ସିମଲା: ହିମାଚଳ ପ୍ରଦେଶ ଲାହୌଲ ଘାଟିର ତେଜିଂ କେନାଲରେ ଭାସି ନିଖୋଜ ହୋଇଥିବା ୧୦ ଜଣଙ୍କ ମଧ୍ୟରୁ ଆଜି ୭ ଜଣଙ୍କ ମୃତଦେହ ଉଦ୍ଧାର ହୋଇଛି । ଏବେବି ଅନ୍ୟ ନିଖୋଜଙ୍କ ପତ୍ତା ମିଳୁନି । ମୃତକଙ୍କ ମଧ୍ୟରୁ ୪ ଜଣ ଟକୋଲିର ହୋଇଥିବା ଜଣାପଡିଛି । ସୂଚନାନୁଯାୟୀ ପ୍ରବଳ ବର୍ଷା ଯୋଗୁଁ କେନାଲରେ ବନ୍ୟା ଆସିବାରୁ 10 ଜଣ ନିଖୋଜ ହୋଇଥିଲେ । ଆଜି (ବୁଧବାର) ପୂର୍ବାହ୍ନରୁ ଉଦ୍ଧାରକାରୀ ଦଳ ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।
ସେପଟେ ବର୍ଷା ବାଧକ ସାଜିଥିଲେ ସୁଦ୍ଧା ନିରନ୍ତର ଉଦ୍ଧାର କାର୍ଯ୍ୟ ଜାରି ରହିଛି। ଏହାସହ ଲାହୌଲ ଉପତ୍ୟାକାର ନଦୀ ଓ କେନାଲର ଜଳସ୍ତର ବୁଧବାର ବଢୁଥିବା ଦେଖିବାକୁ ମିଳିଛି। ବାଦଲଫଟା ବର୍ଷାରେ ବିଲିଙ୍ଗ, ଲାଉଟ, ଶଙ୍କର, ଜାହଲମା, କାମିଙ୍ଗ ଏବଂ ଥିରୋଟ ଡ୍ରେନ ସମେତ କିଲୋଙ୍ଗର ସାକାସ କେନାଲରେ ବନ୍ୟା ପରିସ୍ଥିତି ସୃଷ୍ଟି ହୋଇଛି ।
ଜାହଲମା ଏବଂ ସାକାସ କେନାଲରେ ଅଧିକ ପାଣି ଆସିବା ଯୋଗୁଁ ଚାଷୀ ଏବଂ ଉଦ୍ୟାନକାରୀ ମାନେ ମଧ୍ୟ ବହୁ କ୍ଷତି ସହିଛନ୍ତି । କେନାଲ ଗୁଡିକରେ ବନ୍ୟା ଆସିବା ଯୋଗୁଁ ମନାଲି-ଲେହ ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଛି ।
ଲାହୌଲ ଉପତ୍ୟକାରେ ପ୍ରବଳ ବର୍ଷା ହେତୁ ଅନେକ ରାସ୍ତା ଯାତାୟାତ ପାଇଁ ବନ୍ଦ ରହିଛି। ମନାଲି କାଜା ରାସ୍ତାରୁ ଆବର୍ଜନା ହଟାଇବା ପାଇଁ ବିଆରଓ ଟିମ୍ ନିୟୋଜିତ ଅଛନ୍ତି । ଏହା ବ୍ୟତୀତ ମନାଲି ରୋଡରେ ଯାନବାହନ ଚଳାଚଳ ମଧ୍ୟ ସମ୍ପୂର୍ଣ୍ଣ ବନ୍ଦ ରହିଛି। ସ୍ଥିତି ସ୍ପଷ୍ଟ ନହେବା ପର୍ଯ୍ୟନ୍ତ ସମସ୍ତ ଡ୍ରାଇଭର ମାନଙ୍କୁ ଗାଡି ଚଳାଚଳ ବନ୍ଦ ରଖିବାକୁ ଜିଲ୍ଲା ପ୍ରଶାସନ ଅନୁରୋଧ କରିଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
