ଗାନ୍ଧୀନଗର: ଗୁଜୁରାଟର ଆମରେଲି ଭୟଙ୍କର ସଡ଼କ ଦୁର୍ଘଟଣା, ଯେଉଁଥିରେ ଅତି କମରେ 8 ଜଣଙ୍କର ମୃତ୍ୟୁ ହୋଇଛି । ମୃତକ ସମସ୍ତେ ଗୋଟିଏ ପରିବାରର । ଏହି ଦୁର୍ଘଟଣାରେ 4 ଜଣ ଆହତ ମଧ୍ୟ ହୋଇଛନ୍ତି ।
ସୂଚନାନୁସାରେ, ଆମରେଲି ଜିଲ୍ଲାର ସାବରକୁଣ୍ଡଲାର ବାଢଦା ଗ୍ରାମ ନିକଟରେ ରାସ୍ତା କଡ଼ରେ ଏକ ପରିବାର ଶୋଇଥିବା ବେଳେ ହଠାତ୍ ଏକ ଟ୍ରକ୍ ସେମାନଙ୍କ ଉପରେ ମାଡ଼ିଯାଇଥିଲା । ଏହି କାରଣରୁ ଘଟଣାସ୍ଥଳରେ 8 ଜଣଙ୍କର ମୃତ୍ୟୁ ହୋଇଥିବା ବେଳେ 4ରୁ ଅଧିକଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି । ତେବେ ମୃତକଙ୍କ ମଧ୍ୟରେ 8 ଏବଂ 13 ବର୍ଷ ବୟସର ଦୁଇ ପିଲା ଏବଂ ଦୁଇଜଣ ବୃଦ୍ଧ ବ୍ୟକ୍ତି ଅଛନ୍ତି । ଏହି ଟ୍ରକଟି ନିୟନ୍ତ୍ରଣ ହରାଇ ରାସ୍ତା କଡ଼ରେ ଥିବା ଏକ ଝୁମ୍ପୁଡ଼ି ଉପରେ ପଡ଼ିଯାଇଥିବା ଆମରେଲି ପୋଲିସ ଅଧୀକ୍ଷକ ନିର୍ଲିପ୍ତ ରାୟ କହିଛନ୍ତି।
ତେବେ ଏହି ଦୁର୍ଘଟଣା ରାତି ପ୍ରାୟ 3 ବେଳେ ଘଟିଥିବା ବେଳେ ଏହି ଟ୍ରକଟି ରାଜକୋଟରୁ ଆମରେଲିର ଜାଫ୍ରାବାଦ ଅଭିମୁଖେ ଯାଉଥିଲା ବୋଲି କୁହାଯାଇଛି । ସୂଚନା ପାଇବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚି କାର୍ଯ୍ୟାନୁଷ୍ଠାନ ଆରମ୍ଭ କରିଛି । ମୃତ ବ୍ୟକ୍ତିମାନେ ପୂଜାବେନ୍ ସୋଲାଙ୍କି (8), ଲକ୍ଷ୍ମୀବେନ୍ ସୋଲାଙ୍କି (30), ଶୁକାନବେନ୍ ସୋଲାଙ୍କି (13), ହେମ୍ରଜଭାଇ ସୋଲାଙ୍କି (37), ନରସିଂଭାଇ ସାଙ୍କଲା (60), ନବଧନଭାଇ ସାଙ୍କଲା (65), ବିରାମଭାଇ ରାଥୋଡ (35) ଏବଂ ଲାଲାଭାଇ ରାଥୋଡ (20) ବୋଲି ପୋଲିସ କହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
