ନୂଆଦିଲ୍ଲୀ: କୋଭିଡ କାରଣରୁ ସ୍ଥଗିତ ରହିଥିବା ସାଂସଦ ପାଣ୍ଠି ଖର୍ଚ୍ଚକୁ ନେଇ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛି କେନ୍ଦ୍ର କ୍ୟାବିନେଟ । ଏଣିକି ଏହି ସାଂସଦ ଖର୍ଚ୍ଚ କରିପାରିବେ ସାଂସଦ ପାଣ୍ଠି । ଚଳିତ ବର୍ଷ ଅର୍ଥାତ 2021-22 ର ଅବଶିଷ୍ଟାଂଶ ସଂସଦର ସ୍ଥାନୀୟ କ୍ଷେତ୍ର ବିକାଶ ଯୋଜନା (MPLADS) ରାଶି ସାଂସଦଙ୍କୁ ପ୍ରଦାନ କରାଯିବ । ସେହିପରି ୨୦୨୨-୨୩ ରୁ 2025-26 ଆର୍ଥିକ ପର୍ଯ୍ୟନ୍ତ ସ୍ବାଭାବିକ ଭାବେ ସାଂସଦ ମାନେ ସେମାନଙ୍କ ପାଣ୍ଠି ଖର୍ଚ୍ଚ କରିପାରିବେ । ଆଜିି ବସିଥିବା କେନ୍ଦ୍ର କ୍ୟାବିନେଟରେ ଏହି ନଷ୍ପତ୍ତି ଉପରେ ମୋହର ବାଜିଛି ।
କୋଭିଡ-19 ମହାମାରୀକୁ ଦୃଷ୍ଟିରେ ରଖି ଏପ୍ରିଲ 2020 ରେ ସାଂସଦ ପାଣ୍ଠି ଅସ୍ଥାୟୀ ଭାବରେ ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲା କେନ୍ଦ୍ର ସରକାର । ତତ୍କାଳୀନ କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର ଘୋଷଣା କରିଥିଲେ ଯେ,2 ବର୍ଷ ପାଇଁ ସାଂସଦ ପାଣ୍ଠିର ଖର୍ଚ୍ଚକୁ ବନ୍ଦ ରଖାଯିବା ସହ ଏକତ୍ରିତ ରାଶି ମୋଟ 7,900 କୋଟି ଦେଶର ରାଜସ୍ବରେ ମିଶ୍ରିତ ହେବ । ଯାହା କୋଭିଡ ମୁକାୁବିଲା ସହାୟତା ଦିଗରେ ଖର୍ଚ୍ଚ କରାଯାଇପାରିବ ।
ଆଜି ବସିଥିବା କ୍ୟାବିନେଟ ବୈଠକରେ ହୋଇଥିବା ନିଷ୍ପତ୍ତି ସମ୍ପର୍କରେ ଗଣମାଧ୍ୟମକୁ ସୂଚନା ଦେଇ କେନ୍ଦ୍ରମନ୍ତ୍ରୀ ଅନୁରାଗ ଠାକୁର କରିଛନ୍ତି ଯେ, ଏହି ସାଂସଦ ପାଣ୍ଠି ଯୋଜନା ପନଃକାର୍ଯ୍ୟକ୍ଷମ ହେବା ନିଷ୍ପତ୍ତିକୁ କେନ୍ଦ୍ର କ୍ୟାବିନେଟ ଅନୁମୋଦନ ଦେଇଛି । ଏହା 2025-26 ବର୍ଷ ପର୍ଯ୍ୟନ୍ତ କାର୍ଯ୍ୟକ୍ଷମ ରହିବ । ସେହିପରି 2021-22 ଆର୍ଥିକ ବର୍ଷର ଅବଶିଷ୍ଟାଂଶ ପାଣ୍ଠି ପ୍ରାୟ 2କୋଟି ଟଙ୍କାର ରାଶି ସାଂସଦ ମଧ୍ୟ ଖର୍ଚ୍ଚ କରିପାରିବେ ।
ସେହିପରି ୨୦୨୨-୨୩ ରୁ ୨୦୨୫-୨୬ ଆର୍ଥିକ ବର୍ଷ ପର୍ଯ୍ୟନ୍ତ ଏହି ପାଣ୍ଠି ପ୍ରତ୍ୟେକ ସାଂସଦଙ୍କ ପାଇଁ ବାର୍ଷିକ 5 କୋଟି ଟଙ୍କା ହାରରେ ପ୍ରତ୍ୟେକ କିସ୍ତିରେ 2.5 କୋଟି ଟଙ୍କା ପ୍ରଦାନ କରାଯିବ। ସାଂସଦ ପାଣ୍ଠି ବା(MPLADS) 1993ରେ ତତ୍କାଳୀନ ପ୍ରଧାନମନ୍ତ୍ରୀ ନରସିଂହ ରାଓଙ୍କ ନେତୃତ୍ବାଧୀନ ସରକାର ସମୟରେ ଆରମ୍ଭ ହୋଇଥିଲା।
ବ୍ୟୁରୋ ରିପୋର୍ଟ, ଇଟିଭି ଭାରତ
