ଗାନ୍ଧୀନଗର: ଗୁଜୁରାଟରେ ସପ୍ତମ ଥର ସରକାର ଗଠନ ପାଇଁ ବିଜେପି ପ୍ରସ୍ତୁତି ଆରମ୍ଭ କରିଦେଇଛି । ଐତିହାସିକ ବିଜୟ ପରେ ଆଜି ବିଜେପିର ବିଧାୟକ ଦଳ ବୈଠକ(Gujarat BJP MLAs meeting) ବସିଛି । ଏଥିରେ ଦଳର ନବନିର୍ବାଚିତ ବିଧାୟକମାନଙ୍କ ସର୍ବସମ୍ମତିକ୍ରମେ ଭୂପେନ୍ଦ୍ର ପଟେଲଙ୍କୁ ବିଧାୟକ ଦଳ ନେତା ଭାବେ ଚୟନ କରାଯାଇଛି । ଏହାପରେ ପଟେଲ ଏବଂ ରାଜ୍ୟ ବିଜେପି ମୁଖ୍ୟ ସିଆର ପାଟିଲ ରାଜଭବନ ଅଭିମୁଖେ ଯାଇଛନ୍ତି । ସେଠାରେ ସେ ସରକାର ଗଠନ ପାଇଁ ଦାବି ଉପସ୍ଥାପନ କରିବେ ।
ଆଜିର ବିଧାୟକ ଦଳ ବୈଠକରେ ପ୍ରଥମେ କାନୁ ଦେଶାଇ ଭୂପେନ୍ଦ୍ର ପଟେଲଙ୍କ ନାଁ ଆଗତ କରିଥିଲେ । ଏହାକୁ ଅନ୍ୟ ବିଧାୟକମାନେ ସମର୍ଥନ କରିଥିଲେ । ୧୫୬ ନବନିର୍ବାଚିତ ବିଧାୟକଙ୍କ ସର୍ବସମ୍ମତିକ୍ରମେ ଭୂପେନ୍ଦ୍ର ପଟେଲ ବିଧାୟକ ଦଳ ନେତା ହୋଇଛନ୍ତି । ଏହାସହିତ ଆସନ୍ତା ସୋମବାର ଦିନ ଭୂପେନ୍ଦ୍ର ପଟେଲ ଗୁଜୁରାଟର ମୁଖ୍ୟମନ୍ତ୍ରୀ ଭାବେ ଦ୍ବିତୀୟ ଥର ଶପଥ ନେବେ । ଏଥିରେ ମୁଖ୍ୟମନ୍ତ୍ରୀ ନରେନ୍ଦ୍ର ମୋଦି ଓ ଗୃହରାଷ୍ଟ୍ରମନ୍ତ୍ରୀ ଅମିତ ଶାହା ଯୋଗ ଦେବେ । ଏହାପୂର୍ବରୁ ଗତକାଲି ପଟେଲ ରାଜ୍ୟପାଳଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଥିଲେ ।
ଆଜି ବିଧାୟକ ଦଳ ନେତା ଚୟନ ହେବା ପରେ ଭୂପେନ୍ଦ୍ର ପଟେଲ ଗଣମାଧ୍ୟମକୁ କହିଛନ୍ତି, ''ଗୁଜୁରାଟର ଜନତା ଦେଶକୁ ବିକଶିତ ଦେଶରେ ପରିଣତ କରିବା ପାଇଁ ପ୍ରଧାନମନ୍ତ୍ରୀ ମୋଦିଙ୍କ ସଂକଳ୍ପ ଉପରେ ମୋହର ମାରିଛନ୍ତି । ମୋର ସଦସ୍ୟ ଓ ସଂଗଠନ ଗୁଜୁରାଟର ବିକାଶ ପାଇଁ କାମ କରିବେ । ବିଜେପି ସରକାର ଓ ମୋଦିଙ୍କ ଉପରେ ଲୋକଙ୍କ ଭରସା ଭାଙ୍ଗିବାକୁ ଦେବେନାହିଁ ବୋଲି ସେ ପ୍ରକାଶ କରିଛନ୍ତି ।
