୟାପାର ମନ୍ତ୍ରୀ ମୁଖତର ଅବ୍ବାସ ନକଭି ଶନିବାର କହିଛନ୍ତି ।
ପ୍ରତିବର୍ଷ ସାଉଦି ଆରବର ମକ୍କାରେ ହଜ୍ ତୀର୍ଥଯାତ୍ରା ଅନୁଷ୍ଠିତ ହୋଇଥାଏ । 2020 ମସିହାରେ କୋରୋନା ମହମାରୀ ପାଇଁ ଏହି ଯାତ୍ରା ବାତିଲ କରାଯାଇଥିଲା । କିନ୍ତୁ ଚଳିତ ବର୍ଷ ହଜ୍ ଯାତ୍ରା ସାଉଦି ଆରବ ସରକାରଙ୍କ ଉପରେ ନିର୍ଭର କରୁଛି । ସାଉଦି ଆରବ ସରକାରଙ୍କ ନିଷ୍ପତ୍ତିକୁ ଭାରତ ସମର୍ଥନ କରିବ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି । କିନ୍ତୁ ଚଳିତ ବର୍ଷ ହଜ ଯାତ୍ରା ଲାଗି କୌଣସି ନିଷ୍ପତ୍ତି ନିଆଯାଇନାହିଁ ବୋଲି ନକଭି କହିଛନ୍ତି ।
ଗତବର୍ଷ ସାଉଦି ଆରବରେ ରହୁଥିବା ଲୋକଙ୍କୁ ହଜ୍ରେ ସାମିଲ ହେବା ପାଇଁ ଅନୁମତି ଦିଆଯାଇଥିଲା । ଅନ୍ୟ ଦେଶର ଲୋକଙ୍କ ପାଇଁ ଏହାକୁ ବାତିଲ କରାଯାଇଥିଲା । ଅନ୍ୟ ଦେଶର ଶ୍ରଦ୍ଧାଳୁମାନେ ଏଥିରେ ସାମିଲ ହୋଇପାରିନଥିଲେ । ଗତବର୍ଷ ସାଉଦି ଆରବ ସରକାର ହଜ ପାଇଁ ଆସୁଥିବା ଶ୍ରଦ୍ଧାଳୁଙ୍କ ବିମାନ ଯାତ୍ରାକୁ ବାତିଲ କରିବା ପାଇଁ ନିଷ୍ପତ୍ତି ନେଇଥିଲେ । ଜୁଲାଇ ମାସ ଶେଷ ବେଳକୁ ଗତବର୍ଷ ହଜ୍ କିଛି ଶ୍ରଦ୍ଧାଳୁଙ୍କୁ ନେଇ ଆରମ୍ଭ ହୋଇଥିଲା ।
ମହାମାରୀ ସମୟରେ ସାଉଦି ଆରବ ସହିତ ଭାରତ ଦ୍ବିପାକ୍ଷିକ ସହଯୋଗ ରହିଛି । ଏଣୁ ସାଉଦି ଆରବ ସରକାରଙ୍କ ନିଷ୍ପତ୍ତିକୁ ଭାରତ ସମ୍ମାନ ଜଣାଇବ ବୋଲି ନକଭି କହିଛନ୍ତି । ଏହି ପବିତ୍ର ଯାତ୍ରାରେ 20 ଲକ୍ଷର ଊର୍ଦ୍ଧ୍ବ ଶ୍ରଦ୍ଧାଳୁ ଯୋଗଦାନ କରିଥାନ୍ତି । ଗତ 2019 ମସିହାରେ କେବଳ ଭାରତରୁ 2 ଲକ୍ଷ ମୁସଲିମ ଧର୍ମାବଲମ୍ବୀ ଶ୍ରଦ୍ଧାଳୁ ଯୋଗ ଦେଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
